Ads by Google Ads by Google

Fa’ailoa Teutupe malo mafuaaga tuai ai ona totogi Ovataimi

Ina ua fesiligia e sui o le Komiti o le Paketi a le Senate i le taeao ananafi molimau a le malo, i le mafuaaga o le tuai ona totogi o ovataimi mo ni isi o tagata faigaluega a le malo, na faamanino ai e Dr. Falema’o ‘Phil’ Pili e faapea, o se tasi o mafuaaga ua tuai ai ona totogi ovataimi nei, o lo o tau iloilo e lona ofisa pe talafeagai ovataimi e pei ona tuuina atu i lona ofisa ma i latou o lo o fuafua latou te mauaina nei ovataimi.

 

Na taua e Falema’o e faapea, e ono i ai tagata e le agava’a i ovataimi ae o lea o lo o aofia o latou igoa i le lisi o tagata o lo o talosaga mo ova taimi, o le isi mafuaaga, se’i sailiili muamua e lona Ofisa pe faamaonia itula ua tuuina atu sa galulue ai i latou nei, ae po o a fo’i a latou galuega sa faia ua mafua ai ona maua a latou itula ovataimi.

 

Ina ua alia’e mai le mataupu e faatatau i ovataimi a ni isi o tagata faigaluega a le Ofisa o le Tiute e le i totogiina talu mai le tausaga na te’a nei, na faatulaga ai loa e le taitaifono o le Komiti o le Paketi a le Senate ia Laolagi Fonoti Savali Vaeao le iloiloga ananafi, e fesiligia ai molimau a le malo e faatatau i lenei faafitauli.

 

O le teutupe a le malo ia Falema’o ma le Faatonusili o le Matagaluega o Tagata Faigaluega a le malo ia Sonny Thompson na valaau e molimau i lenei mataupu.

 

Na faamanino e Thompson i luma o le komiti ananafi e faapea, o le mataupu lenei na muamua faaoo e tagata faigaluega a le Ofisa o Tiute i le Ofisa e taua o le EEO a le malo (Equal Employment Opportunity) sa latou tusi, e faailoa i ai a latou itula ovataimi e le i totogiina atu e le malo, talu mai piriota totogi a le malo ‘15 e o o atu i le 24’.

 

Ae ina ua suesue e le ofisa a le EEO lenei mataupu, sa latou iloa ai, e le o le latou Ofisa e tatau ona taulimaina le mataupu, ma tuuina atu ai loa i le Matagaluega a Tagata Faigaluega a le malo (DHR), o i latou tonu ia e taulimaina le mataupu, e pei ona taua e Thompson i lana molimau, ma faaoo atu ai loa i le Ofisa o le Tupe mo a latou suesuega.

 

Ina ua fesiligia e le alii senatoa ia Mauga Tasi Asuega ia molimau, pe i ai nisi ofisa a le malo e le i totogiina a latou ovataimi, na tali Falema’o ma Thompson, “e leai, se’i vagana ai lava tagata faigaluega pe to’a 50 mai le Ofisa o Tiute, lea o lo o finau atu e i ai a latou itula ovataimi e le i totogiina atu e le malo.”

 

Na fesili le alii senatoa ia Afoa Suesue Lutu i molimau, pe fia se tupe e manaomia e totogi ai ovataimi ia a le malo, ae na tali Falema’o, “pe a ma le $60,000 le tupe e manaomia e totogi ai ova taimi, ae o le taimi fo’i lenei e le o i ai se tupe na faapaketi mo ia ovataimi”.

 

Na faamanino atili e Falema’o e faapea, e i ai isi ova taimi e oo atu i le ta’i 400 ma le ta’i 500 itula faigaluega o lo o i ai, ma e manaomia le faamaonia muamua pe agavaa uma nei itulaga i ova taimi, ae pe agavaa fo’i nei tagata i galuega eseese i le malo, ae po o itula ova taimi o lo o taua e ono mafai ona avea ma taimi faaopoopo (compensatory time) a le malo.

 

Na faamanino e Thompson i le komiti e faapea, ina ua faia se suesuega a le Matagaluega o Leipa a le malo tele (DOL) i le tulaga o ovataimi i le tausaga e 2011, na tuuina mai ai loa le tulafono e faapea, o tagata faigaluega uma lava e ova atu ma le $380 o latou totogi i le lua vaiaso, toe pulea e lea tagata ni isi tagata faigaluega se to’alua pe sili atu fo’i, e le agavaa le tagata faigaluega lea i tulaga o taimi faaopoopp.

 

I le faaiuga o le iloiloga, sa fautuaina ai e sui o le komiti molimau a le malo, e sili atu le totogi o ova taimi a tagata faigaluega, nai lo le toe faasala e le malo feterale o le malo i le le totogiina o ova taimi a tagata faigaluega.