Ona ua alia’i mai e le o tau aga’i i lalo numera o i latou e a’afia pea i le Ma’i Suka e fa’amaumauina i tausaga ta’itasi, o lea ua a’e ai se tofa i le Kovana Sili, e tofia fa’apitoa sana Komiti Fa’afoe e taumafai ona tineia lea fa’ama’i mai o tatou tagatanu’u.

E ese mai le tofia faapitoa lea Komiti Fa’afoe, ae ua fa’amamafa mai fo’i i lana fe’au tima’i, “Ua le tatau ona toe milimilia lenei afaina e tatou e aga atu lava i ai, aua e tele na’ua le afaina o le malo ma ona tagatanu’u ae maise o le a’afiaga o le tupe fa’asoa a le Malo, ona o lenei ma’i.”

O le tiute tau’ave o lenei komiti fa’afoe, ina ia fa’aitiitia mai le faitau aofa’i o e ua maua i le ma’i suka, ma e tatau ona fa’ailoa a’ia’i mai e le Komiti Fa’afoe la’asaga e ao ina fa’atino ai le togafitiga o le Ma’i Suka, o mea e ao ina fa’amalosia ona faia, ia tineia ma fa’aititia le maua pea o tagatanu’u o le atunu’u i lea ma’i.

“O le umi e mo’omia ona galulue ai le Komiti ma fa’ailoa mai le latou fa’atamo’ega o le fa’amoemoe lea, e na’o le 60 aso.”

O lo ua tofia fa’apitoa nei le foma’i Dr Sale’ia Fa’amuli, e avea ma totino faufautua i lea galuega tima’i e fa’asagatau i le Ma’i Suka.

“Ua ia Fa’amuli le iloa e fa’atautaia ai galuega e tineia ai le ma’i suka, ua ia te ia fo’i le iloa o polokalama a le feterale e mafai ona talosaga i ai mo se fesoasoani tau tupe e fa’atino ai galuega tima’i ma galuega ia tineia le maua so’o o tagata Amerika Samoa i lea ma’i, ae ua ia te ia fo’i le naunauta’iga mo’omia e mafai ai ona tutumau e fa’atino galuega e tete’e atu i le Ma’i Suka,” o le saunoaga lea a Lolo.

O fuainumera na fa’ailoa mai i le semina a le Matagaluega o le Soifua Maloloina, sa tu’u mai ai fuainumera patino e $2.6 miliona le aofaiga o le paketi na fa’aalu e taumafai ai togafitiga o le ma’i suka i le teritori, aua o le isi lea ma’i e aofia i fa’ama’i e le pepesi, ae o ma’i tumau.

O le folasaga a Tamasoali’i Dr. Joseph Tufa sa ia fa’ailoa ai, i le tausaga 1980 sa toatasi mai le to’afitu o tagata Amerika Samoa ua matua ova le mamafa nai lo le umi o lo’o ua fuaina, ae to’a 3,000 le faitau aofa’i o tagata Amerika Samoa ua fa’amauina e maua i le ma’i suka.

Ona o le tulaga e i ai le feso’ota’iga a le Ma’i Suka ma ma’i o le fatu e aofia ai le Toto Maualuga, Storke [maliu fa’afuase’i] ma le tauaso, ma o le aotelega o maliu na fa’amauina i le tausaga e 2011 e na’o le 151, e to’a 85 e afua ona o tulaga tau le Ma’i Suka, ae o le 2012 e 138 maliu ae to’a 72 e afua mai i afaina o le ma’i suka, o lea ua mautu ai le fa’ai’uga a le faigamalo, “ia fa’amamafa nei ona fa’atulaga togafitiga ma ala o tima’iga ae maise o le puipuiga malosi ia fa’aititia i latou e toe a’afia i lenei ma’i i totonu o le atunu’u.”

O i latou ua tofia mo lea Komiti Fa’afoe a le malo mo le Ma’i suka ua aofia ai:DOE Fa’atonu Vaitinasa Dr. Salu Hunkin Finau; DOH Fa’atonu Motusa Tuileama Nua; Failautusi Samoan Affairs Satele Galu Teutusi Satele Sr.; Rev Father Sefo Timu; ASCC’s Land Grant Fa’atonu Tapa’au Dr. Dan Aga; Fa’atonu Agriculture Lealao Melila Purcell;  Faufautua Fa’apitoa Ofisa o le Kovana Dr. Oreta Crichton; ma le Tausala Lalelei o American Samoa Eleitino Tuiasosopo.

fa’aliliu: Leua Aiono Frost