Fa’alauiloa isi tofiga fou a le alii kovana

O le vaiaso na te’a nei na faalauiloa ai e le afioga i le kovana sili ia Lolo Matalasi Moliga, nisi o ana tofiga mo nisi e galulue i le Komiti Faafoe a le Ofisa o le Vaega Tosovaa, faapea ai ma le Komesina o le Vaega o le Inisiua i totonu o le ofisa o le alii kovana.

 

O nisi o tofiga a Lolo e aofia ai lona tofia o Tau Tanuvasa e avea ma Komesina o le Inisiua, faapea ai Uso Lagoo ma Liu Siakisone Liu e avea ma totino o le Komiti Faafoe o le Vaega Tosovaa i Satala.

 

KOMITI FAAFOE VAEGA TOSO VAA

 

I se tusi a Lolo i le aso 19 Novema, sa ia faalauiloa ai lona tofia aloaia o Liu ma Lagoo e avea ma totino o le Komiti Faafoe a le Vaega Tosovaa i Satala.

 

Na taua e Lolo i se vaega o lana tusi e faapea, o le tofa Liu sa tautua i le malo o Amerika Samoa mo le 25 tausaga, i le Matagaluega o Uafu ma Taulaga, ma a’o tautua ai o ia i lea vaega o le malo, sa ia umia se tulaga maualuga faavae lea i lona tomai ma le agavaa, mulimuli ane filifilia o ia e avea ma sui faatonusili o le matagaluega.

 

O le tofa Liu o le a sui tulaga i le tulaga na tauave e le afioga Unasa Leroy Ledoux, lea sa avea ma totino o le  Komiti Faafoe, a’o lea ua ia taliaina se avanoa e faigaluega tumau ai mo le malo.

 

O agavaa o lo o ia Liu e aofia ai tulaga tau pisinisi aemaise ai tulaga faataitai i le itu tau i le tamaoaiga, ma o nei agavaa o le a fesoasoani malosi lea i lana galuega ua tofia ai o ia i le taimi nei.

 

E talitonu le alii kovana, o le a avea le i ai o Liu i le Komiti Faafoe a le Vaega Tosovaa ma itu o le a fesoasoani ai i le faatautaiga o galuega faatino a lea foi vaega a le malo.

 

Ae i le filifilia o le tofa Uso e avea ma totino o le Komiti Faafoe, na taua ai e Lolo e faapea, o Uso o le a sui tulaga i le avanoa na tauaveina e Leilua Stevenson, lea ua galue tumau i le kamupani a le Samoa Tuna Processing, o se lala o le kamupani i’a o le Tri-Marine.

 

O Uso ua malolo litaea mai i vaega au a le malo tele sa tautua ai mo le silia i le 20 tausaga, lea ua toe foi mai e tautua i lona atunuu.

 

Ina ua toe taliu mai Uso i le atunuu ma lona aiga, sa faaee atu ai loa ia te ia le suafa Uso i lona aiga ma tautua ai loa i le tofiga o le Pulenuu mo le 10 tausaga, ma ia tautua malosi ai i le faamamaina o le siosiomaga o lona afioaga i Fagaalu, i lalo o ni fesoasoani tupe mai le feterale sa tauala mai i ofisa ma matagaluega a le malo.

 

E talitonu Lolo, ua lava le tomai ma le agavaa o lo o ia Uso e mafai ai ona avea o ia ma totino o le Komiti Faafoe.

 

KOMESINA MO LE VAEGA O INISIUA

 

I se tusi na tuuina atu e Lolo i Faatonusili o Ofisa ma Matagaluega uma a le malo i le aso 21 Novema, 2013 sa ia faalauiloa aloaia ai lona tofia o Tau Tanuvasa e avea ma Komesina o le Vaega o Inisiua, ma o lea tofiga na amata aloaia i le aso ananafi.

 

Na taua e Lolo i lana tusi e faapea, i lona tofia ai o Tanuvasa na te tauaveina lenei tofiga, o le a ia faatinoina tiute uma ma galuega o lo o faataoto mai e le tulafono e tatau ona faia e le Komesina o le Vaega o le Inisiua.

 

O le ofisa o le susuga Tanuvasa o le a i ai lea i luga o le ofisa o le alii kovana, i le maota o le malo, le EOB i Utulei.

 

Comment Here