A’o lumana’i ai le fa’atautoina o le Kovana Sili ma le Lutena Kovana i le itula e 12:00 o le aso, o le aso ananafi na faamaonia mai ai e le Taitai o le Ofisa o le Kovana Sili ni isi o tofiga ua maea ona faia mo le Ofisa o le alii kovana.

O le itula e 12:00 o le aoauli nei e amata aloaia ai le nofoaiga a le tofa a Lolo Matalasi Moliga ma le afioga a Lemanu Peleti Mauga, e avea ma kovana sili ma le lutena kovana o le malo o Amerika Samoa mo le isi fa tausaga, ae faamutaina ai le tautua a le afioga i le matua ia Togiola Tulafono ma le tofa Faoa Aitofele Sunia.

O ni isi o tofiga fou, ua aofia ai le avea o Fiu Johnny Saelua ma Taitai o le Ofisa o le Kovana (Chief of Staff), ae lagolago i ai Taimalelagi Minnie Tuia.

O le Faufautua Sili mo le alii kovana, ua tofia i ai le tamaitai foma’i ia Dr. Oreta Crichton, ae o Solomona Aoelua ua tofia e fai ma Fesoasoani Faapitoa i le lutena kovana, faatasi ma Papalii Marion Fitisemanu ae o Sally Faumuina lea ua tofia e fai ma Failautusi a le Lutena Kovana.

Ae o lo o faatalitali pea tofiga o Faatonusili ma Faauluuluga o Matagaluega ma Ofisa Tumaoti a le malo.

E na o le tasi lava le tofiga ua maea ona faalauiloa, o le filifilia lea o le afioga ia Afoa Moega Lutu e avea ma Loia Sili.

O le isi tofiga o lo o faamoemoe le alii kovana e faalauiloa i se taimi lata mai, o le Failautusi o le Ofisa o Mataupu Tau Samoa.

O le toatele o i latou e i ai agavaa i le faatinoina o galuega i totonu o le malo, ua maea ona tuuina atu a latou tusi talosaga i le komiti o lo o iloiloina i latou e agavaa mo tofiga taitasi, a’o le’i tuuina atu la latou fautuaga i le kovana ma le lutena kovana mo le filifiliga faai’u.

fa’aliliu Ausage Fausia