O le vaiaso na tea nei na faamanatuina ai le atoaga o le Iupeli Auro (50 tausaga) talu ona faavae le Ekalesia Penetekoso i le lalolagi, lea ua faaigoaina o le First Samoan Full  Gospel Pentecostal Church, e pei ona faataunuuina ai se sauniga i le malumalu i Peteli i Ottoville.

Na faatumulia lenei sauniga i sui o le ekalesia, lea na o latou toe manatua ai uluai muaau na amataina maia le galuega, e pei o le susuga ia Ti’asa Mataifale Toeaina ma le faletua ia Lefefe Toeaina i San Francisco i le aso 11 Novema 1962.

O lo’o fa’aauau mai pea ona suluia le to’atele i ana Pulega e 11 i Ausetalia, Niu Sila, Samoa, Amerika Samoa, Hawaii ma Amerika. Ua ta’ita’ia nei le Ekalesia e le Faife’au Toeaina Dr Pati Vaeao ma le Faletua Siafiafilelei mai le tausaga e 1987 se’ia o’o mai i le taimi nei, lea ua fa’amanatuina ai le 50 tausaga o le Ekalesia. Na fa’atuina le ma’a ia Setema 20, 2012, ae faapa’iaina ia Novema 10, 2012.”

Mai pulega nei e sefulu ma le tasi, ua tutula’i mai ai Faife’au Toeaiina e Ta’ita’ia. I Ausetalia ua ua galulue ai Rev. Levi ma Tea Mulitauaopele; mai Niu Sila ua galulue mai ai Rev. Mulinu’u; Mai Savaii ua galulue ai Rev. Iosua Kapisi ma le faletua, o Upolu Samoa o lo’o galulue ai Rev. Toa Saofaigali’i ma le faletua, i Amerika Samoa nei ua galulue ai le Peresetene o le Ekalesia Aoao, Rev. Dr. Elder Pati Vaeao ma Siafiafilelei Vaeao. O le Pulega a Hawaii ua galulue ai Rev. Maligi Misipati ma le faletua , ma le pulega a Kalefonia Tutotonu o lo’o galulue ai Rev. Samuelu Fa’anono ma le Faletua, Kalefonia i Matu o Rev. Veve Tafao ma le faletua, ma le Pulega i Kalefonia i Saute o Rev. John Leasau, ma le Pulega i Uosigitone ia Rev. Togafau ma le Faletua, o ia fo’i lea o lo’o avea ma Sui Peresetene o le Ekalesia Aoao.

Na avea le ulua’i aso e pulega e tolu na tu’ufa’atasia i ai Hawaii Uosigitone Kalefonia i Matu. Aso Lua na tu’u ai le avanoa i sao o Pulega o totoe o Kalefonia . Aso Lulu na lafo lea ia Savaii ma Upolu Samoa, ma le aso Tofi na taoto atu lea ia Ausetalia ma Niu Sila, ae Aso Faraile o le Pulega i Amerika Samoa, ma e le’i fa’avaivai lava le oso o mea malolosi na saunia e nei pulega.

O aso ta’itasi e afua mai lava i fono tatalo e faia i nofoaga o lo’o fa’amautu i ai, ona faia fa’atasi lea o fa’amalositino i le lotoa Ottovile ma soso’o ai ma le Malu Taeao e fa’asolo i ai fo’i pulega i le fa’atupega o taumafataga i aso ta’itasi, ae o le ‘au kuka latou e saili i le lotomalie. Faia lea o Solo o Ta’avale Teuteuina ma Solo o Savali fa’aaloalo, a’o lei faia le mea’ai fa’a-aoauli.

I aso patino mo Ausetalia ma Niu Sila sa oso mai Ausetalia ma fa’aevagelia fa’a-Fiti ae o Niu Sila sa o’o mai fa’aevagelia fa’a-Maori ae salani uma lava o latou sao i pesega fa’aevagelia fa’asamoa, na iloga ai le matagofie o latou tapenaga. Sa i ai se latou sao na faia fa’apitoa e talosia ai Isaraelu ma le osofa’iga a Palesitina ua fa’aleagaina ai nisi o nofoaga i totonu o le nu’u pa’ia!