FA’AFOTU ALI’I AFIOGA TAMA A LE MALO IA AUMOEUALOGO TE’O J. FUAVAI

Na faatumulia le malae i Lalotavai ma le maota i Agaolei’a i le aso ananafi, i paolo tupu na lolofi atu latou te molimauina le Fa’afotu Ali’i o le afioga a Aumoeualogo Te’o J. Fuavai le Tama a le Malo, i se sauniga lotu na taitaia e le afioga Patele Viane Etuale i le Malumalu a le Ekalesia EFKAS i Aoa.

 

Na maea le sauniga lotu ona sosoo ai loa lea ma le sauniga o le faapaiaina o le nofo, lea na faapaiaina e le vaega o Toeaiina o le EFKAS i Aoa, o le susuga ia Rev. Elder Fiti Aofia ma afioga i Patele sa aofia ai, ae o le afioga a Patele Moseniolo Etuale na faia le tatalo o le faapaiaina o le nofo, lea na sosoo ai loa ma le sauniga o le Eukalisitia ae faaiu i le sauniga o le Komenio.

 

O fa’aaloaloga masani faaleaganuu sa faia ina ua maea le sauniga lotu, e aofia ai ma le tamafataga mo paolo ma le mamalu o aiga.

 

Tautua:

 

 I le pa’ia o Aiga, afio’aga ma le Itumalo fa’apea le Malo ma le atunu’u atoa, sa mua’i fa’asuafaina ai Aumoeualogo J. Fuavai i le suafa “Te’o” i le tausaga e 1967. O lona suafa matai muamua lea na lauiloa ai lana tautua i le atunu’u, malo ma lona afio’aga ma aiga.

 

Na fa’ato’a tu’ua e ia papa ia ina ua i ai le finagalo o Aiga ina ia tau’ave e ia le suafa “Aumoeualogo” i le tausaga e 2012. O lona uiga, 46 tausaga sa ia tautua ai i lea suafa.

 

Mai lona soifua galue i le Malo Amerika Samoa ma ona tagata, sa amata mai lana ulua’i galuega i le avea ma tagata faigaluega i le Ofisa o Tiute, soso’o ai ma le avea o ia ma Taitai o le Ofisa o Tuite. Soso’o lea ma le nofoia e ia o le Nofoa o lona Itumalo i le Maota o Sui a le Fono faitulafono mo tausaga e tele. Ona ia mauaina lea o le tofi Fofoga Fetalai o le Maota o le fono faitulafono mo ni tausaga.

 

Soso’o ma le avea o ia ma Senatoa o le Itumalo mo nofoaiga e tele fo’i. I le faigamalo a Kovana Uifa’atali Kolumane ma le Faigamalo a Kovana Tauese Sunia sa avea o ia ma Komesina o Leoleo. O ia lea sa ia sisiina le fu’a o le atoaga o le 100 tausaga o le faigamalo a Amerika Samoa o se teritori o Amerika.

 

E tele Komiti Eseese o le Malo ma le Fono Faitulafono sa se’ei ai fo’i lenei Tama ma faufautua ai. Peita’i, mai le tele o Kovana Samoa sa tautuaina le Malo o Amerika Samoa, sa avea o ia ma Taitai Komiti o Kemupeni Fa’aupufaiomalo a Kovana Uifa’atali Pita Kolumane, Kovana Tauese P.F. Sunia ma Kovana Togiola Talalelei Tulafono.

 

O ia lava o le “Tama a le Malo” i ona tafa e fia, ma ua agatonu ia te ia le fa’alagiga ua toina e le Atua na te pale ai i lenei fo’i vaitau o lona soifua auauna i lona malo ma le Galuega ale Atua, ae o lana tautua fo’i i ona tagata, afio’aga ma ona Aiga.

 

Peita’i, o se toe upu a le Taitai o le Sauniga o le fa’apa’iaga o lana nofotupu i le aso ananafi, sa fa’apea ai Patele Iosefo Timu, “O le afioga le Tama o le Malo o le Atua, Aumoeualogo Te’o J. Fuavai ma le Faletua o Fatuiva Fuavai.”

 

I le aso o le a o’o ai le afioga le Tama a le Malo i lona Afio’aga, Itumalo ma Samoa o le a atoa i Lalotavai ma le Maota i Agaolei’a. Ua mae’a tapena fo’i le afioga le Augafa’apae Fa’asilitama’ita’i Annie Fuavai i ona faiva i le Usualele a le Itumalo ma Samoa atoa, ae o Tupua Pooch Ta’ase ma le aumaga i le agaia o ava, ae se’i tapa ipu a Fasialepia i lona itumalo.

 

O se isi tofiga sa iloga ona taofi mamau e lana afioga le Anavaotaua se’ia o’o mai ua avea nei ma Tama a le Malo, o lona tofi Fa’atama o le Fa’agatama o le Lakapi i Amerika Samoa, o ia lava sa ta’alo mai le Fagatogo Blues a’o talavou.

 

Peita’i, i lona soifua mai, na soifua a’e i Ta’u, i le Manu’atele ia Novema 24, 1936 i ona matua o le ali’i Faia’oga o Lavata’i Fauvai mai Ofu, Manu’a ma lona tina o Tupea Gaoa Fuavai mai Ta’u Manu’a.

Comment Here