E to’atele ni isi o tagata faigaluega a le malo ma kamupani tua ua fa’aalia lo latou fa’afetaia o le tautua a le Matagaluega o Leipa a le malo tele (USDOL), ona o le avanoa lea ua mafai ona latou fa’amalamalamaina ai i tagata faigaluega o le atunuu isi auala e mafai ona fesoasoani i le puipuiina ma le faamautuina o a latou avanoa faigaluega.

O le polokalame e pei ona fa’amalamalama e sui o le USDOL na malaga mai i le atunuu i le vaiaso na te’a nei, e fa’atatau i livi e mafai ona agava’a i ai tagata faigaluega i lalo o le tulafono e taua o le ‘Family and Medical Leave Act’ (FMLA).

O le tulafono lea e pei ona fa’amalamalama e le faatonu lagolago o le Ofisa o le DOL i Hawaii ia Min Kirk, e mafai ai ona ave e le tagata faigaluega aso livi ona o se manaoga faapitoa ua tulai mai i lona aiga i so o se umi lava, e aunoa ma le maimau ai o lona avanoa faigaluega po o le suia ai foi o le tulaga sa galue ai atoa ai ma lona totogi sa maua.

Na taua e le susuga a Foma’i Etemani, o se tama ua silia ma le 20 tausaga o tautua i le Matagaluega o aoga a le malo e fa’apea, o le taua o le polokalame a le DOL, ua mafai ai ona malamalama tagata faigaluega i isi a latou aia tatau o lo o i ai i lalo o tulafono e puipuia ai a latou galuega.

Na taua e se tina  ua 5 tausaga talu ona galuega i le matagaluega o tupe a le malo e fa’apea, o ni isi o tagata faigaluega e tele le fia ave o aso livi pe a tulai mai ni faalavelave i totonu o le aiga, ae faigata ona o le popole ne’i ma’imau ai lana galuega.

Ina ua fesiligia e le Samoa News i le aso Faraile na te’a nei, na taua e le tama’ita’i su’esu’e o le DOL ia Heather Skidmore mai le Ofisa i San Diego e fa’apea, o le taua o le aoaoga lenei ua mafai ona silafia e tagata faigaluega polokalame eseese o lo o faatulaga e le USDOL mo tagata faigaluega uma i totonu o setete ma teritori o le malo tele.

“O le taua o le tulafono lenei e fesoasoani ai i le tagata faigaluega i le taimi e tula’i mai ai se manaoga tupito i totonu o lona aiga po o ia fo’i, aemaise lava pe afai ua leai se livi ma’i po o livi tausaga a le tagata faigaluega o totoe, e mafai ona talosaga o ia i lalo o le tulafono lea pe afai e agava’a”, o le saunoaga lea a Skidmore.

Ina ua fesiligia e le Samoa News ia Skidmore po o ai tonu tagata faigaluega e agava’a i le tulafono lenei, na fa’amanino e le tama’ita’i su’esu’e e fa’apea, o le tagata ua silia i le 12 masina talu ona galue i lana galuega, ma ua ia ausia fo’i itula e 1,250 i totonu o le 12 masina o lana auaunaga.

“O le ki atoa o le polokalame lenei ia lelei le fesootaiga i le va o le tagata faiglauega ma lona pule, afai ua manaomia e le tagata faigaluega le tatau lea ona talosaga mo se livi, ia faamanino mafuaaga uma ua ala ai ona talosaga mo le livi, ia i ai fo’i ni faamaoniga o lana talosaga, e le tatau foi i le pule po o le kamupani o lo o galue ai le tagata ua talosaga ona teena le talosaga, pe afai e faamaonia o lo o agavaa le tagata faigaluega”, o le saunoaga lea a Skidmore.

Saunoa le Fa’atonusili o le Matagaluega o Tagata Faigaluega a le malo ia Sonny Thompson e fa’apea, o le a galulue faatasi lona ofisa ma matagaluega aemaise ai kamupani tua, mo le fa’amautuina atili o lenei mataupu.