O tulaga fa’aletonu i “ripoti ma fa’amaumauga” o loo tu’uina atu i le Ofisa o le Feterale o loo maua mai ai alagatupe o loo fa’atupe ai polokalame mo Taumafa a le au matutua, o se tasi lea o mafua’aga na taua e le Fa’atonusili fou o le Ofisa o le TAOA o loo mafua ai tulaga fa’aletonu e pei ona maitauina i alagatupe a le Ofisa, ma ua galulue nei le Ofisa mo le fa’aleleia o ia tulaga.

I le taimi o lana iloiloga i luma o le Senate i le vaiaso nei, na fesiligia ai e afioga i Senatoa le tama’ita’i fa’atonusili ia Evelyn Lili’o-Satele i le mafua’aga ua tele ai masina e le o totogia fale’aiga o loo saunia taumafa vela mo Tama ma Tina matutua i le atunu’u.

Na taua e Lili’o-Satele le i ai o manaoga mai le Ofisa o le Feterale o loo auala mai ai alagatupe o le polokalame e tatau ona ausia, ma o loo galulue i ai le aufaigaluega e fa’aleleia lea tulaga.

O se tasi o lu’itau tele sa ia taua i le Senate lona maitauina ina ua fa’atoa ulufale atu i le Ofisa i le 2 vaiaso talu ai, o le mana’omia lea o le faia o ni aoaoga mo se vaega o le aufaigaluega, ina ia fa’amasani i latou i auala e fa’atinoina ai le tu’u fa’atasia o ripoti mo le fa’aaogaina o tupe o loo fa’atupe ai le polokalame.

“E tele naua ta’iala ma tulafono o loo tuuina mai e le feterale mo le fa’aaogaina o tupe o le polokalame, o tulaga fo’i ia e tatau ona ausia e le aufaigaluega i ripoti o loo tuuina atu”, o le saunoaga lea a le tama’ita’i Fa’atonusili.

Sa ia taua atili fo’i e fa’apea, e le o le fa’aaoga le tatau o tupe mai le feterale le mafua’aga o le fa’afitauli o loo tula’i mai, ae o le le maopoopo atoa ai ma le le atoatoa o ripoti ma fa’amaumauga o loo tu’uina atu.

Saunoa le afioga i le ali’i senatoa ia Levu Tulafono Solaita e fa’apea, ua i ai  isi o le aufai pisinisi ua latou fa’ailoa atu ia te ia, ua silia i le 3 masina e le o totogiina lava i latou e le TAOA, ae na saunoa le tama’ita’i fa’atonusili, e i ai ni nai vaega tupe e tatau ona fa’amae’a e le Ofisa mo pisinisi o loo latou ofoina atu lea tautua.

Saunoa Tuaolo M. Fruean e fa’apea, o se tasi o mafu’aaga na ala ai ona filifilia e le afioga i le ali’i kovana ia Lili’o-Satele e avea ma Fa’atonusili, ina ia silasila toto’a i tulaga o loo alia’e mai ai fa’aletonu e pei ona taua, ma ia faia i ai sana fuafuaga e foia ai.

Na fesiligia e le afioga i le ali’i senatoa ia Paepae Faiai le tama’ita’i fa’atonu i le tulaga o le le sa’o o fa’amaumauga, poo se fa’afitauli lea ua tele o tausaga o tula’i mai i le Ofisa, ae na tali le molimau e fa’apea, o le suiga fou e pei ona fa’atautaia ai galuega a le Ofisa na amata mai ina ua tuana’i le galulolo o le 2009, ma fa’aauau mai ai loa galuega ma fa’amaumauga seia oo mai i le taimi nei.

O se tasi fo’i o itu sa ia molimauina ina ua oo atu i le Ofisa, o le eseese lea o api o loo i ai fa’amaumauga a le Ofisa, ma o loo latou galulue ina ia tu’u fa’atasia fa’amaumauga i se api se tasi.

Talu ai o fa’aletonu i fa’amaumauga e pei ona taua e le tama’ita’i fa’atonusili, na mafua ai ona fesiligia le molimau pe fa’amata o loo sa’o le aufaigaluega o loo latou galulue, ae na tali le molimau, afai loa e tulaga lelei aoaoga o loo fa’agasolo i le taimi nei, o le a mafai ai loa ona foia fa’afitauli e pei ona tula’i mai, ae i lona talitonuga o lo o lelei ma atoatoa tulaga o loo faatinoina ai e le aufaigaluega le galuega.