Ads by Google Ads by Google

Fa’aitiitia Senate totogi mo le siakiina uta mai fafo na fa’atula’i malo

ausage@samoanews.com

E ui i se taumafaiga a le faigamalo a Lolo ma Lemanu e si’i maualuga le tupe e totogi e pisinisi ma tagata ta’ito’atasi, i soo se taimi e su’e ai e le Ofisa o Tiute a latou uta ma fa’amomoli mai fafo, e fa’aaoga i ai masini fou (scanner) ia ua fuafua le malo e taunu’u mai i le fa’aiuga o le masina lenei, peita’i ua fa’aitiitia uma e le Senate le maualuga o ia totogi, fuafua i le tulaga e gafatia e le atunu’u ma tagata faipisinisi.

 

Na taua e le afioga i le ali’i Senatoa ia Gaea P. Failautusi I le aso Lulu na te’a nei i luma o le maota maualuga, o le agaga atoa o le Senate, ia maua sina seleni mo le faigamalo, a ia mama fo’i le avega e amo e le atunu’u.

 

“O le lagona atoa na mafua ai ona tatou pasia suiga nei i le taimi o le iloiloga a le komiti, ia aua lava nei mamafa itu tasi le avega e amo e le aufaipisinisi ma tagata lautele, ina nei uma atu lenei fa’amoemoe, ae toe fa’ae’e mai ai e le aufaipisinisi le mamafa o le avega i tagata fa’atau ma le atunu’u atoa”, o le saunoaga lea a Gaea i luma o le maota ananafi, i le taimi na latou pasia ai le pili a le maota o sui e fa’atatau i siitaga fou ua fuafuaina e le malo, fa’atasi ai ma suiga ua faia e le Senate.

 

O le aso Lulu na te’a nei na pasia ai e le Senate la latou pili i lona faitauina fa’atolu fa’atasi ai ma suiga, i le palota e 13-0. Sa latou pasia fo’i i le faitauga fa’alua fa’atasi ma suiga le pili a le maota o sui, lea e tutusa lelei ma le agaga o le latou tulafono.

 

Mo le su’eina o uta e aumai i container e ta’i 40 futu le uumi pe sili atu, sa manatu le malo e tatau ona totogi e pisinisi ma tagata ta’ito’atasi le totogi e $350, peita’i ua suia e le Senate i le $200.

 

Mo le su’eina o uta e aumai i container e ta’i 20 futu le uumi, sa manatu le malo e tatau ona totogi e pisinisi ma tagata ta’ito’atasi le totogi e $250, peita’i ua suia e le Senate i le $150.

 

Mo le su’eina o uta e aumai i pailate, sa manatu le malo e totogi e pisinisi ma tagata ta’ito’atasi le $100, peita’i ua suia e le Senate i le $50. Ae mo ta’avale afi poo mea faigaluega mamafa, sa manatu le malo e totogi le $75 e saili ai, peita’i ua suia e le Senate i le $50.

 

O lo o tumau pea le totogi mo le su’eina o afifi e aumai e pisinisi i le $10 e pei ona fuafuaina e le malo, atoa ai ma isi lava totogi e mafai ona fa’ae’e atu e se sui o le Ofisa o Tiute i le taimi e fa’atinoina ai lenei auaunaga.

 

O le agaga o le tulafono e pei ona talosagaina e le faigamalo, e le gata e tu’u atu ai le malosi i sui o le Ofisa o Tiute latou te fa’aaogaina ai masini (scanner) e saili ai uta mai fafo, ina ia taofia ai le fa’afitauli ua leva ona tula’i mai, o le aumai fa’anana ai i totonu o oloa e le tatau ona aumaia i le atunu’u, e aofia ai fualaau fa’asaina ma a’upega mata’utia, ae o se auala fo’i lea e mafai ai ona maua se isi vaega tupe fa’aopoopo mo le malo.

 

Na taua e le afioga i le ali’i Senatoa ia Magalei Logovi’i i le vaiaso na te’a nei ina ua fesiligia e le Senate molimau a le malo e uiga i le tulafono lenei, e le sa’o le lagona o le malo o lo o i ai, o le taumafai e puipui le fa’aulufale mai fa’asolitulafono o aupega mata’utia ma fualaau fa’asaina, ae fa’ae’e atu ai fua nei totogi maualuluga i tagata faipisinisi ma tagata lautele.

 

Saunoa Magalei e fa’apea, e le fesiligia le toe i’u mai o le fa’afitauli lenei i tagata lautele atoa ai ma aiga e vaivai le tamaoaiga, e ala i le fa’aopoopo e tagata faipisinisi o le tau o oloa, ina ia fa’afetaui ai tupe e tele o le a alu i le totogiina o tau e pei ona manatu i ai le malo.