FA’AITIITIA AITALAFU A LE MALO I LE ASPA

UTU: TAOFI SI’ITAGA SA FUAFUA MO LE ELETISE MA LE SUAVAI IA OKETOPA

 

O ni isi o tala fiafia na fa’alauiloa e le Pulega o le Eletise ma le Suavai i luma o le Komiti Soofaatasi o le Paketi a le Fono i le vaiaso nei, e le gata ua amata ona fa’aitiitia le aitalafu e silia i le 10 miliona a le malo i le ASPA, ae ua folafola fo’i e le ASPA le taofia o le si’itaga lona fa mo le eletise ma le suavai sa fuafua e faia i le aso 1 Oketopa, 2013.

 

Na taua e le Pulesili a le ASPA ia Utu Abe Malae i luma o le Fono e faapea, e ui ua faaitiitia tupe maua a le ASPA mo le tausaga tupe fou 2014, ae ua i ai le fuafuaga a le Pulega e le tatau ona toe faia se isi si’itaga i pili o le eletise ma le suavai.

 

Na taua fo’i e Utu i luma o le komiti e faapea, ua amata ona lelei le totogiina atu e le malo o lana aitalafu sa tuua mai i le tele o tausaga ua mavae, ma ua toe $9.4 miliona le aitalafu o lo o totoe i le taimi nei.

 

E $115,457,000 le paketi a le ASPA mo le tausaga tupe lenei 2013, ae mo le tausaga tupe fou 2014, ua siitia le paketi i le $133,744,000 ae faaitiitia tagata faigaluega i le na o le to’a 460, fa’atusatusa i le to’a 483 o lo o i ai i le tausaga tupe lenei.

 

O se tasi o faaopoopoga tele i le paketi a le ASPA mo le tausaga tupe fou, o le vaega tupe e silia i le 50 miliona mai le FEMA lea ua fa’atulaga e fa’atupe ai le fausiaina o le nofoaga fou e tuu i ai afi a le ASPA i Satala.

 

Na taua e le afioga i le alii senatoa ia LeAtualevao Asifoa e faapea, e le toe fia vaai lona sui i ni aitalafu i le va o le malo ma le ASPA, aua e le tatau ona nofo aitalafu le isi vaega o le malo i le isi vaega.

 

Na fesili LeAtualevao ia Utu pe la te mafai ma le Taitaifono o le Komiti Faafoe ia Fonoti Perelini ona fa’amalaga le aitalafu a le malo, ae na tali Utu, o lea ua amata ona totogi atu le aitalafu a le malo i le ASPA.

 

Na faamanino e Utu i luma o le komiti e faapea, o le ofa lea ua tuuina atu e le ASPA i le malo, afai e mafai ona latou totogiina atoa le aitalafu e silia ma le 9 miliona o lo o totoe, e i ai le pau e maua atu i le pili eletise a le malo.

 

Ina ua fesiligia e ni isi o sui o le komiti le afioga Utu pe aisea ua faaitiitia ai tupe maua a le ASPA, na faamanino ai e Utu e faapea, e amata atu i le aso 1 Tesema 2013 ona le toe aumaia e le ASPA le suauu e gaosi ai le eletise i totonu o le teritori e pei ona ia faia i tausaga ua mavae, ae o lea konekarate ua tu’uina atu i se tasi o kamupani tua latou te fa’atautaia, ina ia mafai ai ona taula’i le vaai a le ASPA i le faaleleia o lana tautua i le atunuu mo le eletise, suavai atoa ai le suavai lafoa’i ma le lapisi lafoa’i.

 

O le toatele o sui o le komiti na maua le avanoa e saunoa ai i le paketi a le ASPA, sa latou faafetaia ai ta’ita’i o lea vaega a le malo i galuega lelei ua mafai ona faia mo le atunuu, ma o le tele o lea agaga faafetai sa tuuina atu lea i le afioga i le matua ia Utu, i lona taumafai malosi e faaitiitia le tau o le eletise ma le suavai mo le atunuu.

 

Comment Here