Ads by Google Ads by Google

Fa’afiafiaga o le Sisigafu’a

Ua mae’a fa’asalalauina le avanoa e lesitalaina ai so’o se Autalavou, Fa’alapotopotoga ma Ekalesia fo’i e fia fa’aalia ni a latou Fa’a-fiafiaga Fa’asamoa i le vaitaimi o le Sisigafu’a 2012 a le tatou nei malo.

O lea fa’afiafiaga ua fa’atulaga e faia ia Aperila 11, 12 ma le aso 13 i afiafi e pei ona masani ai i tausaga ta’itasi, ae mana’omia lava fo’i ona mua’i pasia lelei fa’ato’a mautinoa lea o se avanoa lelei mo lau ‘au fa’afiafia.

I se talanoaga vavalalata ma le Ofisa o le Arts Council i Fagatogo, ua fa’aalia ai e se sui fa’asalalau o lea Ofisa e fa’apea, “E pau lava le mea muamua lea ua faia o le fa’atulaga o le Lesitalaina o Aufa’afiafia. O lona lua o mea e ao ina faia, o le faia lea o se ulua’i fonotaga ma sui ta’ita’i o nei au fa’afiafia ua mae’a lesitalaina. O i’ina la o le a talanoaina ai loa ituaiga o fa’afiafiaga o le a fa’atautaia i afiafi nei e tolu ua patino mai mo la tatou polokalama fa’apitoa o le fa’amanatuina o le 112 tausaga o le Sisigafu’a a Amerika Samoa.”

O le fonotaga lea, o le a logoina mai sui patino ua mae’a tusia o latou suafa i le lesitalaina o le igoa o le au fa’afiafia, ma e le o toe mamao ae faia lea fonotaga ina ia vave tapena i ai le au fa’afiafia.

Ua fa’ailoa mai fo’i, o le tausaga nei o lo’o folifoli ai ma tapena se au fa’afiafia a le tatou Malo e malaga atu mo le “Pacific Festival 2012 i le Atu Solomona,” e faia lea ia Iulai 13 e amatalia ai, a e lua vaiaso atoatoa o i ai i latou i Solomona mo lea fa’amoemoe.

Ona o lenei le toe fa’aaliga o tu ma agaifanua a Samoa i lo tatou nei lotoifale, o lea ua manatu ai fo’i le fa’atonu, e ui ina ua i ai nisi o au fa’afiafia ua mae’a manatu i latou ina ia tapena mo le fa’amoemoe lea, ae mafai lava ona toe soloia lea fa’ai’uga, ae toe liua le vaiosina i finagalo filifili o le aumalaga e masi’i, pe va’aia se tapenaga sili ona ‘auro’ i le maimoa a le Komiti.

O lona uiga, aua le fa’atemeteme i lou fa’amoemoe, ae matua tapena lelei lau au fa’afiafia mo lea fa’aaliga i le sisigafu’a, e te’i lava ua mautinoa ai i’ina lou masi’i atu i Solomona e avea ma sui fa’afiafia o le tatou malo.