Fa’amaise Lolo aiga o i latou to’a 34 na maliliu galulolo 2009

A’o sauni atu le atunuu e faamanatu le atoaga o le fa tausaga talu ona mavae le faalavelave faalenatura, lea na maimau ai soifua e to’a 34 i totonu o le atunuu i le aso 29 Setema, 2009, ina ua lulu se mafui’e malosi ma mafua ai le galulolo, na taua ai e le kovana sili i sana feau faamaise i aiga o i latou uma na maliliu le manatua pea e tagata o lenei faalavelave matuia.

 

“E ui ua fa tausaga talu ona tuana’i lenei faalavelave matuia ma o lo o taumafai foi aiga ma le malo e toe faaleleia vaega sa faaleagaina, o lo o faapena fo’i ona aafia o tatou loto ma agaga i manu’a ma lagona tiga sa aafia ai i tatou ona o lenei faalavelave,” o se vaega lea o le feua faamaise a le alii kovana ia Lolo Matalasi Moliga, mo aiga uma o i latou na maliliu atoa ai ma le atunuu atoa i le faamanatuina o le fa tausaga talu ona tulai mai lenei faalavelave.

 

O le aso Sa o le vaiaso nei, Setema 29, 2013 e atoa i ai le fa tausaga talu ona tuana’i lenei faalavelave.

 

Saunoa Lolo e faapea, e le gata sa faaleagaina meatotino a le malo ma tagatanuu, ae sili ai ona afaina lagona ma finagalo o aiga o i latou e to’a 34 na maliliu i lenei faalavelave, ma e le mafai ona faagaloina i latou i loto ma agaga.

 

I le toe tepa ai i tua i le mata’utia o lea aso, na taua ai e le alii kovana e faapea, o lo o faaauau pea ona manatua i lona mafaufau mea sa tupu ia te ia i le aso 29 Setema, 2009, ina ua ta e le galu muamua lana taavale i autafa o le fale talimalo o le afioga ia Mauga i Pago Pago, ma mafua ai loa ona tamo’e i le atoa i luga o le maota o Ernie Mulipola mo se lavea’i, e ala i lona oso i luga o se alavai tele lava.

 

“A’o tumau ai lagona tiga i o tatou mafaufau ona o lenei faalavelave, e aumaia e le Atua le auala e mafai ai ona foia nei tiga e tele, aua o lona Filemu na te aumaia le faalaeiau ma taumafai e aveese mea tiga o lo o aafia ai o tatou loto, ae aumai le filemu ia te i tatou,” o se vaega lea o le tusi a le alii kovana.

 

Ao sauni atu ai le atunuu e talosia aiga uma o i latou na aafia i lenei faalavelave, e tatau foi i le atunuu ona faafetaia le Atua i lona aao taitai ma lana laveaiga i luga o Amerika Samoa, e pei ona taua e le alii kovana i lana tusi.

 

“O se lesona tatou te aoaoina mai i lenei faalavelave, o le ofoofogia ma le malosi o le loto fesoasoani o tagata, tatou te faafetaia ai le Atua ona o lea meaalofa ua aumaia ia te i tatou, e mafai ai ona tatou faagalo i tiga ma le matuitui o le manu’a sa tatou aafia ai,” o le isi lea vaega o le tusi a le alii kovana.

 

Na faaiu le feau faamaise a le alii kovana i lona ofoina atu lea o upu faalaeiau ma upu faamalosi i aiga ma uo o i latou uma na maliliu i lenei faalavelave, ma ia avea pea lenei faalavelave o se faamanatu i le atunuu, ina ia nonofo sauni i so o se taimi e tulai mai ai faalavelave faalenatura faapenei.

 

“Ia manuia la outou malaga, e le galo outou i o matou loto,” o saunoaga faaiu ia a le alii kovana mo i latou e toa 34 sa maliliu i le galulolo.

Comment Here