E lua itulau le umi o le fa’aiuga tusitusia a le Vaega Apili o le Fa’amasinoga Maualuga na tu’uina mai i le vaiaso nei, e fa’amalamalama atili ai lana fa’aiuga sa tu’uina mai i le masina na te’a nei, ina ua teena le tagi sa fa’aulu e le afioga i le ali’i faipule ia Va’amua Henry Sesepasara, fa’asaga i le susuga a Meauta L. Mageo, le faipule filifilia o le afioaga o Pago Pago mo le Maota o Sui i le Fono Faitulafono mo le isi lua tausaga o lo o lumana’i nei.

Ina ua mae’a ona fa’afofoga ali’i fa’amasino i mau fa’amaonia o lenei mataupu, i se iloiloga sa faia i le masina na te’a nei, na tu’uina mai ai loa e le afioga i le ali’i fa’amasino sili ia Michael Kruse le fa’aiuga e teena ai le tagi a Va’amua, fa’atasi ai ma le fa’aiuga, o le a tu’uina mai se fa’aiuga tusitusia a le fa’amasinoga i se taimi o i luma e fa’amanino atili ai lana fa’aiuga ua mae’a ona tu’uina mai.

Na taua e Va’amua i lana tagi e fa’apea, ina ua mae’a le faiga palota na sei mavae atu nei, na logoina ai o ia e se tagata palota a lona itumalo, e fa’atatau ia Mageo ma ni solitulafono sa ta’usala ai o ia i Hawaii ma Amerika.

Ona o lea tulaga, ua ia manatu ai loa, e le agava’a la Mageo ona avea ma sui faipule o le itumalo, e tusa ai ma ni isi o aiaiga e agava’a ai se tasi ona avea ma sui tauva o se itumalo mo le faiga palota.

E 356 palota na maua e Mageo ae 292 palota na maua e Va’amua, ina ua mae’a le sailiga tofi a le atunu’u sa faia i le aso 4 Novema 2014.

E talitonu le fa’amasinoga i le mae’a ai lea ona iloiloina o mau uma o lenei mataupu, e le o le fa’amasinoga e iloiloina se fa’aiuga o mataupu fa’apenei e pei ona finauina e Va’amua, ae o le tiute lena o le Maota o Sui o le Fono Faitulafono, latou te iloiloina sui ua filifilia e avea ma su o itumalo taitasi, ina ia talafeagai lo latou agava’a e tusa ai ma tulafono.

Na taua e le fa’amasinoga i se vaega o lana faaiuga e faapea, o mataupu faapenei e faatatau i tulaga tau palota, e tatau ona fesiligia le agava’a o se sui tauva ao lumana’i le palota, ae afai e faiila e se sui ua le manuia sana tagi fa’asaga i le sui ua manumalo ma fesiligia ai le fa’aiuga o le palota, ua atagia mai ai le le talafeagai o le taimi ua faila ai lea talosaga, e tusa ai ma tulafono tau palota.