Ads by Google Ads by Google

FA’AI’U FALESA SU’EGA TALA NA AMATA MAI APIA

E le’i popole lava fafine i se tasi o aulotu i le talafatai o le atunuu, o le malumalu tapua’i lea ua o’o i ai a latou su’egatala, ae na te’i lava le faaulu koega lea na ia faamaiteina le faatupu o tala sese ina ua tofu le isi au maula e toalua ma pito o lona lauulu, ae fai ai le la mumuga falo a’o sauni le aulotu mo le pese amata o le lotu afiafi.

“E pisi lava fafige i le lakou fusuaga ae o isi lava i le alalaga aku i ai, ia faamasigo le Alii ia ke oukou, ia faamasigo le Alii ia ke oukou,” o le tala ata lea a le molimau ao tau to lona sela i le tau faamatalaina o le vevesi a le latou aulotu.

“O le iku ga sili oga makaga ai, ua le popole lava le au fufusu i o lakou lavalava ae ua pule lava le kagaka ia i le iku e fokia’i solo ai oga vae ma ua kau au iga aliali mai ai ma mea paia sa kakau oga puipui malu,” o fika ia a le molimau.

Fai mai le molimau, o tala na mafua ai le vevesi na amata mai i tafaoga o le fu’a i Samoa, ae fa’ai’u mai iinei ina ua fai fai tetele le salalau solo o tala le moni na faamatala e le maula na faamaiteina le faiga o nei tala.

Fai mai le molimau sa ia faamatalaina le mumugaveve lea a le latou aulotu i le Samoa News, na amata mai lava i le lotu taeao taugaupu a le au maula ia, ae tei ua faifaitetele ina ua oo i le lotu afiafi i le taimi na maea ai le pese muamua o le a lafo le sene i le afiafi.

O le mafine lea na tigaina i le vevesi sa nofo i le nofoa o le aufaipese, ae o fafine e toatolu lea na latou vevesi e pese le isi toatasi ae o le isi toalua e le aufaipese.

“Ga ou vaaia le tau fai fegegoa’i solo o maka o le au kama’ika’i o loo i ai i le aufaipese i le kaimi e le’i usuiga le pese, peika’i ga ou ke’i oga e le’i uma lelei le pese ae aapa aku loa lima o le isi fafige ma fuki mai le ulu o le kamaika’i lea ga faakupuiga kala sese ma koso mai i kua, ma amaka ai loa iiga ma lakou fusuaga,” o le tala lea a le molimau.

“E vave aku le o o fofoga gai lo lima, ua e silafia foi fusuaga a le ikupa vaivai e kelevavave aku lava le fofoga gai lo mea faigaluega, a ea,?” o le tala ata lea a le molimau.

Ae o le itu sa sili ona fefeu ai le mataupu, sa vaaia e tagata le faifeau e au i le itu lea na faatupuina le vevesi ma faia tala sese, aua o ia le isi sa i ai i le aumalaga na o i Samoa.

O tala e faatatau i amioga a fafine sa o i le malaga a le aulotu i le taimi o le fu’a na mafua ai ona tulai le vevesi, ina ua feta’aina inugapia ma evaga i fale kalapu, atoa ai ma le filogia ai o igoa o nisi o fafine sa malaga ae faamuli atu o latou taitoalua.

Fai mai le molimau, na pau lava le leo na faalogoina i le taimi na tupu ai le vevesi, o le alaga a isi tagata aulotu fai mai, “vili leoleo, vili leoleo,” peitai o le manumanu i le igoa o le lotu na mafua ai ona leai se isi na viliina leoleo.

E lei taunuu le uluai fono a le aulotu lea na talo i le aso Gafua na sosoo ma le aso Sa na tupu ai le vevesi, ina ua leai ma se isi o le itu na faatupuina tala na oo atu i le fono, peitai ina ua toe talo i le aso Tofi na sosoo ai, na vaaia ai loa le taufai lolofi atu o le aulotu e oo lava i isi ua atoa le tai 5 aso Sa e lei toe oo atu i se falesa, na lolofi uma atu i le fono lea i le fia mauaina lea o le au o le paipa.

Fai mai le molimau, ua maea fono e tolu a le aulotu ma e foliga mai e ono aafia atu ai ma le alii faifeau i lenei mataupu, ma o le latou fonotaga faapitoa lea o le a faia i le vaiaso fou, lea o le a taitaia e le taitai aoao o le ekalesia, o le a soalaupule ai loa ma le mataupu e pei ona tuuaia ai le alii faifeau i lona aafia ai i tuuaiga nei, e ui o loo teena e le faifeau lona aafia ai i lenei mataupu.

O ni nai nasina e lei mamao atu foi na tulai mai ai foi se vevesi faapea i se tasi o ekalesia i le itu i sisifo o le atunuu, ina ua maea le lotu afiafi ae vaovao fusuaga e mafua mai i suega tala, ma taofia ai loa e leoleo fafine e toalua sa laua osofaia ma fasi le isi fafine.

Fai mai se tasi o alii faifeau e lei finagalo e faalauiloa lona suafa, ua oo lava i totonu o ekalesia ua galue malosi ai lava le tiapolo e faatutupu maseiga ma vevesi i le va o tagata aulotu, peitai e iloa gofie le kerisiano moni ua maua’a i le Alii, tusa lava poo a faafitauli e le maluelue lava lona faatuatua.