Ads by Google Ads by Google

FA’AI’U FALEPUIPU FUSU’AGA ALI’I AVE PASI TO’ALUA

O alii ave pasi e to’alua ia na fufusu i le maketi i Fagatogo i le taeao o le aso Lulu na te’a nei, e mafua mai ona o pasese i luga o le auala, na faai’u le la fusuaga i le toese i Tafuna ma tutula’i ai loa i luma o le faamasinoga faaitumalo i le taeao ananafi.

 

O alii ave pasi e toalua na aafia e aofia ai Iamafana Malo ma Sio Olomalii, lea ua toe tatala i tua e le faamasinoga i lalo o tuutuuga e faatali ai le isi aso lea ua faatulaga e toe fofogaina ai le la mataupu i luma o le faamasinoga.

 

O se tama’ita’i sa fa’atali sana pasi i le maketi i Fagatogo, na ia vaaia alii ave pasi e to’alua o lo o fufusu ma ia viliina ai loa le Ofisa o Leoleo mo se fesoasoani, ma aga’i atu ai loa leoleo ma ave alii ave pasi i le Ofisa mo suesuega.

 

O le vevesi na amata mai ina ua alu atu le pasi a Olomalii ma liliu mai i Pava’ia’i, ae o lana pasi e fealua’i i Leone, ma na avea le gaioiga lea a Olomalii ma itu na ita ai le alii o Malo.

 

Fai mai Malo, o le gaioiga a Olomalii na fai e le tusa ai ma le tulafono.

 

Na taua e Malo i leoleo e faapea, ina ua taunuu atu lana pasi i le maketi i Fagatogo, sa ia vaaia ai le pasi a Olomalii o lo o paka mai ai, o lea na savali atu ai loa ma tu’i loa o ia.

 

Ae ina ua fesiligia Olomalii e leoleo e uiga i le faalavelave na tupu sa ia taua ai e faapea, na faateia o ia a’o nofo i totonu o lana pasi ma faitau ana tupe ina ua oso atu Malo ma osofa’i loa o ia e ala i lona ta tu’iina o ia.

 

Fai mai Olomalii, talu ai ua le mafai ona ia tatali osofaiga a Malo, o lea na ia faasaga atu ai loa ma avau loa ma la fusuaga.

 

Na tofu uma alii ave pasi ma manu’a i o la foliga, o lea na mana’omia ai le auina atu o i laua i le falema’i i Fagagalu mo togafitiga, ina ua maea a la togafitiga, na auina sa’o ai loa i laua ma taofia i le toese i Tafuna, e faatali ai le taimi na auina atu o i laua i luma o le faamasinoga i le taeao ananafi.

 

Na tau fai teena e Malo ma Olomalii moliaga o le faatupu vevesi i nofoaga faitele ma le faaoolima i le tulaga tolu faasaga ia te i laua, ina ua la tutula’i i luma o le faamasinoga faaitumalo i le taeao ananafi.

 

O le masina fou lea ua toe tolopo i ai faamasinoga o i laua nei, ae ua poloaina i laua e le faamasinoga ina ia aua ne’i o la toe faatupuina se vevesi i soo se taimi, a ia tausi le filemu i taimi uma.