Ads by Google Ads by Google

Fa’afetaia ni isi atunuu suiga ua faia e le ASPA

E to’atele ni isi o le atunuu ua faaalia lo latou faafetaia o ni isi o suiga laiti ua faia e le Faalapotopotoaga o le Eletise ma le Suavai, le ASPA, e ala i le faaitiitia o ni isi o totogi o a latou tautua sa masani ona totogi e le atunuu.

 

Na faateia ni isi o le atunuu ina ua latou asia lala o le ASPA i lenei vaiaso, ae o latou maua ai le tala fiafia, o le $5 lea sa masani ona totogi pe afai e fia faatau sau iunite mo lau mita (debit meter) ae ua tapuni le Ofisa mo taimi faigaluega, ua faaitiitia nei i le $2.

 

Na taua e le tina o Penelope Schuster o Faleniu e faapea, o le faaitiitia e le ASPA o le $3 mai se tasi o ana tautua sa mafai ona totogi e le atunuu, o se faamama avega tele lea mo ia ma lona aiga.

 

“Pe fai mai e na o le $3 le tupe lea ua faaitiitia, ou te molimau atu o se tupe tele lea ua aveese mo a’u ma lo’u aiga,” o le tala fiafia lea a Schuster ina ua fesiligia e le Samoa News i le aso ananafi.

 

“Maimau pe ana faapea e tipi atoa le $5, ui o lea, atonu o le a faasolosolo atu lava ona faaitiitia ai ma isi tautua a le ASPA mo le atunuu, ae o se suiga lelei ma taua mo a’u ma lo’u aiga,” o le isi lea saunoaga a Schuster.

 

O le lagona foi lea na faaalia e le susuga a Jacob Falana’ipupu o Tafuna ma Victor Apelu o Pago Pago, ina ua fesiligia e le Samoa News e tusa ai o lenei mataupu.

 

“Manaia lenei faamama avega ua faia e le ASPA mo le atunuu, ou te iloa o le a faaauau ai lava lenei tautua e ala i le faaitiitia o ni isi o tupe o lo o totogi e tagata totogi pili i le ASPA,” o le manatu lea a le alii o Apelu, o se alii ave taxi i se tasi o fale taxi i le taulaga.

 

Na faamaonia mai e se sui o le ASPA i le Samoa News ananafi e faapea, o le $5 lea sa masani ona totogi e tagata pe a faatau a latou ‘power credit’ i le tuana’i ai o itula faigaluega masani, ua faaitiitia i le $2.

 

Ina ua fesiligia le sui o le ASPA poo i ai se isi fuafuaga a le latou Ofisa e toe faia ni isi suiga i isi a latou tautua o lo o ofo atu mo le atunuu, na soisoi le molimau ma saunoa mai, “ou te le iloa i ai.”

 

O se tasi o tulaga faafiafia loto na taua e ni isi o le atunuu i le Samoa News, e lei pine lava ona molimau le pulega fou a le ASPA i luma o le fono ma latou folafola suiga o le a faia ae amata loa ona taunuu ni isi o suiga.

 

“A lea ua tatou vaai i le isi suiga lea mai le pulega fou a le ASPA, ou te tatalo atonu o se taimi o le masina fou e toe tuu mai ai se isi suiga mo tatou, o ai na iloa atonu e oo atu i le masina fou ua le toe totogiina e le atunuu le $12 mo le faamamaina o le suavai, aemaise ai foi o le faaitiitia o le tau o le eletise,” o faanaunauga ia a le alii o Tavita Filimaua o Aua.

 

Ina ua fesiligia e le Fono le pulesili fou o le ASPA ua i ai nei ia Utu Abe Malae e tusa ai o tautua a le ASPA i le atunuu, na saunoa ai le afioga i le matua ia Utu e faapea, o lo o taumafai o ia ma le pulega e vaavaai i ni auala e faia ai ni isi o suiga mo tupe o lo o totogi e le atunuu.

 

E ui e lei faamautu e Utu i luma o le Fono poo a tautua o le a faia i ai suiga, peitai sa ia taua, e tatau ona faaitiitia ni isi o tautua o lo o totogi e le atunuu i le ASPA, ina ia tuu mamaina ai tulaga o pili o lo o totogi e tagata.