E to’atele tagata matutua o lo o agava’a i lalo o le polokalame a le Ofisa o Tagata Matutua i le teritori (TAOA), ua latou fa’aalia lo latou agaga fa’afetai i le tulaga lelei ma le matagofie ua i ai le tautua a le Ofisa mo i latou, i le tele o polokalame eseese o lo o fa’atinoina i le taimi nei.

O ni isi o ia polokalame e pei ona saunoa i ai le to’atele o tama ma tina matutua sa fesiligia e le Samoa News, o polokalame e pei ona maua ai le avanoa e galulue ai tama ma tina i totonu o aoga, e ala i le fautuaina o fanau, o polokalame o lo o mafai ai ona latou maua avanoa faigaluega e galulue ai i le ta’i fa itula i le aso, aemaise ai o le suiga fou i le polokalame o taumafa vela.

Na taua e le tama matua o Peniata Alofipo e fa’apea, o le taua o polokalame eseese nei, ua mafai ai ona maua e tama ma tina matutua nai fa’amanuiaga tau tupe, e fesoasoani ai i le atina’eina o aiga.

“O lea lava e fa’aauau polokalame e pei o le galulue i tua i aoga, aemaise ai o le isi polokalame o lo o faigaluega ai mo itula ta’ifa i le aso, ma o nei polokalame uma, o lo o mafai ona maua ai e matou nei o tagata matutua nai fa’amanuiaga tau tupe e fesoasoani ai i aiga”, o le saunoaga lea a Alofipo.

I le polokalame o taumafa vela, na taua ai fo’i e ni isi o tina matutua le suiga ua i ai taumafataga o lo o auau’i mai i aso ta’itasi, lea ua latou maitauina ai se suiga tele ua i ai.

“Sa tau fa’amasani mai lava tama ma tina matutua i taumafa vela i le ulua’i taimi na fa’atoa amata ai le polokalame, peita’i o le taimi nei, ua to’atele i latou ua fiafia i le mananaia o taumafa o lo o tufatufaina”, o le saunoaga lea a le tina matua o Lipena Alefosio o Tafuna.

Na fa’amaonia mai e le Fa’atonusili o le Ofisa o le TAOA ia Ale Tifimalae i le Samoa News i le vaiaso na te’a nei e fa’apea, o se tasi o fa’amanuiaga ua maua e le ofisa, o le fa’aopoopo lea o le vaega tupe o lo o fa’atupe ai taumafa vela mo tagata matutua.

Saunoa le ali’i fa’atonusili e fa’apea, o se tasi lea o itu lelei ua mafai ona fa’amanuiaina ai le ofisa, ma o lo o i ai le fa’amoemoe o le a fa’atinoina pea galuega ma tuuina atu ripoti i ofisa o lo o fa’atupeina mai le polokalame, ina ia mafai ai pea ona latou mata’ituina tulaga o le fa’atinoina o le polokalame.

“E ui sa faigata ona talia e tama ma tina matutua le suiga o le polokalame mai le pepa taumafa i le taumafa vela, peita’i o lea lava ua silia i le to’a 1,000 i latou ua autova’a atu i le polokalame i le taimi nei, ma ua maitauina ai le to’atele ua fa’aalia lo latou fiafia i le polokalame o taumafa vela”, o le saunoaga lea a le ali’i fa’atonusili.

O se tasi o itu lelei mo tama ma tina matutua, o le fa’aiuga o le masina lenei ua fa’atulaga e fa’ataua ai e le malo lo latou aso fiafia, le aso faapitoa mo tagata matutua i le atunu’u.