O le aso Faraile na te’a nei sa fa’ailogaina aloa’ia e le Pulega, le Auaiga o Scratch ma le aufaigaluega fa’atasi ai ma Amerika Samoa atoa i ona ta’ita’i ma le mamalu lautele o tagata fa’atau le atoaga o le 30 tausaga talu ona tatala faitoto’a o le faleoloa o le ACE Hardware e tautua ai i tatou uma.

Na amata lea faleoloa i le fale o Sala ma Neil Scratch sa alaalata’i ai i Tafeta, peita’i, ina ua amata ona fa’alauteleina le tautua, sa siitia loa i le nofoaga i Malaeimi e pei ona i ai nei.

I le aso fa’apitoa, sa amatalia i folasaga fa’afetai, ma e le’i faigofie le amataga  o le kamupani. Ma o manatu autu o le tama o lenei pisinisi ua mapu mai i ti’asa, “E lutia i Puava, ae mapu i Fagalele.” Ioe ua se’e nei i ma’a o malie le tina ma le fanau ma aiga, i le taumafaiga sa gapatia ai le tama o le aiga, ae ua suia ai nei fo’i ma le igoa o lenei pisinisi e afua i le aso fa’amanatu nei: “Niel’s ACE Home Center.”

O se suiga lea, ua agatonu ma le agaga o Sala ma le fanau ma Aiga, “E toe tepa lava i le amataga, ma iloa ai sa to’atele i latou e fa’apea o le Fale Laupapa o Neo, o lea ua toe sologa lelei lava pe a toe fa’afo’i le igoa o le kamupani e fa’ailo ai le igoa o le tama o le aiga.”

Na atoa mai i fanua nisi o le fanau e to’a ono tama’itai ma le latou tuagane e to’atasi, ae maise nisi o le aiga o le tama o Neil Scratch mai Kanata, ina ia molimauina lenei aso iloga.

I le mamalu o le aufaigaluega, sa fa’amau fa’ailogaina fo’i le auaunaga a nisi o i latou ua silia ma le 20 tasuaga le latou auaunaga. O se mea e mata’ina, o le amataga o le tautua, e le’i amatalia i tulaga iloga ua tautua ai nei i latou, ae o le si’itia i le tulaga fa’amaoni ma le onosa’i, ua mautu ai le si’itaga i o latou olaga faigaluega, ma ua pale ai i le tofi o le fa’aeaina.

O le to’atolu sa fa’apine a latou tautua:

• Teni Ma’ae mai Futiga, sa amata mai i le leipa e tusia oka mo le falelaupapa ma fa’ao’o i tua mo le kiliva mai i luma po’o aiga fo’i. Na soso’o lea ma le avea ma fesoasoani i kiliva, soso’o ma le avea ma supavaiasa o le foloa i itu eseese o oloa fa’apitoa mo fausaga o fale, ae o lea ua avea nei ma pule o le aufa’atau i le foloa atoa. Na amata faigaluega o ia ia Iuni 21, 1991.

• Vaipuna Tia, sa amata mai lana tautua o se ave kiliva, soso’o lea ma le fa’atautaia e ia uta kiliva i aiga, ma soso’o ai ma le avea ma fa’atau oloa, peita’i ua fai si leva talu ona avea o ia ma pule i fa’atauga ma o ia lea e fa’alagolago i ai fa’atauga e feso’ota’i ma le malo i le fa’atautaiga o latou pepa e fa’amaonia ai nei fa’atauga tetele. Na amata faigaluega o ia ia Tesema 30, 1992.

• Samuel Chadwick, o ia lea ua avea ma pule o inisinia a le ACE i le taimi nei, peita’i sa fa’afaigaluega mai o ia e avea ma kamuta, soso’o lea ma le alu i kiliva, ae o lea ua pulea e ia le vaega o inisinia mo ta’avale kiliva. O ia e fa’amoemoe i ai le soifua o i latou o feoa’i i loli kiliva a le ACE. Na amata faigaluega o ia mai ia Setema 16, 1994.

O nisi o galuega foa’i sa faia e le ACE mo le mamalu o nisi o sosaiete, vaega o le malo ma sosaiete tumaoti sa latou fa’atagisia ni foa’i, na taua’aoina i lea aso fa’ailogaina.

O le foa’i mo le Vasega o A’oga eseese sa tauva ai i le polokalama “Helpful Hands” ma ua mae’a lelei le 8 tausaga o latou fa’atupea lea polokalama aoga. Ua mae’a taua’aoina le 100 Kalone Lapisi mo A’oga uma i le Matagaluega o A’oga, e $2,200 le tau aofai o lea galuega fa’atino.

Love Thy Neighbor Minisitries e fesoasoani ai mo Aiga Lima Vaivai, ua mae’a taua’aoina i le faletua o Carol Ma’afala Baqui le $5,000 mo lea fa’amoemoe aoga i nai aiga ia.

Foa’i tupe mo American Samoa Community Cancer Coalition e $5,000 na tuuina atu i le susuga Morris Scanlan Jr. ma le foa’i tele mo le Hope House i Fatuoaiga mo le tausiga fa’apitoa o matua ma fanau ua gasegase tumau e $10,000 sa taua’aoina le siaki i le faletua o Cynthia Moliga.

Na si’i fo’i le fa’afetai a le tama’ita’i pule sili o le ACe Hardware i le aufaigaluega, ae maise o sui iloga latou te tausoa fa’atasia le tiute o galuega fa’atino i aso ta’itasi ina ia mautinoa le auaunaga a le ACE ua fa’ataunu’uina i le mamalu o ana tagata fa’atau i aso uma. Lona lua o le pa’ia lautele o e fa’atuatuaina le auaunaga a le ACE e maua ai e i latou oloa lelei mo latou aiga.

Ae fa’ai’u ai lana fa’afetai i matua o lenei kamupani, i la’ua sa fa’aosofia e le Atua ina ia taumafai e fa’atula’ia lenei faleoloa, ua avea ma fesoasoani i latou aiga ta’itasi, ae maise o tagata faigaluega ma latou fo’i aiga.

Sa faia se lulu e maua ai fa’ailoga matagofie i lea aso mo i latou uma na se’i numera e ulufale ma fiafia fa’atasi ma i latou i lona atoaga o le latou 30 tausaga. Na taua’aoina fo’i nai meaalofa iti e fa’amanatu ai lenei tausaga o le ACE.