Ads by Google Ads by Google

Fa’amalamalama atili le “Financial Aid” mo fanau a’oga ASCC

Ua manatu le Ofisa o le “Financial Aid” i le Kolisi Tu’ufa’atasi, ina ia fa’amalamalama toto’a i fanau a’oga, ae maise fo’i matua, le tulaga ua i ai le fa’atupega o a’oa’oga a latou fanau i le vaitaimi o le Taumafanafana (Summer), e ala i le fesoasoani tau tupe (Financial Aid).

O le suiga tele ua i ai, ua fesuia’i le fa’atautaiga o le tinoitupe atoa mo le fanau aoga. Ua maua atoa le $5,550. i le tausaga mo vasega tau’ave i le afa muamua, afa mulimuli ma le taumafanafana fo’i.

O lona uiga, afai e ‘ave mataupu a le fanau i le afa muamua, fa’apea fo’i ana mataupu e fa pe lima i le afa mulimuli, ma ua mae’a ai le aofaiga o le seleni atofa mo ia mai lea alagatupe, ona le mafai lea ona toe avea ni ana vasega i le taumafanafana ae totogi e le ‘Financial Aid’, aua o lea ua mae’a lana tinoitupe i ana vasega ua mae’a tauavea.

Ae afai e totoe pea sana vaega tupe, e mafai ona tau’avea ana vasega mo le taumafanafana.

Afai la e mana’o le tamaititi a’oga ina ia fa’aaoga lana Financial Aid e totogi ai ana vasega o lea vaitau, e ao ina iloa patino e i latou, e to’esea mai fo’i lea i le aofaiga o tupe maua mai le afa muamua ma le afa mulimuli, o le tausaga a’oga.

Ua fa’ailoa mai e se sui o le Ofisa o le ‘Financial Aid’ a le ASCC, “E le fa’apea e le o maua se tupe e totogia ai vasega e fia ‘ave le summer, peita’i, e ao ina va’ai toto’a le tamaititi a’oga i le aofaiga o le totogi o ana vasega i le tausaga atoa, ma fuafua i ai ana vasega e ‘avea mo le tausaga atoa i le tatou Kolisi.”

E mafua ona i ai lea suiga, ona ua mae’a se isi vaega tupe sa maua fo’i mo le fanau mai i le malo tele e ta’ua o “Tupe mo le Tausaga atoa” [Year Round Pell].

O le tinoitupe lea sa fa’auia mai i le polokalama a le ARRA (American Recovery Reinvestment Act), ma e le o se fa’atupega sa fa’apea e fa’aauau ma tumau, peita’i, o lea ua mae’a lea alagatupe maua mo fanau a’oga, e ‘ese mai le latou $5,550 mai le Financial Aid, i le tausaga atoa e tasi.

I le faiga fou ua i ai nei, e ao i le fanau a’oga fa’apea fo’i matua, ona fuafua tatau lelei aofa’iga o le tupe e maua mo le fanau, ina ia mae’a totogi lelei a’oa’oga a le fanau. Ona o le taimi nei ua ta’i $100 i le ‘kereti’ [credit], ua e manatu e ‘ave au mataupu e fa e ta’i 3 kereti e maua ai, ona atoa lea o le 12 kereti, totogi aofai e $1,200.

O lona uiga, a mae’a lea, fa’aopoopo i ai ma pili o tusi ma isi mea sa e lisia ua atoa ai le $2,400. ua fa’aalu, o lo’o totoe pea le isi $3,100. mo le taumafanafana ma le afa mulimuli o le tausaga a’oga.

O le fanau a’oga fo’i e vave ona talosaga mo lea fesoasoani tupe ina ia a’e sa’o lava i le a’oga pe a mae’a le fa’au’uga ia Iuni, e tele atu le fesoasoani tupe na te maua aua o le a ia talosaga mo le tausaga fa’aletupe o le tausaga lea ua fa’au’u ai. O le amataga o le tausaga fa’aletupe e amata i le afa mulimuli o le tausaga, ae tomuli lea lava tausaga fa’aletupe e tasi i le taumafanafana.

O lona uiga, na te maua lava le tinoitupe mo le tausaga fa’aletupe atoa i le taumafanafana tonu lea e amatalia pe a uma lona fa’au’uga, peita’i, e te talosagaina lea fesoasoani a’o le’i mae’a au a’oa’oga i le a’oga maualuga, ma ulufale vave loa i le kolisi ia Iulai lava o le tausaga na e fa’au’u ai. O i’ina lava e mafai ai ona e tau’avea le 12 kereti mo le taumafanafana ae mana’omia le fa’amaoniga a’ia’i mai le sui faufautua.

Mo le tausaga a’oga lava lenei, o fanau a’oga uma lava i a’oga maualuluga e mafai ona  e fa’atumuina lau talosaga mo le financial aid i le initeneti pe a e talosagaina le 2011-2012 FAFSA ae o le talosaga fa’atumu e maua i le uepesite “http://www.fafsa.ed.gov”, ae o tamaiti a’oga e fia talosaga mo le financial aid e a’o’oga ai i le afa muamua o le tausaga fa’aletupe e amatalia ia Aukuso se’ia o’o ia Tesema e fa’atumu e i latou pepa mai le 2012-2013 FAFSA.

Pe afai e i ai ni mataupu e tau’avea e se tamaititi a’oga, ae le o lisia i vasega mo lau kosi o tauavea i le Kolisi, e le totogia na mataupu e le Financial Aid. Ia i ai le avanoa matagofie mo le fanau a’oga uma lava o lo’o fia malamalama atili i aiaiga ma tu’utu’uga o nei alagatupe e totogia ai e le fanau a’oga latou vasega tau’ave mo fa’ailoga i le tatou Kolisi e talanoa sa’o ai i le Ofisa o le Financial Aid i le tatou Kolisi i Mapusaga.

Ona ua tulata fo’i i le vaitau e lesitalaina ai vasega mo le taumafanafana o le a tatou o’o atu i ai, o le toe kuata fo’i lea e totogia i tupe o le tausaga a’oga 2011-2012, ua fa’atulaga lesitala mo tamaiti e fa’aauau latou kosi e tatala lea ia Aperila 16 se’ia o’o ia Me 10. O le lisi o vasega e mafai on tau’avea i lenei taumafanafana o le a fa’apipi’ia lea i luga i le aso 13 Aperila, 2012. Fa’ato’a faia le lesitala mo tamaiti fou, pe a mae’a le vaitami o fa’au’uga a aoga maualuluga, ae ua i ai lou taimi avanoa, talosaga nei loa sau FAFSA 2011-2012 pe a fia avea ni au mataupu i le taumafanafana o se tamaititi fa’ato’a a’e, e pei ona fautuaina ai outou i luga.

saunia: Leua Aiono Frost