Ads by Google Ads by Google

Fa’amalosia OMV tulafono aveese ai ‘tint’ mai taxi la’u pasese

O le Aso Gafua na te’a nei, na amata faamalosia ai e le Ofisa o Taavale Afi a le malo i Tafuna (OMV) le tulafono ua pasia e le Komisi o Fefaatauaiga ma Alamanuia, e aveese ai ‘tint’ po o vali uli, mai tioata o taxi la’u pasese, e pei ona fa’amaonia e le pulesili o le OMV, le susuga Faamausili Mau Mau Jr.

Saunoa Faamausili e faapea, o le vaiaso nei na faailoa atu ai e le DOC ia te ia le aso e tatau ona amata faamalosia ai lea tulafono, ma ua usitaia foi e lona ofisa.

E le’i mafai ona faamaonia mai le aofai o taxi ua sasae ese tint sa faapogisa ai tioata, na pau lana saunoaga, ua i ai taxi ua uma ona aveese tint sa pipi’i ai, e ui o lo o tumau pea le tete’e o le toatele o le aufai taxi i le tulafono lenei, ona o le latou talitonuga, o se tulafono ua le talafeagai ma e leai foi sona uiga.

“Ou te le iloa pe i ai se mafuaaga talafeagai ua ala ai ona manatu le Komisi o Fefaatauaiga e aveese tint mai a matou taxi laupasese,” o le faasea lea a le alii o Kome Lafaitele, o se tasi o alii fai taxi i le atunuu.  “E leai se tupe a le malo o alu i le faatauina o tint o loo faapipii i la’u taavale, ae na mafua ona ou faaaogaina le tint, e fesoasoani lea i le faamaluluina o le ea i totonu o le taavale pe a oo i aso e malosi ai le la, e le gata foi i lea, e mananao isi aufai taxi e faaaoga le tint i a latou taavale ina ia teuteu faamatagofie ai le taavale, ma mananao ai tagata feoa’i e ti’eti’e ai”.

Na saunoa foi seisi alii fai taxi, o Agafili Suia, e le o se mea tatau le faaauau pea e le malo ona faamalosi le tulafono lenei, ae o lea e toatele tagata fai taxi o lo o tete’e ai.

“Ua fiu fo’i e telefoni atu i luga o le polokalama a le alii kovana i faaiuga o vaiaso taitasi mo sana fesoasoani, e leai lava se tali o tuuina mai ae o lenei la ua amata ona faamalosia le tulafono, lona uiga ua gau tupe sa faaalu i le faatauina o le tint e faaaoga i a matou taavale,” o le molimau lea a Siua.

E tolu polokalama sosoo a le kovana o faaleo ai e nisi o le aufai taxi la latou faasea e uiga i le mataupu lenei, faatasi ai ma le latou talosaga i le alii kovana, e ave sana fautuaga i le Komisi o Fefaatauaiga o faia lenei tulafono, ina ia alolofa e fai ma se alofa a latou faaiuga.

Na taua e le isi alii ave taxi na valaau atu i le polokalame a le kovana i le vaiaso na te’a nei e faapea, e le iloa pe aisea e atugalu ai le Komisi i tint o taxi, ae le o ni tupe a latou na faaalu e faatau ai, o tupe lava a le au ave taxi.

“O le isi mea faaletonu o loo maitauina e le aufai taxi, e foliga mai ua fai faamalosi lava e le Komisi nei tulafono ae faapitoa lava mo le aufai taxi, ae le o aofia ai taavale uma lava i le teritori, aua i lo’u talitonuga, o Tutuila o le motu o fiafiaga, ae afai o le auala lea o le a fai ai tulafono o le fai i auala faamalosi, lona uiga o le a le toe taua Tutuila o le motu o fiafiaga, ae o le a faaigoaina o le motu o faanoanoaga,” o le tala lea a le molimau.

Saunoa kovana Togiola Tulafono, e i ai mafuaaga e ala ai ona naunau le malo e aveese le tint pogisa lea ua maitauina i taxi i le taimi nei, e le gata o le puipuiga o le saogalemu o tagata lautele, ae faapea foi ma le ave taxi mai le ono aafia i ni faalavelave tau taavale.

Na faamanino foi e Togiola e faapea, e le o faasaina e le malo ona toe faaaoga tint, ae ua i ai lava le malosi o le tint e faatapulaa ona faaaoga mo taxi, ae le o le ituaiga tint lea e matua le iloa atu lava se isi i totonu, leaga e naunau foi le malo e fia iloa po o a mea o loo fai i totonu o le tint.

Na faaalia foi e Togiola, o lo o ia faatali seia pasia e le Senate totino o le Komisi o Fefaatauaiga, ona mafai lea ona fa’ao’o i ai se fautuaga e tusa ai ma lenei tulafono.  Na teena e e le Senate tofiga a le kovana, na aofia ai Vaiausia Yandall, Faalae Tunupopo ma Foinuu Folauoo.

.