Na fa’amanuia fa’apitoa ta’ita’i o le atunu’u atoa ai ma le aufai lotu i le au ta’aalo a Amerika Samoa lea ua sauni e tausinio i Ta’aloga lona XV a le Pasefika, lea ua fa’amoemoe e faia i Papua Niu Kini i le masina fou, i se sauniga lotu fa’amavae sa faia i le Malumalu o le Ekalesia Katoliko i Fatuoaiga i le afiafi o le aso Lulu na tea neii.

O feau fa’amalosi eseese mai Failauga fa’apitoa o le po na momoli atu ai upu fa’amalosi, fa’amanuiaga atoa ai ma upu fa’alototele i au ta’aalo uma, ina ia tausinio ma le talitonuga, “o i latou o ave fu’a a Amerika Samoa i le Pasefika.”

O le afioga a Bishop Peter H. Brown na ta’ita’ia le saunoaga atoa, ae o le afioga a Patele Petelo Siliako na saunia le upu fa’amalosi mai le Tusi Paia, e tomatau ai finagalo o le au ta’aalo ao sauni atu ai mo tauina o le taua.

Na taua e Patele Siliako i lana saunoaga e fa’apea, e leai se isi mealilo e mafai ai ona manumalo se tagata ta’alo, nai lo le malamalama i lana mea o loo fai, lava lona malosi, toe usita’i i tulafono o lana ta’aloga.

“Aua ne’i galo ia te outou, tou te le o malaga e tausinio mo outou lava, o loo outou malaga ma le igoa o Amerika Samoa, o outou fo’i o Amapasa ma ave fu’a a le atunu’u i le Pasefika,” o le saunoaga lea a Patele Siliako.

“Aua nei galo apoapoaiga sa tuuina atu e a outou ta’ita’i i taimi o a outou koleniga, ia asoa i o outou ua ma teu fatu i o outou loto fautuaga uma na, ina ia i’u ma le manuia la outou sailiga manuia,” o isi ia upu fa’amalosi a Patele.

Na fa’ailoa e Patele i le au ta’aalo le nofo tapua’i atu o matua, aiga faapea ai ta’ita’i ma le atunu’u atoa, e tu’i atu le mulipapaga a’o latou toesea ai i atunu’u ese ona o le tauina o le taua e ala i ta’aloga a le Pasefika.

“E le faigofie la outou galuega, ae afai tou te fa’amoemoe i le Atua ma fa’amaoni i lau taumafaiga, e le pine le fa’amanuiaina uma o outou,” o le isi lea saunoaga a Patele.

E tele isi siitaga ma ni isi o tagata atamamai o le lalolagi na fa’aaoga e Patele e lu’itau ai finagalo o le au ta’aalo, e pei o siitaga a le alii Henry Russel “Red” Sanders fai mai, “ia tausisi i le mea e tasi, o le manumalo lea.”

O le afioga a Pa’u Roy Ausage sa fai ma sui o le malo, ina ua le mafai ona paau atu le afioga i le ali’i kovana ia Lolo Matalasi Moliga i le sauniga, e fa’afetaia ai le Ekalesia Katoliko ona o le avanoa ua mafai ai ona fa’ataunuu lenei sauniga lotu faapitoa mo au taaalo a le atunu’u i ta’aloga a le Pasefika.

I lana saunoaga faapitoa mo le au ta’aalo, na faailoa atu ai e Pa’u i ali’i ma tama’ita’i ta’aalo e fa’apea, o le filifilia o i latou e fai ma ave fu’a a Amerika Samoa i ta’aloga a le Pasefika, o se fa’amanuiaga lea mo i latou, o le mea lea e tatau ai ona latou fa’aaoga tatau le avanoa ua latou maua.

“Ia lele malie lau Ti’a i Ulupaga,” o le saunoaga fa’ai’u lea a Pa’u i le au ta’aalo, e pei ona fai ai o ia ma sui o le kovana ma le faigamalo.

I le saunoaga fa’amalosi a le susuga a Troy Polamalu mo le au ta’aalo, sa ia fautuaina ai i latou ina ia fa’amuamua Keriso i soo se mea latou te faia, ma ia fa’aaoga tatau la latou taleni e saili ai se ‘ai mo Amerika Samoa.

Na fa’ailoa e Polamalu i le au ta’aalo lona talitonu atoatoa i le fa’amaoni o le Atua e ofo mai le taulaga mo le lalolagi, e fa’apena fo’i i tatou o tagata ta’aalo, e ao fo’i ona fa’amaoni e fa’aaoga le taleni na aumai e le Atua e tautua ai le malo ma fa’afo’i ai le viiga i le Atua.

“O le avea o outou ma ave fu’a a Amerika Samoa i Ta’aloga a le Pasefika, o se fa’amanuiaga lea mo outou, o le mafua’aga lea ou te talosagaina ai outou ina ia fa’atatau a outou taleni mo le Atua, ma ia outou fo’i mai ma le manumalo,” o le saunoaga fa’ai’u lea a Polamalu.

O le aso Sa o le vaiaso nei lea ua fa’amoemoe e amata gasolo ai au ta’aalo a le atunu’u mo Papua Niu Kini.