Ua fa’aalia e ni isi o aiga o le atunu’u na a’afia o latou tagata i le siama o le gasegase o le ‘amoeba’ lea e mafua ai le fa’ama’i o le ‘Manava Tata’, po o le ‘diarrhea’ i le gagana peretania, galuega fesoasoani sa mafai ona ofoina atu e le Pulega o le Eletise ma le Suavai (ASPA), lea ua mafai ai ona fa’aleleia isi manaoga sa tula’i mai i totonu o latou aiga.

O galuega fesoasoani na taua e ni isi o nei aiga sa ofo fua atu e tagata faigaluega a le ASPA, e aofia ai le fa’apipi’i fua o paipa i totonu o latou fale taele ma umukuka, fa’apea ai le maua fua atu o ofe e toso ai paipa mo latou aiga.

“Ua le mafai e upu ona fa’amatalaga lagona o le fiafia ona o le fesoasoani sa mafai ona maua fua mai e a’u ma lo’u aiga mai le ASPA, o mea sa le mafai ona fa’atau ona o le mativa ma le lima vaivai, a o lea ua maua fua i se auala fa’afuase’i, e avatu ai le fa’afetai i le pulega a le ASPA ona o lenei fesoasoani,” o le saunoaga lea a le tama o Tanielu Fiso o Pago Pago i se talanoaga ma le Samoa News i luga o le telefoni i le vaiaso nei.

Na taua e le susuga Fiso e fa’apea, o lona atali’i e 9 tausaga na a’afia i le Manava Tata i le amataga o le masina o Me, ina ua amata ona pipisi le fa’ama’i lenei i le atunu’u, ma fa’anatinati atu ai loa i le falema’i mo se lavea’i.

O ‘auga na a’afia ai si ona atali’i na talafeagai lelei ma ‘auga na fa’alauiloa mai e le Matagaluega o le Soifua Maloloina i le latou asiasiga ma se polokalame sa ia fa’alogologo i ai, ma ia iloa ai loa, o totonu lava o le latou aiga e afua atu ai le fa’aletonu ua mafua ai ona a’afia si ona atali’i, peitai o le itu lelei e pei ona taua, ua mafai ona toe foia le fa’aletonu i totonu o le umukuka ma le fale taele, atonu o le a le toe tula’i mai se isi fa’aletonu i le lumana’i.

O le susuga Fiso e le faigaluega, ae o le fa’atoaga lava e ola ai si ona aiga ma tausi ai le la fanau e to’a 7, sei vagana ai le tina o le aiga fa’atoa 4 tausaga talu ona faigaluega i le kamupani i’a o le StarKist Samoa i Satala.

O se lagona lava fo’i lea na mafai ona fa’aalia e le tina o Makerita Aifo’i o Tafuna, ina ua ia fa’afeso’ota’i le ofisa o le Samoa News i le fa’aiuga o le vaiaso na te’a nei, ma ia fa’ailoa mai i ai lona agaga fa’afetai i le pulega a le ASPA, ina ua mafai ona toe fa’aleleia fa’aletonu sa tula’i mai i totonu o le latou aiga i le umukuka ma le fale taele.

Ina ua fesiligia le tina ia Aifo’i i le tulaga o le gasegase o le manava tata, sa ia taua ai e fa’apea, o lona atali’i e 11 tausaga na a’afia i le fa’ama’i, ma taofia ai i le falema’i i Fagaalu mo aso e 3.

Sa ia taua e fa’apea, o fa’aletonu na mafua ai ona a’afia lona atali’i e afua atu lava i totonu o le latou aiga, ae o se itu fiafia ina ua mafai ona toe fa’aleleia vaega sa fa’aletonu i totonu o le aiga.

E leai se feso’ota’iga a le ASPA ma le fa’ama’i e pei ona tula’i mai o le manava tata, e pei ona fa’amaonia e le Pulesili o le ASPA ia Utu Abe Malae, i se fonotaga sa faia a Tusitala ma sui o le Matagaluega o le Soifua Maloloina i le masina na te’a nei, i le tau sailia lea o ni auala e fa’aitiitia ai le pipisi o le fa’ama’i o le manava tata i le atunu’u.

Na fa’ailoa e Utu i lea fonotaga e fa’apea, e 50 aiga mai le silia i le to’a 160 na faamaonia le aafia i le faamai lenei i le masina o Me, ua maea ona filifili e le ASPA o le a latou fesoasoani i ai, e ala i le fa’aleleia o paipa i totonu o fale taele ma umukuka, ina ua fa’amaonia i suesuega sa faia a le Soifua Maloloina, o le tulaga maualalo o le soifuaga o lo o ola ai ni isi o aiga na a’afia, o le isi lea mafua’aga o le a’afia o latou tagata i le siama o le fa’ama’i.

Na taua e se sui sinia o le ASPA i le Samoa News, ua maea ona faatinoina le galuega fesoasoani a le latou vaega i aiga na aafia, e ala i le fa’aleleia o paipa e toso ai le suavai i totonu o le fale taele faapea ai ma le umukuka i le vaega e kuka ai meaai.

Ina ua fesiligia le fa’atonusili o le Soifua Maloloina ia Motusa T. Nua i se tulaga ua i ai le fa’ama’i lenei, sa ia taua ai e fa’apea, ua aga’i atu lava ina leai ni isi i totonu o le atunu’u e toe ripotia mai le a’afia i lenei gasegase.

Sa ia fa’afetaia galuega sa fa’atinoina e vaega uma o le malo na galulue fa’atasi mo le tu’uina atu o le feau i le atunu’u, aemaise ai le tautua le malolo a le au fa’asalalau i leitio, televise ma nusipepa, ua mafua ai ona maua e le atunu’u fa’amatalaga e fa’atatau i auala e tatau ona faia, ina ia puipuia ai le saogalemu o tagata i totonu o aiga.

Saunoa Motusa e fa’apea, o le galulue fa’atasi o tagata uma mo le fa’atinoina o se galuega, o iina e atagia mai ai se malo e pele i ona ta’ita’i tagata uma.