Ads by Google Ads by Google

FA’AILOA TU MA AGAIFANUA SAMOA FONO A LE CWM

O le afiafi o le aso Lulu na te’a nei, sa fa’atulaga ai i le polokalama fa’ataoto a le Fonotaga Atunu’u Kerisiano i le Lalolagi [CWM] lea afiafi a tamali’i e fa’aalia ai tu ma agaifanua a Vaifanua Ta’itasi o lo’o usufono i lenei tausaga.

O lea po fiafia sa vaevaeina ai le fonotaga i Vaifanua e ono: Atu Aferika, Atu Asia, Atu Europa, Atu Karipiana, Atu Asia i Saute ma le Atuvasa o le Pasefika. O nei uma Vaifanua ua foliga mai o Konetineta ta’itasi ia ua auai ma ua avea fo’i ma totino o le CWM lea ua i ai nei Amerika Samoa i lana Ekalesia Fa’apotopotoga Kerisiano o le totino mulimuli lava ua fa’aofi i le tausaga e 1997.

O le fa’aaliga lea sa amatalia ia le sao o le Atu Aferika e aofia ai Zambia, Malaue, Matakasa, Simipakue, Aferika i Saute ma is malo fa’apena. O le latou siva na mata’ina fo’i aua e tele taimi e taumafai ai fanau a’oga e fa’atino siva nei, ae o lea ua va’aia toniga felanulanua’i ma a latou siva matagofie, o le a fa’aaoga tatau fo’i e fanau mo a latou a’oa’oga.

O le sao o le Atu Asia e aofia ai Taiwan, Korea, Saina mai Hong Kong, Malaysia, Sigapore ma Mayama oka se fiafia i ai o le to’atele na maimoaina, e fa’asoa mai fo’i i a latou aga o fa’afiafiaga, ae ua masani ai Amerika Samoa, aua o lo’o tatou o aumau ma le to’atele o uso mai nei atunu’u i o tatou laueleele.

O le Atu Europa, sa fa’alogoina ai fatuga ua fatia aga’i i ai le tele o vi’iga o le Atua lea e i le tusi pese a le EFKAS, e feso’ota’i mai lava ma le LMS. O pesega fa’a-Uelese, Pese fa’a-Sikotilani, ma pese fa’a- Aialani sa fa’afofogaina. E ese fo’i le matagofie o le tatalo i le gagana a Netalani latou, ma ua fa’afetaia le sao o lea fo’i vaega na masi’i mai le Atu Europa.

I le Atu Karipiana, sa masi’i mai ai le vaega a Bob Marley ma latou fa’atuga e tali tutusa lelei ma le fa’a-Reggae. Na latou usua le pese na muaimalae i lea ituaiga o fatuga I Simmer down! ma sa fa’afiafiaina le to’atele, aua e pei e Bob Marley le to’atele o le tatou autalavou i a latou sikaili. Ua tulaueleele loa tama moni o ia ituaiga o aga, sa latou fiafia, ona e va’aia e i latou e fiafia i tatou i a latou fo’i sikaili, ma fatuga. O atunu’u na auai o Jamaica, Kariapiana ma Guyana.

O le Atu Asia i Saute sa o mai ai le vaega a Osama po’o le vaega e tupuga mai ia Isamaeli le alo o matua o Apera’amo le tama o le au fa’atuatua. O nei tagata e o mai Initia i ona vaega e tolu, ma Bangladesh ua latou fa’aalia lo latou mau: “Ia tatou fiafia ona o le to’atele o tatou ituaiga!” Ia tasi lava i tatou ia Iesu ma lo tatou Atua e to’atasi. Na faia latou pesega ma siva fa’a-Initia, ma e masani ai fo’i i tatou aua ua fai fo’i si to’atele lava o nei uso i o tatou laueleele ma ua tala gafa fo’i i ai o tatou tagata.

O le toe vaega na fa’afiafia, na ta’ita’ia lea e le Ta’ita’ifono fou o le  CWM, Rev. Samuelu Tialavea le latou toe sao mo le afiafi: Sipela ai ma le HOPE, i ni taga fa’amalositino, oka ua ofo atoa le tatou usufono o le fonotele ona e agava’a le Faife’au i lana item na fa’atino. O pesega na muamua a lenei vaega, sa usuina ai e sui e to’atolu mai Solomona pese o le tatou a’oga Aso Sa. Ua tu’uina ia i latou le sao, aua o se tasi lea o atumotu, sa pito mai ia i tatou le la’ititi e ofi ai i le CWM, ma o le a talimalo fo’i ia i tatou i le Fa’aaliga tele o Tu ma Aga a le Atuvasa lea e amatalia ia Iulai 1 se’ia o’o ia Iulai 14, 2012.

O se tala mai i sui na auai, “O le fiafia e le mata’uina lea, aua ua tele na’ua tu ma aga fa’akerisiano ua matou va’aia e ola ai pea Samoa na lua!” O se talanoa mai lea a sui usufono mai Hong Kong i Saina Komenisi.