Fa’amalosi’au mai SBDC i Pisinisi Laiti

O le vaitau lava lenei e fa’atino ai e le Small Business Development Center [SBDC] a latou galuega fa’amalo i pisinisi laiti sa fa’ato’a fa’atutu, ma ua iloga mai, o lo’o gasolo pea i luma le latou taumafai e atina’e a latou tautua mo le lautele.

 

O se tala mai le ali’i fa’atonu o le SBDC, Herbert Thweatt,  sa ia fa’ailoa mai ai, “o taimi lava nei ua atofa ina ia fa’atasia ai ma pisinisi laiti, ua matauituina a latou taumafaiga mai le tausaga atoa.”

 

O le masani a le SBDC o le latou fa’atasi lea ma pule sili o pisinisi laiti sa latou tausoa fa’atasi i auaunaga, o i latou e faufautua ma fesoasoani i pisinisi laiti nei, ina ia tumau pea ma taumafai e o’o lava ina manuia le pisinisi pe a olaola lelei i se taimi o i luma.

 

O pisinisi fo’i nei, sa amatalia mai ona o fautuaga ma tima’i sa fa’atino e le SBDC ma nei sui faipisinisi. Ma ua fa’aauau pea le latou feso’ota’iga i ala o fautuaga, fa’atino nisi o talosaga mo ni nogatupe e toe fa’atupe ai nisi soso’oga pe o se fa’alautelega o le tautua, ma isi lava mea fa’apena.

 

O le fa’atasiga sa faia i le faletalimalo o le Tradewinds ia Novema 8, 2013, na vala’auina fa’apitoa ai e le SBDC nisi o nei kamupani laiti, ona ua iloga a latou taumafaiga, ma ua manatu fo’i ina ia taualoa e i latou.

 

O le latou fono fa’aletausaga lava lea, e masani ona filifilia fa’apitoa ai ni Kamupani Laiti ua agava’a mo ni fa’ailoga fa’apitoa e tapena i ai le SBDC. Ua fa’amalosi mai fo’i le ali’i o Thweat i le au faipisinisi, “Aua ne’i manatu se faipisinisi e i ai se limiti o le fesoasoani mai le matou ofisa mo i latou, e fa’aauau lava lenei fesoasoani, pe afai e iloga mai o lo’o fa’aaoga atili e le faipisinisi fautuaga ma fa’atino mea ua atofa e fa’atautaia ai lau pisinisi.”

 

I le fonotaga lea, sa fa’aalia ai se lipoti fa’amaumau a le SBDC i le aofa’i o se latou galuega ua fa’atino mai le tausaga fa’aletupe 2012. Ua iloga ai, na latou fesoasoani i le 18 pisinisi e fa’atula’ia ma ua mae’a ona fa’amauina, e toeititi lava atoa le miliona tala o le tinoitupe ua toe maua mai i a latou ia fesoasoani mai nei pisinisi uma.

 

E tusa ma le 75 avanoa faigaluega sa mafai ona ofo atu i tagata lautele mai ia galuega na fa’atula’ia e pisinisi nei ma ua o’o ai le faitau a’ofai e 45 pisinisi i le 2012. Peita’i, o le 2013 na toe fa’atula’ia ai le isi 14 pisinisi fou ae ua maua ai avanoa faigaluega mo nisi e 60. Na latou faufautua i pisinisi e 33 ma o nei galuega tima’i na maua mai ai le tinotupe e $230,000 e o’o mai i le taimi nei.

 

I le tausaga o lumana’i, ua fuafua i latou e fa’alautele atili le latou tautua, ma o le a so’ofa’atasi ai ma le ASG/DOC i lea fa’amoemoe ma ua tatau ai ona fa’atuina se isi lala fou mo i latou i le taulaga e fa’afaigofie ai lea fa’amoemoe lelei.

 

O le auga o lea ofisa fou, ina ia mautu ma fa’aleleia atili feso’ota’iga i le va o i latou ma pisinisi laiti ae maise i a latou poloketi e fia fa’alautele ai latou fefa’ataua’iga mai fafo ma i’u ai ina fa’aleleia atili le tamaoaiga o le atunu’u atoa.

 

Ua manatu le SBDC ina ia avea i latou o se so’otaga lelei i ala eseese e mafai ai ona fesoasoani mai le US Small Business Administration ma a tatou vaega ausage o le atunu’u e aofia ai sosaiete laiti e aofia ai vetereni, tina, pisinisi gaosi oloa fa’atau atu, tagata e le o atoatoa tino po’o le mafaufau, ma isi vaega laiti fa’apena.

 

Ua iloga mai, e mafai ona maua ni fesoasoani lelei mo fa’ato’aga, vaomatua, turisi, pisinisi faufale, pisinisi gaosi oloa, faleoloa si’iatoa, pisinisi inisiua ma isi fo’i pisinisi laiti e fa’apena e agava’a mo ia ituaiga o fesoasoani.

 

O fa’ailoga nei sa taua’aoina atu i le aso Faraile na te’a nei:

 

* Tisa Fa’amuli —Tisa’s Barefoot Bar

 

* Meafatu Ala Jr & Falanai M. Ala — Aniutea Koko

 

*  Dustin & Tumai Snow—Super Star Produce

 

* Tom Ho Ching & Kalatiola Fritz — Tiola's Creations and Distributors

 

*  Laufai "Rayne" Fanene — Cupcake Kisses by Rayne

 

O nisi nei o sui sa fa’alautele a latou pisinisi i lenei tausaga:

 

*  Ae Ae Jr and Ella Ae-Gurr— “Ae Designz”

 

* Mr. Iosefa & Leuila Ioane— Off Da Rock Tatoos

 

* Nina Fiamalua and Anthony T. Santos — EPN-Event Planning by Nina

 

fa’aliliu: Leua Aiono Frost

Comment Here