Ads by Google Ads by Google

Fa’aliga Poloketi Fa’asaeanisi A’oga Maualuga

Sa fa’atumulia le Lee Auditorium i Utulei i galuega fa’atino fa’asaeanisi a le fanau a’oga i a’oga maualuluga uma i le teritori, e aofia faatasi ai a’oga a le malo ma a’oga tua. O nei galuega fa’atino e fa’atauva i togi ma le mae’ae’a o le tapenaga a le tamaitiiti a’oga e tusa o le ‘auga o lana poloketi fa’asaeanisi.

 

O le aso ananafi, e patino le fa’aaliga atoa mo le ‘au fa’amasino ina ia fa’atalanoa ta’ito’atasi le fanau a’oga, ia fa’amatala le ‘auga o lana su’esu’ega, o le manulauti o le poloketi fa’atasi ai ma le sailiga auiliili na faia, ia mautu atili ai ana fa’ai’uga ua folasia.

 

I lenei tausaga, ua fa’ailoa mai e le sui o le Komiti o le Science Fair a a’oga maualuluga, “E silia ma le selau poloketi fa’asaeanisi ua fa’aalia, fa’afetai tele ai i a’oga maualuluga ona o le naunau e saili tomai fa’asaeanisi, ma fa’alautele atili le malamalama o le fanau i lea mataupu aoga tele.”

 

I se va’aiga lautele i nisi o galuega fa’asaeanisi sa fa’aalia:

 

O Niko Tupuola o le Vasega 10 mai Tafuna High sa fa’aalia lana galuega fa’atino e fesiligia ai, “Pe mata e moni e vave le mumu a le Moliga’o Pa’epa’e nai lo isi uma Lanu?” O le tali o lana sailiga, e moni lelei, ma ua tele fo’i mau ua ia saunia mo lana lea folasaga.

 

O le sailiiliga ma su’esu’ega fa’aautu a le tama’ita’i o Ali’itasi Ah Sui mai Manu’a High School o le vasega 12, ua taumafai e iloa lelei, pe aisea e vave ai tele le ola a le isi ituaiga talo mai le tasi?

 

O le poloketi a le Jemima Nafatali o le vasega 10 mai Fagaitua sa fa’ailoa mai ai, “Texting po’o le omiomi o feso’ota’iga talanoa i luga o telefoni e sili ona avea ai lou mafaufau ma le taimi nai lo talanoa?” O le tali o le sailiga e alu uma lava lou mafaufau, o lau fa’alogo, oti ai ma lou iloa o se mea o a’oa’oina mai, pe a o’o ina e faia le text, ae feololo mai ai le talanoa.

 

O se sailiga a le tama’ita’i o Charu Joserose mai Tafuna High vasega 11 sa ia fa’ao’o mai ai se auala e mafai ai ona toe fa’aleleia Kapisi a Saina lea ua fa’asaina. O se tasi lea sailiga mae’ae’a ua va’aia i galuega fa’atino o lenei tausaga, ae pule lava ali’i ma tama’ita’i fa’amasino.

 

O le poloketi a le tama’ita’i o Elizabeth Thompson mai Tafuna High vasega 12, sa ia taumafai ai e fa’ao’o mai se fa’ai’uga o lana sailiga pe o aoga vaila’au ua fa’aaogaina e fa’ape ai le “Sisi Aferika”. O le i’uga o lana sailiga, e aoga aua e tele na’ua sisi ua mate ma le toe fa’atupula’ia ina ua fa’aaogaina e ia le “Nerium Indicum & Biden Pilosa.”

 

O le tama’ita’i o Ambika Murall vasega 11 a Tafuna High sa ia fa’atusatusa ai le vave tutupu ma fua mai o pepa faimea’ai pe afai sa fa’afeusua’ia ona ituaiga, ma pepa e le’i faia i ai se galuega fa’apena e tagata toto la’au. O le tali, o pepa e fa’afeusua’ia e tagata i ona ituaiga eseese, e vave ona fua mai ma vave fo’i le tutupu.

 

O le poloketi a Jason Eary vasega 10 mai Fa’asao Malisi High, sa ia fa’ailoa mai ai se ala e afua ai ona papa ni mea’ai ‘apa pe afai e fa’avevela ma le atigi apa. Peitai a toe taumafai oe e fa’amalulu i le pusa ‘aisa, ona pa lea pe afai e le o tau lelei le momono. Sa fa’amatala e ia le ea ua vevela ae fetaui ma le ‘ea ua malulu tele.

 

O le alii talavou o Edwin Tolentino, vasega 12 mai Nuuuli VocTech sa ia fa’atino le galuega fa’asaenitisi “O le fagu e te maua ai le Malamalama, o le gaosiga o le Matauila Solar!”  Matagofie tele lea galuega fa’atino, ma o se ala e maua ai sau matauila e le totogia ai sau pili, ae fa’aaogaina ai le malosi’aga mai le La.

 

O Adrian Baqui Level 10 sa ia fa’atinoa se galuega fa’atino “Robotics & Electronics” i le vaega a le Mechanics & Engineering o le fa’aaliga fa’asaeanisi mo fanau a’oga maualuluga i le teritori.

 

O afaina o le olaga ma le siosiomaga o mea ola uma e o’o i ai se suau’u masa’a, o le galuega fa’atino lea na faia a Michelle Miller vasega 9 mai le South Pacific Academy.

 

Ae o Taylor Jessop o le SPA vasega 12 sa ia fa’atinoa se galuega fa’asaeanisi e fa’ailoa ai, “Pe mafai e le Ava Niu Kini a Samoa ona tape nisi o iniseti fa’alafua o lo’o ola i le atunu’u?” O le tali e matua aoga lava le ‘ava niu kini i lea fa’amoemoe.