Ads by Google Ads by Google

Fa’aigoa to’ese o le faleaoga mo solitulafono’

A’o saili e le tama’ita’i loia ia Ruth Risch-Fuatagavi, ni upu e fa’aleo ai lana fa’afinauga i luma o le Fa’amasinoga Maualuga, i le taimi na lauina ai le fa’asalaga a le alii o Asotasi Maiava i le taeao ananafi, sa ia ta’ua ai e faapea, o le falepuipui i Tafuna, e le o se nofoaga e mafai ona fesoasoani i le olaga o se tagata ua ta’usala, ae “o se aoga mo solitulafono.”

O le alii o Maiava, o se tasi na to’atolu i ai i latou na osofaia se faleoloa i Ottoville i le masina o Setema 2011, lea na ia fa’aaogaina ai se fana e foliga o se fana meataalo (BB gun), lea sa ia ta’i i le fa’atauoloa ma fai i ai e aumai tupe o lo o i totonu o le masini.

Ao le’i tu’uina atu le fa’asalaga a Maiava i le taeao ananafi, na maua le avanoa e fa’atoese ai lenei alii talavou i le fa’amasinoga ma lona aiga atoa ai ma le aiga na a’afia, ma ia talosagaina se isi avanoa mo ia.

Sa finau foi Ruth Risch-Fuatagavi, ina ia fa’anofova’ava’aia le ua molia. Fai mai Fuatagavi, o le falepuipui i Tafuna e le o se nofoaga lelei e aoaoina ai se tasi ina ia suia lona olaga, ae o se faleaoga e atili ai ona solitulafono le tagata.

“Afai foi e toe  tuuina atu i ai o ia i le falepuipui, o le a leai se lesona e mafai ona ia aoaoina mai ai, ae o le a atili ai ona leaga faaiuga na te faia,” o le fa’afinauga lea a Fuatagavi. Sa ia taua foi e faapea, ua tele se lesona ua aoaoina e Maiava ao i ai i le toese mo masina e 4 talu ona taofia o ia.

Na taua e le tamaitai loia fautua, o lo o i ai le galuega o lo o fa’atali mai mo Maiava i le aai o Memphis i Tennessee, o le mafua’aga lea na i finau ai i le fa’amasinoga ina ia tu’u se fa’asalaga tupe e totogi e Maiava, ae fa’anofova’ava’aia o iai.

Sa ia finau i le faamasinoga ina ia silasila i le lumanai o Maiava, e fuafua i ai sa latou fa’aiuga, peitai na finau le loia a le malo o Cecilia Reyna e fa’apea, e tatau ona i ai se fa’asalaga fa’afalepuipui e tu’u atu e le fa’amasinoga ia Maiava, ina ia a’oa’oina ai o ia mai le sese sa ia faia. Fai mai le malo, e matuia le gaioiga sa faia e Maiava ina ua latou osofaia le faleoloa o le aiga Asia na a’afia i Ottoville, e ui e le o se fana mo’i na ia fa’aaogaina, peitai sa manatu le fa’atauoloa o se fana mo’i sa ia u’uina.

Na fa’amanatu e Reyna i le fa’amasinoga e fa’apea, o alii se toalua ia na toatolu ma Maiava i lenei osofaiga, o ni alii e laiti, ma o le  gaioiga sa latou faia na matua a’afia tele ai le pule o le faleoloa.

Sa ia finau i le fa’amasinoga ina ia tu’u atu se isi fa’asalaga fa’afalepuipui mo Maiava ina ia ona a’oa’oina ai se isi lesona taua i lona olaga.

E 5 tausaga na fuafua le faamasinoga e loka ai Maiava i le toese, peitai o lea faasalaga o le a faamalumalu, ae faanofovaavaaia o ia mo le 5 tausaga i lalo o poloaiga a le faamasinoga, ma o nisi o ia poloaiga e aofia ai lona tuliina o masina e 12 i le toese, atoa ai ma lona totogiina o le salatupe e $1,000, peitai afai na te totogiina le $1,000 o le a toese mai ai le isi masina e 6 o lona faasalaga faafalepuipui.

O le masina o Setema 2011 na osofaia ai e Maiava ma ni alii laiti se toalua, e 14 tausaga le isi ae 17 tausaga le matua o le isi se faleoloa i Ottovile pe tusa o le lata i le itula e 10 i le po. Na faalala e Maiava le fana i le faatauoloa ma fai i ai e avatu tupe o loo i totonu o le masina, ao le taimi lea o loo ufi uma o latou foliga i ni pulou, atoa ai ma ofu mafanafana o loo latou oofu ai.

Ina ua maea, sa latou o ese ma ave fa’amalosi se tinoitupe, pepa  sikaleti ma pepa fai telefoni.