Ads by Google Ads by Google

Fa’alauiloa isi tofiga fou a le alii Kovana Sili

E ese mai i tofiga e tolu ia ua maea ona faalauiloa e le afioga i le Kovana Sili, le tofa a Lolo Matalasi Moliga mo Ofisa e tolu a le malo, o le ulua’i Fono lana Kapeneta i le aso Faraile na te’a nei i le itula e 9:30 i le taeao, na faalauiloa ai e le tofa a Lolo isi ana tofiga fou e tolu.

O ia tofiga fou a Lolo e aofia ai le filifilia o le tofa a Le’i Sonny Thompson e avea ma Faatonusili o le Matagaluega o Tagata Faigaluega a le malo (Dept. Human Resources); o le susuga a Iuniasolua Savusa e avea ma Faatonusili o le Matagaluega o le Puipuiga Faalotoifale (Dept. Homeland Security), ma le susuga ia Falema’o Dr. Phil Pili e avea ma Teutupe a le malo (Treasurer).

Na taua e se Faatonusili le Tumau i le Samoa News e faapea, o i latou nei e toatolu ua maea ona tofia, ua faagasolo a latou suesuega faapitoa e tusa ai o agavaa, a’o le’i tuuina atu aloaia i ai tofiga e galulue ai.

O le aso o le Faauuga o le kovana ma le lutena kovana, na faalauiloa ai e Lolo ana ulua’i tofiga e tolu mo Ofisa e tolu o le malo,  aofia ai le afioga Afoa Suesue Lutu e avea ma Loia Sili, o le afioga ia Satele Galu Satele e avea ma Failautusi o le Ofisa o Mataupu Tau Samoa, ma le susuga a William Haleck e avea ma Komesina o le Matagaluega o le Puipuiga o le Saogalemu Lautele.

I le ulua’i Faatonuga Faalaua’itele #0001-13 na sainia e le alii kovana i le aso 4 o Ianuari, sa ia tofia ai Faatonusili le Tumau ma Matagaluega ma Ofisa e 21 a le malo, ma le faamoemoe o ia tofiga o le a le tumau ai i latou nei, ae faamutaina i le taimi e maea ai ona tofia Faatonusili lautogia mo ia Ofisa o le malo.

O i latou uma ua tofia i tulaga o Faatonusili le tumau, o ni isi o i latou sa avea ma sui faatonusili i le nofoaiga ua maea atu nei, ae o ni isi foi sa galulue ai i totonu o Ofisa nei o le malo.

O ni isi sa avea ma sui faatonusili ae o lea ua tofia e avea ma faatonusili le tumau e aofia ai Fale’osina Voight mo le Matagaluega o Galuega a le malo; Chris King mo le Pulega o Uafu ma Taulaga; Salu Tuigamala mo le TOFR; Lelei Peau mo le Matagaluega o Fefaatauaiga ma Alamanuia; Peter Gurr mo le Ofisa o Faatoaga; Pa’u Roy Ausage mo le Ofisa o Tina ma Tupulaga Talavou ma Muavaefaatasi J. Suisala i le Ofisa o Tautua Lautele.

O le vaiaso nei lea ua faamoemoe e faauau ai isi tofiga a le alii kovana mo tofi faatonu, ma tuuina atu ai loa i le Fono Faitulafono mo le faamaoniaina, pe afai ae tauaofia le Nofoaiga lona 33 a le Fono i le aso Gafua o le vaiaso fou.

I lalo o le tulafono, e tatau ona faamaonia uma e maota e lua a le Fono tofiga taitasi a le alii kovana, ona faatoaga agavaa lea o se sui mo le galuega.