Ads by Google Ads by Google

Fa’ai’u ma le manuia le sisiga fu’a o lenei tausaga

Na fa’ai’u ma le manuia sauniga o le sisiga fu’a a le atunuu i lenei tausaga, i le fa’amanatuina ai o le 114 tausaga talu ona osi feagaiga Amerika Samoa ma le malo tele o Amerika.

 

O le felanulanua’i o polokalame o le fu’a na tapenaina e le Komiti ma le faigamalo, e pei o le vave amata o le polokalame i le itula e 8:00 i le taeao, aemaise ai o le mataina o fa’afiafiaga au siva, savali ma le solo a ta’avale teuteuina, na avea lea ma itu na matua fa’atumulia ai le malae o le Veterans Stadium i Utulei i le mamalu o le atunuu na lolofi atu latou te molimauina lenei aso taua mo Amerika Samoa.

 

E ta ane le itula e 7:00 i le taeao o le aso Tofi na te’a nei, Aperila 17, 2014 ua faatumulia le malae i au savali, e faatalitali le taimi e taunuu ai malo fa’aaloalogia mo le amataina o le sauniga.

 

O ni isi o malo mai fafo sa mafai ona auai mai i le molimauina o lenei aso taua mo Amerika Samoa e aofia ai le afioga i le alii Palemia o Samoa ia Tuilaepa Lupesoliai Sailele Malielegaoi, faapea ai ma le taitai o le atunuu o Tokelau ia Ulu o Tokelau Kuresa Nasau.

 

E le i auai le afioga i le alii kovana ia Lolo Matalasi Moliga i sauniga o le fu’a o lenei tausaga, ona o lo o i ai pea o ia i Hawaii ona o tulaga i lona fa’atafa gasegase.

 

O le sauniga lotu sa tatala ai le aso o le fu’a na saunia lea e le susuga Rev.  Lokame Malaesilia, ae o viiga o le Atua na saunia lea e le aufaipese a le Ekalesia Susana Uesele mai Tafuna.

 

Na faamamafa e le alii faifeau i le feau autu o le aso o le fu’a le mana’omia o le galulue fa’atasi o le malo ma kamupani tua, i le unaia lea o galuega lelei ina ia manuia ai le tamaoaiga o le malo ma manuia atu ai ma tagatanuu.

 

Sa toe fa’atepa e Rev. Malaesilia le faigamalo a Amerika Samoa, ina ia tausisi pea i lana tagavai, o le fa’amuamua lea o le Atua i soo se mea fai, e pei fo’i o le tagavai a le malo o Samoa, faavae i le Atua Samoa.

 

Na taua fo’i e le alii faifeau e faapea, o le tofa lea na faataoto e tuaa ua mavae, lea ua agiagia i le tagavai o Amerika Samoa, ua atagia mai le finagalo o tuaa ia manuia pea Amerika Samoa pe afai e faamuamua pea le Atua i soo se mea e fai.

 

O le sisiina o le tagavai o le malo tele o Amerika, na sisiina lea e le afioga a Fanene Morris Scanlan ma Mrs Vera Annesley, ae o le tagavai a Amerika Samoa na sisiina lea e Mrs. Faatamalii Pritchard ma le afioga a Tilo Kalepo Vasaga, a’o lagiina e le aufaipese a le aoga maualuga a Samoana, i lalo o le taitaiga a le latou faiaoga ia Pati Pati Jr vi’i o tagavai e lua.

 

O saunoaga autu o le aso na saunoa i ai le afioga i le alii Peresetene o le Senate ia Gaoteote Palaie Tofau ma le afioga i le Kovana le Tumau ia Lemanu Peleti Mauga, i le mae’a ai lea ona tolaulauina o le Poloaiga faapitoa na sainia e le alii kovana, lea na faitauina e le Faiaoga o le Tausaga ia Claire Marisse Bacus.

 

Na faafetaia e Gaoteote le alii kovana ma le faigamalo, ona o se ulua’i taimi lea ua maua ai e le Fono Faitulafono se avanoa mai le faigamalo, e tulei saunoa ai i sauniga o le fu’a, ina ia atagia mai ai tulaga mavaevaae o le tafatolu o le faigamalo a Tutuila ma Manu’a.

 

Saunoa Gaoteote e faapea, o le 114 lenei o tausaga talu ona faamanatu le fu’a a Amerika Samoa, ae o se taimi muamua lenei ua maua ai e le Fono Faitulafono le avanoa e saunoa ai i le sauniga o le fu’a.

 

O le pulesili o le kamupani i’a o le StarKist Samoa ia Mr. Sam Lee na fai ma sui o pisinisi i le atunuu, e saunoa e faafetaia ai le malo ona o le faatauaina o pisinisi i le fu’a o lenei tausaga.

 

Na faafetaia e Mr. Lee le tautua a tagata faigaluega a le StarKist Samoa, o lo o galulue punoua’i i le ao ma le po mo le faatumauina o le tulaga lelei o le kamupani tu’uapa, o se tasi o kamupani tuna pito sili ona tele toe lauiloa i totonu o Amerika.

 

“Ana leai le tautua faamaoni a tagata faigaluega, e le mafai e le StarKist Samoa ona ausia tulaga manuia ua ia maua i le taimi nei,” o le saunoaga lea a Mr. Lee.

 

Saunoa Lee e faapea, e ui i le faigata o le amataina mai o le tautua a lenei kamupani, ao lenei ua silia ma le 50 tausaga talu ona faavaeina lona lala i Amerika Samoa, ma ua vaaia foi tulaga manuia ma lelei mo le malo faapea ai tagatanuu o Tutuila ma Manu’a.

 

O faafiafiaga i siva ma pese faaleaganuu, o se tasi lea o vaega sa toatele le atunuu na lolofi atu e fia maimoa ma faafofoga i ai, e maua ai le ata i le malie o fatuga o pese faaleaganuu, lea na tatala e le au faafiafia mai le kamupani a le StarKist Samoa, sosoo ai loa ma le kamupani a le BlueSky Communications i le taeao.

 

Ae o le aoauli na tatala e le au faafiafia mai le afioaga o Saanapu mai Samoa, sosoo ai le siva mai Vailoatai ae taualuga e le pese faaleaganuu a le afioaga o Pago Pago, ma tapunia ai loa polokalame o le fu’a i lenei tausaga.

 

I tulaga o ta’aloga sa faatautaia i le vaiaso o le fu’a na mavae atu nei, ua sola ai nei le tele o au taaalo mai Samoa ma le siamupini i taaloga faipele ma le lakapi ta’ito’a 7, ina ua faiaina ai au taaalo mai Amerika Samoa nei.

 

I taaloga faipele, ua sola ai nei le au fusu mai Samoa ma le ipu na saunia e le alii kovana, ina ua latou manumalo i aupaga e 7 ae tasi le aupaga na manumalo ai Amerika Samoa, se’i vagana ai paga e lua mo fusuaga faapolofesa na manumalo uma ai Amerika Samoa, lea e aofia ai ma le fusuaga a le susuga a Alapat A’asa, ina ua mafai e lana paga ona faaauau le fusuaga i le ta’amilosaga muamua o le umi e 4 ta’amilosaga o le la taaloga.