Ads by Google Ads by Google

Fa’ai’u falepuipui se vevesi na afua mai totonu o se aulotu

O le vevesi lea na tula’i mai i le va o ni tagata ekalesia o se aulotu i Faleniu i le masina o Aokuso 2012, ua mafua ai ona tofu atu i le falepuipui se tasi o le aulotu, ina ua faasala o ia e le faamasinoga maualuga i le vaiaso na te’a nei.

 

O le faasalaga a Paea Latu e pei ona tuuina mai e le faamasinoga, e aofia ai le taofia o ia i le falepuipui mo faaiuga o vaiaso sosoo e 10, amata mai i le itula e 4:00 i le afiafi o le aso Faraile ae tatala i le itula e 4:00 i le afiafi o le aso Sa, ma o le faaiuga o le vaiaso na te’a nei na amata tuli ai lea faasalaga, o se tasi lea o tuutuuga o lana nofovaavaaia e 5 tausaga, ina ua ta’usala o ia i le moliaga mamafa o le faaoolima i le tulaga lua.

 

Na finau malosi le loia a le malo ia Tony Graf ina ia faasala Latu i le falepuipui, ina ia momoli atu ai se lesona i isi foi tagatanuu o lo o aafia i le ma’i o le ita vave, e le taliaina e le faamasinoga ituaiga amioga faatamala e pei ona ia faia.

 

Na taua e Graf e faapea, o le vevesi i le va o Latu ma le aiga na aafia, na mafua mai i se talanoaga sa faia i totonu o le falesa, ae na avea ma itu na ita ai Latu, ma savali atu ai loa i fafo ma le falesa ma faatalitali mai ai i le aiga na aafia.

 

Ina ua tulioso le tina na aafia, o lana tama teine ma le pepe a lana tama teine i totonu o le latou taavale o le a fo’i i le fale, o le taimi lea na oso ai Latu i totonu o lana taavale, ua faaola, ma alu atu ua so’a le ta’avale a le aiga na aafia.

 

“O le itu e pito sili ona matuia ai le gaioiga a Latu sa faia, e le na o le faatasi ona ia so’aina le taavale a le fafine ma lana fanau, ae faatolu lelei, ma o nei ituaiga amioga sa matua lamatia ai le saogalemu o le tina ma lana fanau i lea aso, aemaise lava i le pepe laititi sa i ai i totonu,” o le faafinauga lea a Graf ma ia talosagaina ai le faamasinoga ina ia faa falepuipui Latu mo le 30 aso, ina ia fai ai ma lesona le mea sese sa ia faia.

 

Na taua e le itu a le malo e faapea, e tupu le faalavelave i le aso lea, o lo o galue Latu o se fesoasoani faapitoa i le ta’ita’i o le aulotu, ma o lona tiute sa tatau ona faia, o le faafilemu o ni feeseeseaiga e tula’i mai i le va o tagata ekalesia, ae le o le solomua ia te ia le faatupu o le vevesi.

 

Na faatoese Latu i luma o le faamasinoga e tusa ai o le solitulafono sa ia faia, ma ua ia lagonaina fo’i lona salamo moni.

 

Sa ia talosaga i le faamasinoga mo se avanoa e faaauau ai pea ona latou mafuta ma lona toalua ma le la fanau e toa 6, ae aua ne’i lokaina o ia i le falepuipui. Sa ia faamaonia foi i luma o le faamasinoga, ua maea ona toe teuteu lo latou va ma le aiga o le latou aulotu na latou vevesi, ma o lea fo’i ua latou toe mafuta fiafia faatasi.

 

Na tulai le tama teine a le fafine na aafia ma ia faamaonia i luma o le faamasinoga, ua uma ona teuteu le latou va ma Latu, ma o le taimi nei ua pei lava o ia o sona tuagane, ua sili atu foi ona mafana la latou mafutaga i le taimi nei nai lo le taimi ae le’i tula’i mai lenei faalavelave.

 

Na taua e le alii loia fautua ia Joel Shiver na tula’i mo Latu e faapea, na matua tete’i le aulotu atoa ina ua tula’i mai le faalavelave lea ua mafua ai ona molia Latu i le tulafono, ona e le o ia o se tagata e faapea ni ona uiga e faaalia i totonu o le ekalesia.

 

Na pau le itu na taua e le alii faamasino sili ia Michael Kruse o lo o sili ona mamafa i le silasila a le faamasinoga, o le so’a e le ua molia o le taavale a le aiga na aafia ae o lo o i ai ma se pepe i totonu, ma e laki e le’i tula’i mai se faalavelave e ono sili atu ona matuia i lena aso.

 

E 5 tausaga na manatu le faamasinoga e loka ai Latu i le toese, atoa ai ma lona totogiina o le salatupe e $2,000, peitai ua manatu le faamasinoga o le a faamalumalu le tuliina e le ua molia o lea faasalaga, ae o le a nofovaavaaia o ia mo le 5 tausaga i lalo o poloaiga a le faamasinoga.

 

O nisi o ia poloaiga e aofia ai lona tuliina o masina e 20 i le toese, peitai ua manatu le faamasinoga ua lava na o faaiuga o vaiaso sosoo e 10 e taofia ai o ia i le falepuipui, ae o le isi vaega o lo o totoe ai i lana faasalaga o le a faamalumalu, fuafua lava i lona usitaia o isi poloaiga ua tuuina atu.

 

Ua poloaina o ia ina ia auai i ni aoaoga e fesoasoani ai i le tulaga o le ita, ma ia aua nei ona toe soliina se isi tulafono a le malo.