Ads by Google Ads by Google

Fa’afo’i mai Fanua o Satapuala

E vevesi Samoa i le fa’amanatuina o lana Sisigafu’a lona 50 o se atunu’u Tuto’atasi, ae vevesi le afio’aga o Satapuala e fa’amautu le latou mau, ia toe fa’afo’i atu laufanua ma eleele o Satapuala, ua ‘ave solitu e Niu Sila, ma soloa’i ane ai fa’amatu’u atu i le Esetete Tausi a le Malo Tuto’atasi o Samoa, ae molo’aua ai le maliliega i le amataga, e toe fa’afo’i mai eleele o Satapuala pe afai ae mae’a fanoga o le Malo o Niu Sila sa latou mo’omia ona fa’aaoga ai laufanua ia.

E to’atolu lava matai iloga o lea afioaga lea sa tutu malosi mo lea mau e aofia ai Va’ili, Toeolesulusulu  Cedric Schuster ma Muagututi’a A. To’alepaiali’i. I le tulua o po ma ao o le aso tonu o le 50 tausaga o le faigamalo fa’amalo Tuto’atasi a Samoa, amata loa ona alaalata’i le pa’ia maualuga o le afioaga o Satapuala e afua mai le faitoto’a o le Malae Va’alele i Faleolo, ina ia tima’i le pa’ia maualuga i le Malo, e afua mai i le malo o Niu Sila se’ia o’o mai i le faigamalo a Samoa e tusa ai o le latou mau.

O nei eleele sa ave’esea mai i le taimi o pulega fa’a-Kolone  e afua mai i taimi o Siamani, se’e mai ai ia Niu Sila sa va’ava’aia, ae o Peretania sa latou fa’amalumalu maia. O le faitoto’a fo’i o le lotoa a le malae va’alele tele i Faleolo, sa fa’atuina ai le nofoaga maoti mo lea mau, ma sa faia ai i’ina le fa’atalanoaga a le afio’aga o Satapuala i luga o Nusipepa ma Leitio.

Sa latou augani mai, ia fa’atulaga sa’o e Siamani, Niu Sila ma le malo o Samoa Tuto’atasi lea mataupu ua latou fa’ailo mai mo se fa’ai’uga tonu.

Ua le gata ai le latou augani i le Malo Tuto’atasi o Samoa, ae ua latou fa’asalafa le latou vala’au i isi fo’i afio’aga o lo’o toina ese fa’apea o latou eleele e le Malo ma tu’ufa’atasia i lalo o le feagaiga fa’aeleele po’o Esetete Tausi a le Malo ma ua soloa’i nei ona fa’aigoaina o Komisi o Eleele ua i ai nei.

Ona o lenei mataupu ua tautalagia i taimi ua tapunia ai Ofisa uma o le Malo, ona o lo’o fa’amanatuina le sisigafu’a lona 50 a le Malo o Samoa, o lea ua le mafai ai ona maua se fa’amatalaga aloaia mai sui o nei Komisi o Eleele o le malo e tusa ai o le fanoga o Satapuala.

Ona o lo’o auai fo’i ma le Sui i le Palemene o lea itumalo i lenei mau, le susuga Toeolesulusulu Cedric Schuster, o lea ua fa’ailoa ai e i latou, “O se mataupu lenei e ao lava ina toe taga’i toto’a i ai le Komisi Tofia O Ele’ele ina ia mautinoa ua tonu ala uma e fa’atautaia ai mataupu a le Malo Tuto’atasi o Samoa.”

Ua fa’ailoa e Schuster, “O le tele o ele’ele sa avea fa’apea e le Malo o Siamani ona o ana pulega fa’a-Kolone, ua toe fa’afo’ia i nu’u ma ua fa’atulaga e pei oni eleele fa’atau ma’oti ese e le Malo, peita’i, o Satapuala ma ona eleele faapea fo’i ma isi nu’u, e le’i toe fa’afo’ia maia latou eleele.”

 O le afuaga tonu lava o le sasi mai ona taulimaina o nei eleele, ua fa’ailoa mai, i le taimi ua se’e ai ia Niu Sila le va’aiga mai o Samoa, sa avea ai nei eleele uma o ni eleele ua a’afia i Defence Ordinance i le tausaga 1939, peita’i, ina ua mae’a le taua, sa tatau ona toe se’e sa’o mai eleele nei i afioaga e ona eleele, ae o’o ane i lea taimi ua to’ele Siamani i le taua, suia loa e Niu Sila lea vala o le tulafono, ma ua o’o mai ai i le muta’aga o le pulega fa’akolone a Niu Sila, se’e sa’o eleele o Satapuala ma ia afio’aga o lo’o latou afaina tutusa, i le Malo o Samoa i lana o lana Esetete Tausi o Samoa i Sisifo - WESTEC.

Ua fa’ailoa mai e ta’ita’i o lea afio’aga, “E tusa ma le 60% o latou eleele galue ua avea atoa i lenei maliliega fa’afaigamalo, ae leai se leo o Satapuala i le mataupu atoa.”

 Ua fa’ailoa mai fo’i e i latou, “I so’o se taimi lava ua taumafai i latou e u’unaia lenei mataupu i le faigamalo a Samoa, ae ua latou fa’alala mai le latou aiaiga fa’apitoa lea ua mae’a fa’ataoto mo le afio’aga o Satapuala, peita’i, i lea lava aiaiga fa’ataoto, ua leai ma se mea e mafai ai e Satapuala ona ta’ua nei eleele o ni eleele o latou tua’a ma latou aiga ua mavae, ma o i latopu e ona nei ele’ele.”

Na fa’ailoa e ali’i ma faipule o Satapuala, “E sili ona malamalama lelei ai lava Amerika i le matou mau lenei, aua o le taimi na taumafai mai ai le Malo o Amerika e sua le soso’oga o le Malae Va’alele olo’o i ai nei i Faleolo, na matou laina atu ai fo’i ma le mau lava lenei ma sa latou fa’ailoa ai, e moni lo matou agaga.”

Peita’i, ua fa’alogoina e ali’i ma faipule o Satapuala ua toe fuafua le isi galuega tele lava i le afio’aga i nei eleele o lo’o avea fa’apea, ua fa’alogo atu, ua toetoe amata sua le eleele mo le fa’alauteleina o le falema’i fa’aitumalo i lea itu o le atunu’u.

saunia: Leua Aiono Frost