O le Aso Lulu na te’a nei na faia ai se faaiuga a le Pulesili o le LBJ ia Michael Gerstenberger, e faamalolo ai le Pulesili o le Vaega a le EMS, le afioga ia Galumalemana Fuapopo Avegalio, ma tuuina atu ai se tusi mai le susuga a Peseta Sa Mavaega, o ia lea o lo o faauluulu i ai le EMS, i le aso ananafi, Fepuari 7, e faailoa atu i ai le tofia o Soloi Lagoo e avea ma Pulesili le tumau o le EMS.I se vaega o lana tusi i tagata faigaluega uma a le EMS na taua ai e Peseta e faapea, “O lenei tofiga o le a aloaia i le taimi nei lava (aso ananafi, Fepuari 7 i le taimi na tuuina atu ai le tusi), sei vagana ua faasalalau le avanoa o le Pulesili a le EMS i totonu o le isi 30 aso.”I le faaiuga o le tusi a Peseta sa ia talosagaina ai tagata faigaluega uma a le EMS ina ia tuu atu la latou lagolago ia Lagoo e tusa ai o lenei tofiga fou.Ina ua fesiligia e le Samoa News i luga o le telefoni i le aso ananafi, sa lei finagalo Peseta e faaleo mai sona lagona e faatatau i lenei fesuiaiga, ae o le a foi se mafuaaga ogaoga ua ala ai ona faia faanatinati e le pulega a le LBJ lenei suiga.Na taua e Peseta e faapea, “afai e fia faamanino auiliili le mataupu, e na o le pulesili o le falema’i e maua mai ai se faamatalaga.”E lei manuia taumafaiga a le Samoa News mo le fesiligia o Gerstenberger e faatatau i lenei mataupu. Na asia foi lona ofisa i le aoauli ananafi peitai na faailoa mai e se tamaitai faigaluega sa i ai, o lo o auai atu Gerstenberger i sana fonotaga taua.Ae tusa ai o se faamatalaga mai se molimau na taua ai e faapea, o le aso ananafi na faia ai se fono a le pulega o le LBJ ma ni isi o Taitai o le EMS mo le faailoaina i ai o lenei mataupu.O ananafi foi na faia ai ma le faaiuga e sui le loka o le Ofisa na fa’aaogaina e Galumalemana.Sa le’i faamanuiaina foi taumafaiga a le Samoa News mo se fesootaiga ma le Ta’ita’i fono a le Komiti Faafoe o le LBJ, ae na taua e le afioga i le alii Faipule ia Faimealelei Anthony Allen, o se tasi o totino o le Komiti Faafoe fou a le LBJ lea na tofia e le kovana i ni nai vaiaso e le’i mamao atu, ua faateia o ia ona o lenei mataupu, ma ua foliga mai o lo o tula’i mai pea lenei mataupu i le aafia o alo ma tama fanau o le atunuu o lo o faatinoina tautua lelei mo le atunuu i tulaga faapenei, e pei o le faafuaseia ona faatula’i ese ma le galuega e aunoa ma le lapataia muamua e tusa ai ma ala o le tulafono, e le gata i lea, o le sui faafuase’i o le loka o le Ofisa e aunoa ma le talanoa faalelei i le tagata.“O le isi lea mafuaaga na matua ou tete’e ai i le faaiuga a le Pule o le LBJ, e tofi le Sini Inisinia a le Falema’i e faauluulu i ai le Vaega a le EMS, lea la ua tulai mai faaletonu faapenei, ae le mafai e le Inisinia a le Falema’i ona alu e aumai tagata o le atunuu pe a mama’i, e na o le EMS lava ma le latou tautua, e faiga foi o lo o faia i alo o le atunuu i le faafuaseia o faaiuga ma le sui faamalosi o loka o Ofisa, e foliga mai o lo o fai i meaola faiga nei,” o le saunoaga lea a le alii faipule ma lona siufofoga ua siisii i luga.Na taua e le molimau e faapea, ua maea ona logoina le alii Kovana ia Lolo Matalasi Moliga e uiga i lenei mataupu, ma ua sauni le alii kovana e tuuina atu sana tusi i le Pulesili o le Falema’i e uiga i lenei mataupu.