Ads by Google Ads by Google

Fa’alauiloa aloaia lisi o ‘au ta’aalo mo Ta’aloga Pasefika i Papua

O le aso Lulu o le vaiaso nei, aso 3 Iuni 2015 na tapunia aloaia ai le tu’uina atu o lisi a ‘au ta’aalo uma lava ua fa’amoemoe e tausinio i Ta’aloga a le Pasefika i Papua Niu Kini i le masina fou, ma fa’alauiloa aloaia mai ai loa e le Ofisa o le Komiti Fa’afoe o Ta’aloga a le Olimipeka a Amerika Samoa (ASNOC) le lisi o le ‘au ta’aalo a le atunu’u mo lea fa’amoemoe.

 

E tusa ma le to’a 84 le aofa’i o ‘au ta’aalo o le a fai ma sui o Amerika Samoa i ta’aloga eseese e 9 lea ua fa’amoemoe Amerika Samoa e tausinio ai i Ta’aloga i Papua.

 

E tusa ai o ripoti mai le Ofisa autu o Ta’aloga a le Pasefika i Papua, e silia i le to’a 4,000 ali’i ma tama’ita’i ta’aalo mai atumotu eseese e 24 o le Pasefika, o le a tausinio i ta’aloga eseese 28 ua fa’amoemoe e fa’atautaia i Papua.

 

O le ulua’i taimi lenei ua tausinio ai atunu’u tetele o Niu Sila ma Ausetalia o lo o i totonu i le Vasa Pasefika i Ta’aloga a le Pasefika, ma ua avea ai loa Ta’aloga i Papua i le masina fou, o se auala lea e aga’i atu ai ‘au ta’aalo mo ta’aloga a le Olimipeka mo le taimi muamua.

 

Mai ta’aloga e 28 o le a fa’atautaia i Papua, e na o le 4 lava ta’aloga o le a avea ma ta’aloga e saili ai avanoa o ‘au ta’aalo mo le Olimipeka i le 2016, o ia ta’aloga e aofia ai le si’isi’i u’amea mamafa; soka, taekwondo ma le lakapi ta’ito’a 7.

 

Mo ‘au ta’aalo a Amerika Samoa, e na o le ta’aloga si’isi’i u’amea mamafa lava le ta’aloga o lo o tausinio ai ana ‘au ta’aalo, mai le lisi o ta’aloga e 4 ua fa’amoemoe e fili mai ai ni isi e tausinio i le Olimipeka.

 

E to’a 81 le aofa’i aloaia o le ‘au ta’aalo a Amerika Samoa mai ta’aloga e 9 o le a tausinio ai, o lea ua fa’amaonia mai o le a malaga mo Ta’aloga i Papua, o i latou fo’i ia ua mae’a ona tu’uina o latou suafa mo le lisi o ‘au ta’aalo uma o le a tausinio i le masina fou.

 

E le o aofia ai i lea lisi Faiaoga ma sui o le malo o le a malaga fa’atasi e tapuaia le alo faiva a tama fanau o le atunu’u i ta’aloga a le Pasefika.

 

O i latou nei e aofia ai le to’a 24 mo le ta’aloga Basketball; to’a 6 mo le ‘au Si’isi’i u’amea mamafa; toa 4 mo le Beach Volleyball; to’a 3 mo le ‘au Teuteu Tino (Body Building); to’a 5 mo le ‘au Tapolo; to’a 3 mo le ‘au A’au; toa 7 mo le ‘au Tenisi; to’a 15 mo le ‘au Volleyball ma le to’a 17 mo le ‘au Baseball.

 

I le toe 28 ai aso o lo o totoe ona amata aloaia loa lea o Ta’aloga a le Pasefika i Papua, ua talosagaina ai e le Peresetene o le ASNOC, susuga Victor Langkilde le mamalu o le atunu’u, ina ia alofagia e le atunu’u le sauni atu ai o ana tama fanau, e fai ma ave fu’a i Taaloga a le Pasefika i lenei tausaga.

 

Ua i ai le fa’amoemoe o le ASNOC, o le a tu’u fa’atasia e le Fale Televise a le malo, le KVZK-TV se Leitiofoni e fa’asalalau tu’u sa’o i luga o le Televise, mo le tau sailia o se seleni e fesoasoai ai i ‘a a le atunu’u o le a malaga atu.