Fa’alauiloa e Aumua Amata lana aufaigaluega i Amerika Samoa nei

O le aso Gafua na te’a nei, na tu’uina mai e le sui faipule tofia a le atunu’u mo le nofoa i le konekeresi i Uosigitone ia Aumua Amata, le lisi o lana aufaigaluega e galulue ma puleaina lona Ofisa i le teritori nei o Amerika Samoa, faapea ai ma lona ofisa i le laumua i Uosigitone.

 

Na taua e Aumua i se pepa o fa’amatalaga mai le laumua i Uosigitone, lona filifilia o Leafaina ‘Ina’ Tavai Yahn e fa’auluulu i ai tagata faigaluega mo lona ofisa i Uosigitone, ae o le afioga i le matua ia Pulu Ae Ae Jr o le a fa’auluulu i ai le Ofisa i Amerika Samoa nei.

 

Saunoa Aumua e fa’apea, o se tasi o itu taua i le soifuaga fiafia o Tavai, o ia lava le ulua’i Samoa na aoaoina i le Iunivesite a le Unite State Military Academy i le aai o West Point i Niu Ioka, ma fa’au’u mai ai o ia ma le fa’ailoga o le ‘Bachelor of Science degree i le 1989, atoa ai ma se fa’ailoga taua mai le vaega a le ‘US Army Ordnance Corps.

 

O le masina o Novema na te’a nei na malolo litaea mai ai Tavai i le tofiga o le colonel.

 

Na taua e Aumua le fa’agae’etia o lona loto ina ua fetaui lava le malolo litaea mai o Tavai, ae talafeagai ma le filifilia o ia e le atunu’u i le nofoa, lea ua maua ai loa ma le avanoa e ofi atu ai o ia i galuega o lo o fa’atinoina i totonu o le konekeresi, e fa’amasani ai i auala uma e fa’atinoina ai lea tautua, ao lei aapa atu pisinisi tua e galulue fa’atasi ma ia.

 

Na taua fo’i e Aumua le lava o le tomai o lo o ia Tavai, e agava’a ai ona avea o ia ma tagata e umia tulaga fa’ata’ita’i e pei ona ia tofia i ai o ia.

 

O le galuega mulimuli lava sa galue ai Tavai a o le’i malolo litaea mai o ia, o le tulaga o le Deputy Chief of Staff mo le vaega a le Militeli e taua o le ‘Logistics (G-4) mo le vaega a le ‘First Army i le Rock Island Arsenal i le setete o Illinois.

 

Ao lei tofia o ia i le tofiga mulimuli lea e pei ona taua e Aumua, sa tofia o ia e taitai i le vaega a le ‘404th Army Field Support Brigd.

 

E ese mai i lona faailoga tikeri o lo o i ai, e i ai fo’i lona fa’ailoga i tulaga tau i le puleaina o pisinisi (Executive Masters in Business Administration - EMBA) mai le kolisi o Benedictine i Atchison i Kansas, ma le master of Arts Degree mai le ‘National Security’ ma le ‘Strategic Studies’ mai le kolisi o le US Naval War College i Newport, i Rhode Island.

 

O le filifilia ai e Aumua o le afioga i le matua ia Pulu e fa’auluulu i ai le Ofisa i Amerika Samoa nei, lea ua faamoemoe e fa’atu i le Fagatogo Square i Fagatogo, sa faavae mai lea i luga o le talitonuga o le tama’ita’i faipule mo le Konekeresi, o Pulu o se tasi ua lava lona tomai i tulaga fa’ata’ita’i.

 

O le afioga ia Pulu, e le gata sa avea ma Ta’ita’ifono o le Komiti o le fa’amoemoe a Aumua, ae o ia fo’i o lana faufautua sinia, o se tasi fo’i e fa’aaloalogia e lona afioga o Pago Pago atoa ai ma le Itumalo o le Maoputasi.

 

E tele tausaga sa avea ai Pulu ma faipule mo lona afioaga o Pago Pago i le maota o sui o le Fono Faitulafono, sa avea fo’i o ia ma se tasi o sui faapitoa e gafa ma le vaavaaia o tulaga tau atina’e i aoga, i lalo o le faigamalo a Lolo ma Lemanu.

 

O ia fo’i o se tasi ua malolo litaea mai i vaega au a le malo tele o Amerika sa tautua ai, e pei fo’i o Tavai lea ua filifilia e fa’auluulu i ai le ofisa i Uosigitone.

 

Na taua e Aumua e fa’apea, o le to’atele lava o lana aufaigaluega o le a fa’amautu i Amerika Samoa.

 

“O la matou galuega e aofia ai le galulue fa’atasi ma itumalo i totonu o le atunu’u, e matua ou mana’omia ai lava se tasi e tai pei o le afioga ia Pulu, e malamalama i manaoga ma itu uma e tali atu ai i manaoga o le atunu’u atoa, ia avea fo’i o se tagata e mafai ona ia foia fa’afitauli e pei fo’i o le afioga ia Pulu”, o se vaega lea o le saunoaga a Aumua.

 

Sa ia taua fo’i e fa’apea, o le ulua’i taimi fo’i lenei o le a leai ai se tasi mai Amerika Samoa nei, e malaga atu ma galue i le ofisa i Uosigitone.

 

“Ou te le mana’o e avea lena tulaga ma fa’afitauli tau tupe i le tatou ofisa i Uosigitone, pe afai e malaga atu se tasi mai Amerika Samoa nei ma aumau i Uosigitone, le nofoaga o lo o pito sili ona maualuga le tau o le soifuaga o lo o i ai, aemaise lava i tulaga o fale nofo, e le gata fo’i i lea, e le o i ai ni alauni e mafai ona ofo atu e le ofisa e totogi ai tagata e malaga ma galulue i Uosigitone”, o se vaega lea o le saunoaga a Aumua.

 

Saunoa Aumua e fa’apea, e le gata e leai ni livi faapitoa mo lea tagata faigaluega, ae tulaga maualalo fo’i totogi e pei ona fa’atulagaina e le malo ma le feterale.

 

Fai mai Aumua, o se lagona fa’agaeetia ia te ia le toatele o tagata o lo o naunau e fia galulue i le ofisa i Amerika Samoa nei, e le gata e mafai ai ona fa’atino le auaunaga mo le atunuu, ae o le nofoaga tonu lava lea e talafeagai ai ituaiga auaunaga nei mo le atunuu.

 

Mo le aufaigaluega i Uosigitone e pei ona saunoa Aumua, ua tofia faapitoa i ai tagata ua i ai le tomai i tulaga tau fesootaiga, faapea ai mataupu i tulaga tau pisinisi, fitafita tuai, puipuiga o le gataifale, atoa ai ma mataupu tau i le va i fafo.

 

O le aso 6 Ianuari lea ua faamoemoe e faatauto ai Aumua i luma o le konekeresi a le malo tele, o le aso foi lea ua faatulaga e tatala ai lona ofisa mo maimoaga a le atunuu o lo o maua le avanoa e autova’a atu ai e maimoa.

 

fa’aliliu Ausage Fausia

Comment Here