Ads by Google Ads by Google

Fa’amanatu Kruse mataupu faatatau tagata faigaluega malo nofosala

O le mataupu e faatatau i le tulafono lea e le tatau ai ona toe faa faigaluega e le malo, sana tagata faigaluega ua ta’usala i se solitulafono mamafa i luma o le fa’amasinoga, na toe fa’amanatu e le afioga i le fa’amasino sili ia Michael Kruse i le aso Faraile na te’a nei, ina ua fofoga e le faamasinoga lana faasalaga faasaga i se tina sa galue mo le Asosi a Matua ma Faiaoga a le aoga maualuga a Samoana, lea ua ta’usala i lona ave faagaoi o se vaega tupe a le PTA.

 

Ina ua mae’a ona tuuina atu e le alii faamasino sili le faasalaga o Lizza Ga’otala, sa ia liliu atu ai loa i le loia a le malo ia Camille Phillipe, ma ia toe faamanatu i ai le tulafono lea e le tatau ai ona toe faa faigaluega e le malo se tagata faigaluega ua ta’usala e le faamasinoga i se solitulafono mamafa.

 

“O i latou e aafia i gaioiga nei ma ta’usala e le fa’amasinoga, e ao i le malo ona silasila toto’a i ai ina ia mautinoa e le mafai ona toe faa faigaluegaina i latou nei,” o se vaega lea o le saunoaga a Kruse.

 

Saunoa Kruse e faapea, ua matua ta’atele lava le amio lea o le gaoi i so o se mea, ma ua manatu foi ni isi tagata o le a mafai ona puipuia mai a latou amio faagaoi ma faaauau ai pea ona galulue mo le malo.

 

I lalo o le Ulutala 7.0801 o le Tulafono Toe Teuteu a Amerika Samoa, o lo o faamanino mai ai vaega e faate’a pe fa’amalolo ai se tagata faigaluega ua ia soli se ta’iala o amioga mo tagata faigaluega.

 

E 6 masina lea ua poloa’i e le faamasinoga maualuga e taofia ai Ga’otala i le toese i Tafuna, o se tasi lea tuutuuga o lana nofovaavaaia e 7 tausaga.

 

A’o le’i tuuina atu le faasalaga a le faamasinoga, na faatoese le ua molia e tusa ai o lana solitulafono sa fai. E le gata na faatoese i le faamasinoga ma le malo o Amerika Samoa, ae sa ia faatoese foi i le PTA a le aoga maualuga a Samoana na aafia i lenei mataupu, o lona nuu i Fagasa faapea ai ma lona aiga, ina ia alolofa faamagalo o ia.

 

Sa ta’utino Ga’otala na te le toe faia lenei solitulafono i le lumana’i.

 

Na faai’u lana faatoese i lona talosagaina lea o alii faamasino mo se isi avanoa mo ia, sei faaauau ai lana tausiga i si ana fanau e to’afa aemaise si ona tina ua matua, ae i le folasaga a le tina i luma o le faamasinoga, sa ia talosagaina ai se isi avanoa mo Lizza, ua na o ia o lo o faalagolago i ai le tupe maua a lona aiga aemaise fo’i e laiti si ana fanau e to’afa o lo o i ai.

 

O ni isi o itu lelei na taua e le alii loia ia Michael White sa tula’i mo le ua molia e faapea, e le gata na vave tula’i o ia ma tali ioe i lana solitulafono, ae ua maea foi ona ia toe totogiina le tupe e $2,200 sa tuuaia ai o ia e le PTA na ia gaoiina.

 

Na faaiu le faafinauga a White i lona talosagaina lea o le faamasinoga mo se faasalaga faanofovaavaaia mo le ua molia, ae i le faafinauga a le loia na tula’i mo le malo, sa ia talosaga ai se faasalaga faa falepuipui. Sa ia taua foi e le lava aso e tolu lea na loka ai le ua molia i le toese ina ua faatoa faila e le malo moliaga faasaga ia te ia, e faafetaui ai le mamafa o le solitulafono sa ia faia.

 

I se vaega o le ripoti a le Ofisa Nofovaavaaia, o lo o taua ai le aofaiga atoa o le tupe sa aafia i lenei solitulafono e $14,000, ae foliga mai e na o le $2,200 le tupe na faaaoga e le ua molia, ae folgia mai o le isi vaega tupe tele e le o mafai ona maua sa faaaoga e ni isi tagata sa galulue faatasi ma le ua molia i le vaavaaiga o teugatupe a le PTA a le aoga.

 

O se tasi o itu e le i nofo lelei i le finagalo o le fa’amasinoga, o tupe na ave faagaoi e le ua molia, o tupe ia sa totogi atu e matua e faatino ai manaoga mo a latou fanau o lo o aooga i le aoga maualuga a Samoana.

 

Na fesili Kruse i le loia a le malo po o fea la le isi vaega atoa o le tupe o lo o taua i le ripoti sa gaoia mai i teugatupe a le PTA, ae na tali le loia, na te le o iloa po o ai na gaoiina le isi vaega o le $14,000, pau le mea o lo o ia iloa, e na o le pau lava lea o le mataupu ua faila e le malo e faatatau i tupe a le PTA a Samoana na gaoia.

 

O se tasi o itu e malie i le silasila a le faamasinoga e pei ona taua e Kruse, o lea ua augani atu ma loimata lenei tina talavou mo se avanoa, se’i faaauau ai pea ona latou mafuta ma lana fanau ma tausi ia latou, ae na te le i lagona se alofa i fanau a le atunuu e ona tupe ia sa ia faaaoga faagaoi.

 

E fitu tausaga na manatu le faamasinoga e faasala ai le ua molia, peitai ua faamalumalu lona tuliina o lea faasalaga, ae o le a nofovaavaaia o ia mo tausaga e fitu i lalo o poloaiga a le faamasinoga.

 

O ni isi o ia poloaiga e aofia ai lona tuliina o masina e 6 i le toese, atoa ai ma lona totogiina o le salatupe e $3,000.

 

Na faamanatu e Kruse ia Ga’otala e faapea, afai na te le usitaia le poloaiga e totogi ai le salatupe, e ono taofia o ia i le toese mo le tuliina faamaea o le fitu tausaga.