O le agaga o le faafetai ma le faamalo na faaleo e le afioga i le Kovana Sili e fai ai o ia ma sui o le malo o Amerika Samoa, i Toa o Samoa uma lava o loo tautua, sa tautua, atoa ai ma tama fanau a le atunuu o loo fuafua e tautua i vaega au a le malo tele, e tusa ai o le latou tautua mo le tausiga o le filemu o le lalolagi, i le faamanatuina ai o le Aso Faapitoa mo Fitafita o loo tautua i le taua, lea sa faia i le po o le aso Toonai na te’a nei i le maota o le Lee Auditorium i Utulei.

Na faatumulia lenei faamoemoe i taitai o le malo, sui o Toa o Samoa ma o latou aiga, matua o fitafita ua maliliu, faapea ai uo ma aiga na lolofi atu latou te molimauina lenei faamoemoe taua.

O le afioga i le matua ia Togiola Tulafono na fai ma sui o le malo e faaleo le agaga faafetai i fitafita uma lava o loo tautua i le taimi nei, o fitafita sa tautua a ua malolo, o fitafita sa tautua a ua maliliu, faapea ai ma alo o le atunuu o loo faamoemoe e fia tautua i vaega au a le malo tele, ona o le taulaga ma le tautua sa latou ofoina atu mo le  atunuu.

“Faafetai mo le taulaga ola ua e ofoina mai mo ou tagata,” o le saunoaga lea a le alii kovana.

“Faafetai Toa o Samoa i lau tautua, o lau tautua lea ua mafua ai ona faamaonia le saolotoga o ou tagata ma le lalolagi, lea ua manino ai foi i le saolotoga o ou tagata i le lumanai,” o le saunoaga lea  le alii kovana.

E le gata na faafetaia e Togiola le tautua a fitafita uma lava o loo tautua i vaega au i le taimi nei, ae sa ia faafetaia foi le tautua sa ofo atu e fitafita ua maea le latou tautua, atoa ai ma i latou ua maliliu ao tautua ai i vaega au a le malo tele.

Saunoa Togiola, o le taulaga na ofoina atu e i latou nei ua avea lea ma faamaoniaga o le filemu o Amerika Samoa ma le lalolagi i le lumanai.

O se vaega o lenei sauniga na faia ai se tulai faaaloalo, e manatua ai soifua o i latou uma lava sa tautua i vaega au ua maliliu, ma o se taimi faagalo gata lea i lagona ma finagalo o matua, uo ma aiga o fitafita ua maliliu, ina ua misia i latou i lenei sauniga taua.

O nisi o malo faaaloalogia na auai i lenei faamoemoe e aofia ai nisi o alo o le atunuu ua mau tulaga i vaega au a le malo tele na malaga mai ma o latou aiga mo le molimauina i lenei faamoemoe taua, e pei o le susuga ia CSM. Tuileama Nua ma  le faletua.

Saunoa le susuga ia CSM. Nua e faapea, o le aso lenei, o se aso ua faapitoa lea mo fitafita uma o loo tautua i vaega au a le malo tele i le  taimi nei, aemaise ai foi le faamanatuina o le tautua sa ofoina mai e i latou ua malolo litaea, atoa ai ma i latou ua maliliu i le taua.

“O le aso lenei e manatua ai le tautua toto sa ofoina atu e i latou ua maliliu ao tautua ai i vaega au a le malo tele, e le o se taulaga faigofie, ae o se  taulaga sa faia ma le faanaunautaiga, ia manuia ai Amerika Samoa,” o le saunoaga lea a Nua.

 O le masina o Iulai o le tausaga nei lea na taua e Nua e atoa i ai le 35 tausaga o lana tautua i totonu o vaega au a le malo tele, ae o le tausaga foi lea ua faamoemoe e malolo litaea mai ai i vaega au a le malo tele.

“O le faamoemoe o loo i ai, afai ae maea le tautua i totonu o vaega au a le malo tele, ona  sauni lea e toe foi atu i Samoa mo le tuuina atu o le tautua ma le faafetai i nuu, ekalesia ma le atunuu, e tusa ai o le lagolago sa tuuina mai, a’o o’u tautua ai i vaega au a le malo tele, e le na o a’u ae faapena foi isi Toa o Samoa ua i’u la latou tautua,” o le saunoaga lea a Nua i se faatalatalanoaga ma le Samoa News.

Saunoa Nua, o lona faanaunauga o loo i ai, afai e maea ona faatulaga mea uma mo lana litaea, ona toe foi mai loa lea i Amerika Samoa mo le faamoemoe e fia tautua i lona nuu, ekalesia ma lona aiga.

“O la’u faanaunauga lena, ou te toe fia foi i lo’u aiga ou te fia tautua i le ekalesia, o lo’u nu’u ma lo’u ekalesia ma toe faafo’i atu le faafetai e tusa ai o le lagolago ma le tapuaiga a le atunuu ma aiga na ofo mai mo i matou nei, a’o tautua ai i totonu o vaega au a le malo tele,” o le saunoaga lea a le alii kovana.

Na faai’u le faamoemoe i se aiga tele sa tapenaina mo le mamalu o le au valaaulia.