I le fa’ai’uga o le vaiaso na te’a nei, i le afiafi o le aso Sa, e mautinoa lava na fa’atama’ia ai fo’i e tupulaga talavou le mutia o le Malae Tapolo e aofia ai le Malae mo le #3, #7, #11 ma le #12, o le malae lea e latalata i le itu o lo’o motusia le pa uaea, ae ua na’o le pa aute e mafai lava ona feosofi mai ai i totonu tagata ma meaola.

“Ona o le Malae e le o so’o lona pa o si’omia ai, o lea e faigata ai ona puipuimalu mai fa’aletonu fa’apenei le mutia o lea itu o le Malae Tapolo i Iliili.” O se saunoaga aloa’ia lea a Lefiu Bill Kalasa, lea e avea ma fa’atonu o le Sports Complex lea fo’i e aofia ai ma le Malae Tapolo i lana pulega.

“Ona o lenei mea e tupu so’o, peita’i e le fiu le tagata fa’amaoni e faia lona tiute, ae o le augani mai i le mamalu o le afio’aga, pe o so’o se tasi fo’i e va’aia e i latou nisi o le tupulaga o lo’o maulu i totonu o le lotoa a le Malae Tapolo ma faia ai ni ta’aloga lakapi, pe fa’ase’e fo’i i lologa o timuga, fa’amolemole, vala’au leoleo ina ia fa’autagia le o’o atu e tusia ni a latou fa’amatalaga, ona ua sopo tuaoi i latou i totonu o le Malae e fa’asa o le Malo.”

O le talosaga lea a le susuga le fa’atonu, aua ua toe tele le isi galuega ua toe faia nei, ma ua tatalia fo’i le toe tutupu lelei o le mutia ona fa’ato’a toe fa’aaogaina lea o le malae mo ta’amilosaga tapolo, po’o ta’aloga fa’asamasama noa fo’i e maua ai le tupe mo le tatou malo.

Ua fa’ailoa mai e le susuga le Fa’atonu Lefiu Kalasa, “Sa vala’au leoleo ina ia o’o mai e faia se lipoti o lea fa’atama’iga i le mutia o le malae, peita’i, e o’o mai lava i le aso Lua lenei e le’i maua se avanoa o ali’i leoleo e faia ai se lipoti, o le ala lea ua vala’au atu ai le fesoasoani a le vasega o fa’asalalauga e fa’aalu ai lenei ata, ma se tala ia utagia maia e le mamalu o le afio’aga le augani a lenei aufaigaluega, ia alofagia, taofi le fanau mai le osopa mai i totonu o le malae tapolo ma fa’aleaga le mutia e pei ona va’aia nei!”

Ua mae’a ona fa’asalalau i le lomiga fa’aperetania lea ata, fa’atasi ai ma le isi ata ua mae’a toe faia le galuega a le aufaigaluega e toe fa’aleleia ai le malae, peita’i, e fai si tuai ona toe ola lelei le mutia ma aoga ai lea laufanua mo le ta’aloga tapolo.

Uamea o lo’o fa’aaoga i le tagapolo e ta’u o le OP lea ua tase’i u’amea nei ae ua tatui ai le malae, ma ua foliga mai o se tasi o taumafai e toto se ma’umaga. Peita’i, o U’amea nei e fa’aaoga i le taimi o le ta’aloga tapolo, e maka ai laina e fa’atatau i le ta a le tagata tapolo.

O le fa’alalolaloga a lea fa’atonu, ona e le’i mafai i le taimi nei ona fa’atupe se pa e fa’amae’a ai oan si’o le malae tapolo, ia alofagia aiga o lo’o maimoa mai i nisi o fanau e faia nei tulaga, po’o nisi fo’i e feoa’i atu ae matauina ni faiga o faia i totonu o lea malae ae ua manava galuega, ia alofagia, vala’au le Ofisa o Leoleo e lipotia i ai, pe matau fo’i i latou ae fa’ailoa sa’o lava i le fa’atonu ma le matagaluega i le latou telefoni o lisia i telefoni a le Malo: Samoa Complex.