I le aso 14 &15 o Fepuari, 2013 na fa’ataunu’uina ai le fa’amoemoe o le pa’ia o le Aiga Sa Tuato’o o Alofau, ina ia fa’afotuova’aulu le tofa Tuato’o Reese i lona afio’aga ma le itumalo o Sa’ole.

O le sauniga pa’ia mo le fa’apa’iaga o le nofo sa fa’ataunu’uina lea i le Malumalu Metotisi i Alofau lava i le aso Tofi, 14 Fepuari, 2013 i le itula e 4:00 i le afiafi. Na soso’o lea ma le taliga e le aiga o le vasega o Failauga ma Fa’afeagaiga Taulagi o le afioaga, Failauga o aiga i ona itu tetele ma ona itutaulagi, fa’apea fo’i ma fa’aaloaloga mo i latou uma na aofia fa’atasi i lea fa’amoemoe maualuga, na fa’apa’iaina ai le Nofo ma le Tausi i le la’ua ekalesia i le afio’aga.

I le taeao loa na soso’o ai, na fa’atumulia ai le Malae i Aloitafuna, le mea e afio ai le Faumuina, susu o Anoalo, Usoali’i ma aiga ma le Tama’ita’i fa’apea le mamalu o le afio’aga i Alofau, i le i le pa’ia maualuga o le Itumalo, fa’apea Aiga aua o le toe aso nai Moamoa i le fa’amoemoe.

O le taeao o le fesilafa’iga i le pa’ia o Aiga o le Nofo fa’apea le pa’ia maualuga i le Paolo, le aiga o le tausiali’i Alapasa Petelo Tino - Tuato’o. Na masi’i fa’aaloalo mai le aiga tina o le Tausiali’i o le ma’au’au mai lea o le afioga le Sa’ousoali’i, fa’apea ona faleao ma ona falemagafa e fia. Ae tumalae ai fo’i le tofa Taesaliali’i ma Taesaliali’i ma o le mamalu lava lea ia i la’ua le launiu na saelua, ma le pa’ia i le Malaeoletalu.

Ina ua mae’a le taliga o Paolo ona e’etai lea o pa’ia o le Itumalo o Sa’ole i ona tupu ma ona e’e i le Maota i Faleteine i Aloitafuna lava, e saunia mo le usualele e tapa ipu ai le tofa Tuato’o Reese Tautalatasi Tuato’o.

O a’ao o ponao’o o le Sa’ole sa latou fa’apa’iaina le Nofo ma le Tausiali’i ma sa fa’afofoga fo’i le itumalo i se fanoga o le Nofo a’o le’i tapa ipu, “o le tautua ma le alofa lava i le aiga, nu’u ma le itumalo” le ‘au’au o lana nofoa’iga.

O le tofa Tuato’o Reese sa mua’i avea ma matai tulafale i lona puiaiga o Mata’utia Vaiula Tuato’o lea na fa’asuafaina ai o ia ia “Faleleifi” peita’i, ina ua vala’auina aiga uma ma faletama o le suafa “Tuato’o” e fono ia Aukuso 25, 2012 sa latou filifilia ai lava ma Tuato’o Reese e tapa lana ipu ma sauni e tau’avea le suafa mo le aiga potopoto.

O le tofa le Nofo, Tauto’o Reese, o se ali’i Foma’i i gasegase i le tatou falema’i tele i Faga’alu, ua atoa fo’i le 19 tausaga o lea tautua. Sa ia fa’ailoa, “Sa ou taumulimuli lava i si uso o lo’u tama sa matele ina avea ma se tasi ou te tepa taula’i i ai i lo’u ola auauna ma tautua i tagata lautele, aiga ma le nu’u, le afioga Muagututi’a Vaiula Tuato’o, fa’afetai, ua malolo mai o ia, ae o i ai se isi o si matou aiga e fa’aauaua fo’i lea tautua mo le lautele o tatou tagatanu’u.”

Na matua sua fo’i le aulapa tai ma le aulapa uta e lana tofa le nofo ma aiga, ina ua talitoga le itumalo, ma sa fo’i le pa’ia o i latou fa’apea Samoa na atoa i Aloitafuna i fa’aaloaloga a lana tofa ma le pa’ia o aiga, i ona itu tetele ma ona itu taulagi.