Ads by Google Ads by Google

Fa’ailoa ID - 2 Sui Leoleo Nana

Ua molia ma ua saisaitia fo’i se tasi sa faigaluega muamua i le CIA ae ua faigaluega nei i le CNN, ona ua ia fa’aalia fa’alaua’itele suafa moni o ni isi o lo ’o avea ma Sipai a Amerika i atunu’u i fafo, po ’o i latou fo’i sa avea ma sipai, ae ua mae’a lo latou taimi ma ua suia o latou suafa i le taimi nei.

O le fa’aletonu ua 'iloga mai, ona o le taimi sa avea ai John Kiriakou ma tagata faigaluega a le CIA, o ia lea sa i ai le vasega o tagata e latou te feso’ota’i ma sui o lo ’o galulue i atunu’u i fafo i igoa e ‘ese mai o latou lava igoa moni, ina ia mafai ona fa’atautaia ni isi o galuega fa’anana a le Malo o Amerika, e sa'ilia ai fa’amaumauga mautu e tusa ai o galuega patino i le FBI ma le CIA, e pei o le sa'iliga o Osama,  sa'iliga o Hussein, ma isi mea fa’apena.

O le tausaga e 1999 se’ia o’o i le tausaga e 2004 na galue ai John Kiriakou i le CIA, ae o lana tautoga sa faia, ia le mafai lava ona ia fa’aalia se igoa moni o i latou o lo ’o galulue fa’asipai i isi atunu’u i so ’o se nusipepa ma leitio fa’asalalau, aua e vave ai ona maua e isi atunu’u o lo ’o lamalama mai ia Amerika nei sui galulue fa’anana mo Amerika.

O le tele o fa’amaumauga sa fa’amauina e lea sui a’o faigaluega i le CIA ua alia’i mai nei ua iloa e tagata ma malo o i ai i latou, ma ua 'iloga ai, le moni o tu’ua’iga, o lea sui ua ia fa’ailoa nei sipai ma latou nofoaga o i ai.

O Kiriakou ua na’o le 47 ona tausaga, peita’i ua molia nei o ia ina ua ia solituina le tulafono sa ia tauto na te usita’ia i lona olaga atoa, i mata'upu tau galuega fa’anana a i latou ua avea ma sipai a Amerika. Ua fa’ailoa mai e to’atasi lava le ali’i sipai ua mautinoa ua mae’a fa’ailoa e lea ali’i faigaluega a le CNN lona igoa moni ma le nu’u o lo ’o faigaluega fa’asipai ai.

Ua fa’aalia fo’i e le sui o le CIA sa fa’atalanoaina e tusa o moliga o Kiriakou e fa’apea, “E ui lava ina ua fa’atauto e i matou tagata faigaluega ina ia le fa’aalia so ’o se ituaiga faiga ma sa'iliga a le CIA i se nusipepa po ’o se leitio e fa’atalanoaina i matou, e ao lava fo’i ona mautinoa o lo ’o faia matou galuega, e tusa ai ma tulafono e puipuia ai lo tatou malo ma tagatanu’u uma o soifua ai.”

Ona o fa’amatalaga sa faia e Kiriakou i se fa’atalanoaga e se tusitala a le Yahoo News, sa iloa mai ai e tagata lautele le isi ituaiga sa'iliga a le CIA ole “water-boarding” lea na mafai ai ona fa’atautala se tasi o tagata sa loka mai a le al-Qaidai le na’o le 35sekone talu ona tu’i fesiligia e le CIA lava.

Mai lea lipoti na fa’aalia ai e Kiriakou lea faiga, ua sainia e Obama se fa’atonuga i le CIA ina ia taofia lea faiga, ma ia le toe faia, aua o lea ua fa’alauiloa fa’alaua’itele. O ni isi o fa’amatalaga na faia e Kiriakou, i sana talanoaga ma le ABC News - Brian Ross, sa ia fa’aalia ai ni isi o mea e pei o le saisaitiaga o Abu Zubaydah, ua le mafai ai ona toe faia isi osofa’iga e tusa ma le 12 a le CIA i nofoaga sa tatau ona vave mae’a ai ni isi lu’i i le taua i sasa’e tutotonu.

Ina ua mae’a le talanoaga lea a Kiriakou ma le ABC News, sa vave ona fa’afaigaluega o ia e le ABC News, e tusa ai ma le lipoti na fa’ailoa mai e Brian Stelter o le New York Times i le 2009. O se tala mai e fa’apea e fa’a83 taimi na faia ai le “water boarding i le ali’i Zubaydah ia Aukuso 2003, ae o se mea na toe fa’ailoa mai e le New York Times, e le’i i ai Kiriakou i lea taimi na faia ai nei su’esu’ega fa’a-water boarding ia Zubaydah.” O le taimi tonu lava lea na taofia maumaututu ai loa e Obama lea faiga.

O lo ’o ua tatalia nei le taimi e tula’i ai Kiriakou i luma o le fa’amasinoga i Alexandria, Virginia i le aso Gafua i le aoauli.