I le itula e 9:00 i le taeao o le aso 9, Masina e 9, i le lona 9 ai o tausaga o le tautua a le Ofisa o le Konesula o Samoa i le teritori, sa fa’atasia ai le to’aiva o sui iloga, e molimauina le sisia a’e o le Tagavai a Samoa, le fa’atulagaina o le latou Fa’ailo po’o le Saini fa’asinoala i le latou Ofisa autu i le Iupeli Siliva Bldg i Fagatogo.

“O se faiga lava ua tau ane i se fa’atatau, e ao ina fa’amalosia ai le ‘au’aunaga a si matou Ofisa i le tatou teritori. O le malosi’aga o le 9,” o se tala lea a Auseugaefa Va’asatia Poloma Komiti, le Konesula o Samoa i le teritori, le Konesula lona lua o Samoa talu mai ona tatala lea auaunaga iinei.

“Ina ne’i alu loa, ae le fa’afetai i le Taiulu o lenei malo, le afioga le Kovana Sili Lolo Moliga ma le Kapeneta, ma le pa’ia fa’atafatolu o le Malo o Amerika Samoa, ona o le avanoa fo’i e tautuaina ai nai o matou tagata Samoa, o lo’o alaala ma papaa’ao i Amerika Samoa nei. O le malosi’aga lea o le 9 na toe fo’i e fa’afetai i le Silisili ese ona o le manuia fa’aletino sa latou maua, ua toe malolosi ai,” o a Auseugaefa lea.

O le aso fo’i lea ua filifilia, ina ia fa’afouina ai nisi o ala e fa’atino ai le auaunaga. Ua suia le latou ofisa, ua si’itia mai le potu sa i ai, ae ua fa’alautele i le isi lava itu o le Iupeli Siliva.

O auaunaga o lo’o fa’atautaia nei e le Konesula o le saunia o pemita mo i latou e malaga i Samoa, fa’afouina o Tusi Folau fa’atasi ai ma le talosagaina o tusi folau fou mo tagata nu’u Samoa ua leva ona le toe i ai ni tusi folau. O le isi vala o le tautua o nisi o pepa fa’amaonia mo tagatanu’u ae maise o pepa fa’aipoipo e fia maua mai ni kopi mai Samoa e tapena ai ni latou pepa nofo mau i inei, Amerika po’o nisi atunu’u i fafo.