Ads by Google Ads by Google

Fa’afetai Ta’ita’i o Manu’a ia Lolo ma Lemanu

MISAALEFUA: Fa’afetai ina ua toe manatua Manu’a sa le amanaia i tausaga e tele

 

E na o le agaga fa’afetai ma loifofoga o le fiafia na vaaia ma lagona i le aso ananafi mai Ta’ita’i o le Itumalo o le Manu’atele, ina ua molimauina ni isi o atina’e tetele ma suiga ua mafai ona fa’atutu i totonu o Manu’a mo le ulua’i taimi talu mai le tele o nofoaiga ua mavae atu.

 

Na fai le Kovana Falelima o Manu’a, le afioga i le Fa’atui ia Misaalefua John Hudson ma sui o le itumalo e faafetaia le kovana sili ia Lolo Matalasi Moliga ma le faigamalo e tusa ai o atina’e ua faatutu i totonu o Manu’a.

 

Na tutulu le afioga Misaalefua a’o saunoa e faaleo lona agaga faafetai ina ua amata ona tupu mea sa tagi atu ai le Itumalo i nofoaiga ua mavae atu ae le’i tali mai.

 

“E mafua ona ou tagi ona o le agaga ootia i le fiafia, ina ua ou vaaia le taunuu o ni isi o vaega sa moemiti i ai le itumalo, o vaega nei sa matou tagi atu ai i le nofoaiga ua mavae atu ae na lau ai lo’u valea ma fai mai ou te fiapoto, peitai Lolo ma le faigamalo, pau le tali a Manu’a i le aso (aso ananafi) ua na o le fa’afetai, fa’afetai, fa’afetai tele lava, ina ua e manatua Manu’a ma alofa mai i lo matou pagatia,” o le saunoaga lea a Misaalefua.

 

Fai mai Misaalefua, o le taua o atina’e ua faatutu i Manu’a i le taimi nei, e le gata o le a toe faaleleia ai le atina’e o le itumalo, ae o le a toe amata ai fo’i ona fo’i mai tagata Manu’a i o latou aiga ua tele aso ma tausaga o lafoa’i, ona o le sailiga manuia i le motu o Tutuila.

 

Na polomisi Misaalefua i le kovana ma le faigamalo, o atina’e ua latou faatula’i mo Manu’a o le a latou galulue faatasi e tausi faalelei, ina ia mafai ai ona fesoasoani i le faaleleia o le atina’e o le faigamalo a Tutuila ma Manu’a.

 

Ae i le tali fuaitau a le afioga i le kovana sili ia Lolo i taitai o le itumalo, sa ia faamanatu ai le taua o le galulue faatasi o tagata uma mo le faaleleia o le atinae o le itumalo.

 

“O le fausia o le malo e faamoemoe lea i le galulue faatasi o tagata uma, ae le faalagolago tasi i tagata faigaluega o le malo ma ona ta’ita’i, lona uiga Manu’a, e le mafai ona lelei ma tumau atina’e mo Manu’a pe afai tatou te le galulue faatasi i le puipuia o atina’e ua faatutu i totonu o le itumalo,” o le saunoaga lea a le alii kovana.

 

Na faamanino foi e Lolo i ta’ita’i o Manu’a e faapea, e i ai lona talitonuga e le taua le lolofi atu o ta’ita’i o le malo e fausia atina’e i Manu’a, ae taua atu le lelei o mea e soifua ai tagata o le itumalo.

 

“Matou te le faapito i atina’e mo Manu’a ona o a’u o le Manu’a po o ni isi o sui o le kapeneta e o atu i Manu’a nei, ae o le matou fatu aiga ia tausi le atunuu ia manuia ma tautua tagata uma o le atunuu ma ia maua e tagata uma avanoa tutusa i tulaga o atina’e,” o le saunoaga lea a le alii kovana.

 

Na faafetaia e le alii kovana ta’ita’i o le itumalo, i lo latou onosa’i i faafitauli na fetaia’i ma le itumalo i tausaga ua mavae, ae i lona talitonuga, afai e soifua manuia le itumalo lona uiga e soifua manuia fo’i ta’ita’i o le itumalo, ae a le soifua manuia tagata o le itumalo lona uiga e le o soifua manuia ta’ita’i o le itumalo.

 

Na faafetaia e le kovana ta’ita’i o le malo i ona tafa e tolu aemaise ai le faipule mai Uosigitone, i lo latou faamalo’ulo’u mai e molimau le aso faapitoa o Manu’a i lenei tausaga.

 

I le tatalaina ai o Ofisa uma a le malo i Ta’u, Manu’a i le taeao ananafi, na saunoa ai Lolo e faapea, ia avea Ofisa ua tatalaina nei o se auala e oo mai ai le tautua a le malo mo tagata uma o lo o soifua ma nonofo i Manu’a.

 

Sa ia fautua ta’ita’i o le itumalo o Manu’a ina ia aua ne’i faatalale i le tausia ma le vaaia lelei o meatotino a le malo ua fausia i Manu’a, a ia galulue faatasi e fai faataitaiga lelei i tagatanuu o Manu’a, ina ia faapelepele i atina’e ma fesoasoani e faaleleia le atina’eina i soo se vaega o Manu’a.

 

Sa ia faailoa fo’i i ta’ita’i o Manu’a e faapea, o le folafolaga sa latou faia ma sui o le malo ina ua taunuu le ulua’i malaga i le masina o Me na te’a nei, o le a latou taumafai e atina’e Manu’a ina ia mafai ona fesoasoani i le atina’e o le malo o Amerika Samoa.

 

“Lea ua tatou molimauina le laasaga muamua o lenei faamoemoe, ma ou te tatalo o le a tatou galulue faatasi i le tausia ma le vaaia lelei o meatotino ua tuu atu i ou lima Manu’a, ina ia faaauau ai pea galuega atina’e mo le itumalo i le o  Manu’a.

 

Na faaiu le saunoaga a le alii kovana i lona fautuaina lea o Tootoo o le Manu’a ina ia tautuana ma i latou le itumalo, ia faavae faaiuga uma i le alofa ma ia lelei fo’i lo latou va nonofo ma afioga i Tapaau o le itumalo.

 

Na taua e ni isi o tama matutua e to’atolu ma Ofu ma Olosega e faapea i se faatalatalanoaga na faasalalau tuusa’o mai i luga o le KVZK-TV ananafi e faapea, o suiga ma atina’e ua vaaia i Manu’a i le taimi nei, o ni suiga sa le’i manatu tagata Manu’a latou te oo i ai.

 

“O aso ua mavae a malaga mai Ofu ma Olosega i Ta’u, Manu’a, e faaaoga Tulula ae o aso nei ua lelei va’a ua faaaoga fo’i vaalele, e le’i faigofie taumafaiga a tuaa ua lagomau mai tiasa i le taumafaiga o se atina’e manuia mo le itumalo, peitai o suiga ua molimauina i ona po nei e lagona ai le fiafia o le loto,” o le saunoaga lea a Siva Tauiliili, 77 tausaga le matua mai Ta’u, Manu’a.

 

Ae na saunoa Leama Misiuaita ma Ioelu James Ueligitone e faapea, e talitonu i laua e tatau ona laina tutusa manuia e maua e Tutuila ma manuia e maua e Manu’a, aua o i laua o le malo e tasi i lalo o le faamalu a le Iunaite Setete.