Ona o lea ua taofia a’oga talu ai le fa’ama’i mata, o se gaoioiga a le Matagaluega o Soifua Maloloina ua faia nei, ua tima’i mai i le mamalu lautele, “Fa’amolemole, fa’afilemu fanau i le fale, to’aga e fa’amama mea uma i totonu o lotoifale ma ia tautuana ma matua, fa’amama lelei mata o le fanau, aua lava ne’i milia e i latou pe afai ae fa’alogoina le mageso pe pisia i se mea.” O se tala lea a le ali’i foma’i Dr. Mark Duran mai le Matagaluega i le talanoaga ananafi.

“O le taimi nei, ua fa’amalosia lava le lapata’ia sa’o atu mai le fa’auluuluga o le matagaluega le mamalu lautele, fa’amolemole, afai ua maua lou alo i le fa’ama’i mata, taofi mai o ia mai le mafuta atu i nisi o ta’aloga, a’oga ma le feoa’i ma nisi o ana uo se’ia toe lelei o latou fofoga.”  O se tala lea a le fa’atonu sili o le Soifua Maloloina, Motusa Tuileama Nua.

O le fonotaga fa’apitoa ananafi, sa toe taga’i ai le fa’auluuluga o lea matagaluega, Motusa, Farah Malaepule Utu ma Dr. Duran i fuainumera fa’amaumau mai falema’i ma falema’i itumalo i e na sulufa’i i ai ona o le fa’ama’i mata.

O le vaiaso ua te’a, sa matua maualuga lava le faitau aofa’i o i latou ua pesia i le ma’i mata, ae ua o’o mai i le falema’i mo ni vai e togafitia ai. “Peita’i, o le to’atele o i latou e pesia i aiga, e le tau o mai i le falema’i, e togafitia lava i tua, ma toe lelei ai.” O se tala lea a Dr. Durand.

“O le aofaiga o i latou ua fa’amauina i falema’i fa’aitumalo e tolu ma le falema’i o le LBJ i le potu o talavai mata ma le ER, ua atoa le 468 o i latou ua a’afia talu mai le amataga ia Mati 11, 2014, sa mua’i va’aia ai lava se tasi, ma iloa ai, ua o’o mai le ma’i mata i Tutuila nei.” O se fa’amaumauga lea mai ia Dr. Durand.

Ina ua fesiligia le ali’i fa’atonu e tusa o le taofiga o a’oga ona o lea fa’ama’i, ae sa ia fa’ailoa mai, “O se fa’ai’uga sili ona taua ma le sa’o lea ua faia, aua e sili ona faigata ona taofiofia le fanau mai le mili o mata, pe faia fo’i e i latou nisi o gaoioiga e afua ai ona fa’atetele le fa’ama’i i totonu o a’oga, o atu lea i aiga, ma avatu lava i ai. Afai fo’i o fanau na maua a’o i ai i le li’o o lona aiga, ae sau ma le fa’ama’i i totonu o le a’oga, e a’afia uma ai isi fanau a’oga mai lea sui, ua atili fo’i ona fa’atupula’ia ai le fa’ama’i pepesi”

Mai le tele o tausaga, ua fa’ailoa mai e Utu, “O le taofia o a’oga ona o le fa’ama’i mata, o se taimi muamua lea ua faia ai lea fa’ai’uga, ae o se fa’ai’uga fo’i ua matua fa’afetai lenei matagaluega ua faia ma le silafia lelei e le afioga le Fa’atonu o A’oga, e tatau ma o se vaifofo i le fa’atupula’ia atili o le fa’ama’i i tamaiti ma o latou aiga fo’i.”

E i ai mea ua sili ona tima’i mai e le fa’auluuluga o le Matagaluega, “O le fa’ama’i mata, e matua vave lona pepesi o sau ai. Fa’amolemole afai ua e iloa ua e maua i le ma’i mata, alofa i le isi ou uso, ma e nofo lelei i lou aiga, aua e te fealua’i i nofoaga faitele na’i pesia ai isi.”

Sa ia fa’aauau mai lea fe’au taua, “Afai ua e maua ai, ae fa’alogoina ua a’ati pe mageso mai ou mata, aua le milia, ae taumafai e fafano ou lima muamua, ona e fa’asusu lea o se ieie mama lelei i le vai’aisa, ae moeiini ou mata, fa’ata’atia lelei ai i luga, e malu ai lau fa’alogo. Aua ne’i e toe fealua’i pe fa’afetauia au uo, ae nofo lelei i lou fale.”

Afai ae usuta’ia e i tatou uma nei mea, ona fa’afaigofie lea ona fa’aitiitia le fa’ama’i mata mai o tatou laufanua.

Na fesiligia fo’i le matagaluega “Pe mata e moni e fa’atasi lava ona maua oe i le fa’ama’i mata, ona le toe maua ai lea?” O le tali mai, atonu e foliga mai e moni lea tulaga, ae leai, e mafai fo’i ona e maua fa’alua ma fa’atolu ai.”

“O le mea sili ona taua, ia fa’amama lima a’o le’i tagofia mata, ia fa’amama mea uma i le lotoifale o lou aiga a’o le’i fa’aaogaina, ma ‘aua fo’i ne’i e inumia fa’atasi e oe ma se isi lava faguvai ma mea’ai, ina ia le pepesia solo ai fa’ama’i fa’apenei,” o le tala lea a Utu.