Ads by Google Ads by Google

Fa’alauiloa Talomua Aumaga o le Faleituau afioaga Malaeloa

Na maofa le mamalu o le auvalaaulia sa aofia ai i le faalauiloaina o le Talamua a le Aumaga o le Faleituau a le afioaga o Malaeloa i le aso Faafetai na te’a nei, ina ua latou molimauina le lapopo’a o talo na mafai ona faalauiloa i lenei faamoemoe.

O le maofa tele o le auvalaaulia na tulai ai loa le Faatonusili o le Matagaluega o Faatoaga a le malo, le tofa Lealao Mel Purcell ma ia saunoa e faapea, “e sili atu le lapopo’a o talo ia ua ou vaai ai i le aso lenei, nai lo tala o lo o faatau atu i le polokalame o le School Lunch a le Ofisa o Aoga a le tatou malo, o le mafuaaga lea ua ou talosaga atu ai i le Aumaga o le Faleituau, faamalolosi pea e toto le talo.”

Na o gatasi le saunoaga a le afioga i le Faatonusili ma fuaitau na tomua ai le saunoaga a le Feagaia o le Ekalesia Metotisi a le afioga na taitaia le sauniga e faapaia ai lenei faamoemoe, susuga Rev. Asiata e faapea, “e tasi lava le mafuaaga ua ala ai ona manuia le faamoemoe a le Aumaga, leaga e lima ola le tagata Amiotonu.”

O se sauniga puupuu na taitaia e le susuga Rev. Asiata e faapaia ai le faalauiloaina o le Talomua a le Aumaga o le Faleituau, na tatala aloaia ai le faamoemoe, ona sosoo ai loa lea o le ava e faafeiloa’i le mamalu o le auvalaaulia tainane sui o le malo sa molimauina lenei faaoemoe.

O le tofa a Nanai Afuola Kalasa sa fai ma fofoga o le aso, o ia foi lea na saunoa e otooto le mafuaaga o ituaiga sauniga faapenei i le tala faasolopito mai o Samoa mai anamua.

Na taua e se sui o le afioaga le afioga ia Toilolo e faapea, ua lua tausaga talu ona tapena mai lenei faamoemoe, ona o le agaga autu o tama o le afioaga, ia unaia le aumaga e gagau le vao ma toto faatoaga e tua i ai aiga ma le afioga.

Ae na taua e le afioga i le Faatonusili e faapea, i le aso na ia asia ai faatoaga a le afioga i Malaeloa, o le ma’umaga a le alii pulenuu na muamua oo i ai lana asiasiga, ma o se tulaga na faateia ai o ia, ina ua ia maitauina, e uumi atu talo o le ma’umaga ia te ia, a’o ia e 6futu ma nai inisi lona umi, ma o se molimau na tali ai le toatele o tagaa sa auai i lenei faamoemoe.

Talu ai tulaga mataina o le ma’umaga a le pulenuu, na aisi ai loa le Faatonusili pe maua atu ni tiapula se’i toto i le nofoaga autu o le Ofisa o Faatoaga, ma o le moilmau a le tofa ia Lealao, o tiapula ia na avatu i Malaeloa, ua salalau solo i le atunuu i le toatele o le aufai faatoaga o lo o i ai, ma ua oo atu foi i Ofu ma Olosega.

Ae i se otootoga o le tiapula lea e faaigoa o le “talo mumu” lea na faalauiloa ai le Talomua a le afioaga ananafi, na taua ai e le alii pulenuu ia Gaoa e faapea, e tolu lava tiapula na sau ma ia mai Upolu i le 2009, ona faaaoga lea e lona aiga le aano o le talo ae ua ia totoina le tiapula e faafailele.

“Ina ua ola le tiapula, sa maua mai ai isi tiapula e 50, o lea na ou tufatufaina atu ai loa i le aumaga ma le talitonuga, o le a latou toto i a latou faatoaga,” o le saunoaga lea a Gaoa.

Mai le aumaga atoa sa lesitala o latou suafa i le faamoemoe o le Talomua a le afioaga, o lo o filo ai lava se tamaitai se toatasi e pei ona saunoa Gaoa.

Na faafetaia e le Faatonusili le afioaga e tusa ai o le faamoemoe, faatasi ai ma lana fautuaga ina ia toto pea le talo.