Ads by Google Ads by Google

FA’AFOTUALI’I LE AFIOGA MULIAGATELE MELEISEA SAULO

LANO: FA’AFETAI MULIAGA MA VUI I LO OULUA ALOFA TULA’I

O le afiafi o le aso Lulu na te’a nei i le maota o Vui Seigafolava Folole Saulo, i le malae i Tala o Lupelele i Kokoland, na Faafotuali’i ai le afioga ia Muliagatele Meleisea Saulo, i se sauniga faapitoa na amata i le sauniga lotu, ma soso’o ai loa lea ma le tapaina o le ipu o le faamoemoe.

O le faaeeina atu o le suafa Muliagatele mai le afioaga o Lano i le afioga ia Meleisea Saulo, o se  tofa na a’e i le paia o le afioaga, o le afifio lava lea o Paia o Aiga Satuala, afioga i Maopu, Alo o Vaa Fusuaga, susu ai le susuga Su’a, alalata’i Matua Fetalai ma le Faleupolu o Salemuliaga, ina ia to atu sa latou matu palapala e faafetaia ai le agalelei o le afioga Meleisea, i le tausiga o le au malaga a le afiioaga, a’o nopia’i ai le teritori nei, ona o le valaaulia e faafiafia i le fu’a a Amerika Samoa.

Na taua e le fofoga o le afioga ia Malaeulu Amoni i le Samoa News e faapea, o aga faapenei o faiga masani lava ia a le afioga e fai, pe afai latou te maitauina se tagata ua tele lona alofa i le nuu, ona to lea i ai o se matu palapala.

“O aga masani nei a le afioga e tali atu ai i se faaaloalo ma le alofa tula’i o se tagata ua sasa’a mai lona tamaoaiga mo le nu’u, ma ua feinu ma malilie ai le nu’u, ua aai foi ma maoona,” o le saunoaga lea a Malaeulu.

Saunoa Malaeulu e faapea, talu lava ona latou taunuu mai i le uluai aso o le faamoemoe seia oo mai i siui o le latou mafutaga, e le’i faata’eta’e aluga le tautua a le afioga Muliaga ma le faletua, le afioga ia Vui Seigafolava Folole Saulo i le tausiga o le au malaga a le afioaga,” o le saunoaga lea a Malaeulu.

Na faatumulia le maota i le Tala o Lupelele i le paia o le afioaga na malaga mai, atoa ai aiga ma tama fanau a le afioga o loo aumau ma nonofo i Amerika Samoa nei, i le molimauina o lenei faamoemoe.

O upu tomua na saunoa i ai Suafa o le afioaga, ma faapena foi ona fetalia’i saunoaga masani i totonu o le maota ina ua maea le sauniga lotu puupuu na tapena e le alii faifeau, lea na ia faatauaina ai le taua o le tofi matai mai le Atua, e tausi ai aiga ma le atunuu.

Na maea lea ona sosoo ai loa lea ma le tapaina o le ipu o le saofa’i a le afioga Muliaga, a’o ia laei mai i ona laei faapitoa mo taimi e faaee atu ai suafa matai i le soifuaga faa Samoa moni.

Saunoa Malaeulu, o le toina atu e se afioaga o se matupalapala i se tagata, ua faailoa atu ai i lea tagata le agaga faafetai o le nuu ona o le alofa tula’i sa sasa’a atu e ia ma lona aiga i lea nuu.

“E faapena le agaga o le afioaga nei, i le paia o Aiga Satuala, ina ua faamalieina o matou loto i le faaaloalo ma le alofa tula’i na tuuina mai e Muliagatele ma lona aiga mo i matou, e leai se  faaletonu i mea uma sa matou faia, amata mai lava i le uluai taimi na matou taunuu mai ai seia oo maii le aso mulimuli,” o le saunoaga lea a Malaeulu.

“O le matu palapala fo’i lea ua toina atu mo Muliagatele, o le faailoga lea o le matou sootaga e le toe motusia e faavavau, poo fea lava e aga’i i ai le nuu, pe malaga mai iinei, pe afio atu foi Muliaga ma lona aiga i Savai’i, o le a matou feiloa’i pea ma mafuta  faatasi, ina ia faamautuina ai pea le pine faamau o le mafutaga lea ua saga faamausaliina i le aso (aso Lulu na te’a nei).

O le maea ai o le saofa’i i lea afiafi, na alo atu ai loa le afioga i le latou faamavaega ma le afioga ia Muliagatele ma lona aiga, ma faai’u ai loa i faafiafiaga faa Samoa, lea foi na muliaga le latou faafiafiaga lea na fai i le aso o le fu’a i a latou faafiafiaga ia na faaali i lea po.

Na vaaia le laufofoga fiafia o tagata uma o le malaga ao i ai i le teritori nei. Fai mai le isi tina sa sau i le malaga, “afai o le tulaga lea o le a i ai le soifuaga i aso uma, o le tolu o aiga malolosi i le aso, o lona uiga e le toe misi ni malaga faapenei e alu i ai,” e fai lava tala ia a le tina lea ma soisoi.