Ads by Google Ads by Google

Fa’amanatu Atu - Tete’e ma Fa’aumatia le AIDS

“Tu mai le E!”

“O le tala ua fa’alauiloa mai, “Getting Zero” Tulaga ua leai se mea, po’o le tu mai i le E, ua matua leai se tasi o toe a’afia i lenei fa’ama’i mata’utia o le AIDS, o le auau lea o le kemupeni lea ua fa’atautaia i lenei tausaga a le Komiti e Fa’atautaia Galuega e Tete’e atu i le AIDS!”

O lo ua manatua e atunu’u uma o le lalolagi lea aso, ia taulamua ai Komiti e Tete’e malosi i le AIDS e faia latou tima’iga fa’alaua’itele, ina ia taofia le toe maua o se tasi o latou tagatanu’u i lenei fa’ama’i leaga ma le mata’utia o le AIDS.

E le’i ‘au ese ai le tatou malo, sa matua fuli fo’i le Matagaluega o le Soifua Maloloina e faia a latou fa’ailo, ia utagia e tagata, “ia le toe maua se tasi i le AIDS; ma ia o’o i le “0” le aofaiga o i latou o a’afia i le AIDS.”

O se tala mai atunu’u tetele i fafo, ua fa’ailoa mai, “Ua matele ina faia’ina le AIDS i le tele o atunu’u i le lalolagi, ma ua galulue punoua’i tagata uma o nei malo e matineia le fa’ama’i lenei mai le maua ai o latou tagata, ae paga lea, ua i ai nisi atunu’u o le lalolagi, ua sosolo e pe i o se papala e le pe le ogaoga ma le fa’ateleina o tagata  o latou atunu’u i le AIDS.”

Peita’i, ua fa’ailoa mai, “E tusa pe ua faifai tetele le pesia o tagata i lea ma’i leaga, ae ua tinou uma tagata ua ofo le latou malosi ma tupe e fa’atautaia ai kemupeni e fa’asagatau ai i le AIDS, ina ia manumalo a’ia’i mai ai!”

“So’o se malaga umi lava i lenei olaga, e amatalia lava i le la’asaga muamua e tasi, o le la’asaga lea e sili ona fefe le tagata e faia, ae ia le fa’ataututu ae faia lea la’asaga ma taso’o atu ai lava, se’ia o’o ina to’ai taunu’u le tatou malaga - ua le toe i ai se isi o ma’i i le AIDS!”

“O le ulua’i aso o Tesema i tausaga ta’itasi e fa’ailoa ai e tagata uma lo latou galulue fa’atasi e fa’aumatia le AIDS, fa’ailoa lou sapaia o i latou o lo’o ola pea ma a’afiaga o lenei ma’i tiga, ma ia avea ma aso tatou te manatua ai i latou ua maliliu ona o lenei ma’i tiga.”

Sa le malolo fo’i le tatou matagaluega o le Soifua Maloloina i lona tiute ma ona faiva, o le fa’alauiloa o afaina o lenei gasegase, ma na faia le latou talotaloga i lumafale o le Toa i Nu’uuli i le aso 27 Novema, 2012 e ta’u atu ai i tagata fegasoloa’i lea fe’au taua, “Puipuia mai oe i lou a’afia i le AIDS!”

I le aso To’ona’i na te’a nei, i le aso patino lea e taualoa ai gaoioiga tima’i i so’o se atunu’u o le o le lalolagi, “ina ia fa’aumatia le AIDS ia matua leai se tasi e toe gasegase ai!” Na faia le sauniga mamalu i le Atua i le Malumalu Katoliko i Malaeloa i le itula e 9:00 i le taeao lava.

Afai e pepesi mai fa’ama’i ma mea tiga, e tasi lava le foma’i sili e na te iloa patino i tatou ta’ito’asai ma mafaia ona fa’atino mea ua le mafaia e le tagata i lona malosi ma lona atamai ona matineia!