Ads by Google Ads by Google

Fa’afetai faapitoa Lolo i lana Kapeneta mo galuega lelei

Na faaaoga e le afioga i le kovana sili ia Lolo Moliga le fonotaga mulimuli o le 2013 a le la Kapeneta ma le lutena kovana ia Lemanu Peleti Mauga i le aso ananafi, e faaoo atu ai le la faafetai i sui uma o le kapeneta aemaise ai tagata faigaluega uma a le malo, e tusa ai o galuega lelei uma sa latou faatinoina mo le atunuu i lenei tausaga o le a mae’a.

 

“E ui o lea faatoa tasi le tausaga talu ona tula’i mai la tatou nofoaiga, ae ou te iloa ua tele suiga lelei ua outou faia mo le atunuu, e le gata i matagaluega a le malo ae faapena foi i vaega tumaoti, ma o la outou tautua ua mafai ai e le atunuu ona maua le mapusaga i taimi pagatia o lo o i ai le tamaoaiga o le atunuu,” o se vaega lea o le saunoaga a le alii kovana.

 

O nisi o vaega tumaoti a le malo na taua e Lolo i lana saunoaga e aofia ai le Pulega o le Eletise ma le Suavai (ASPA), lea ua latou faia nisi o suiga i totogi o a latou tautua e pei o le faaitiitia lea o se vaega o le pili o le eletise, atoa ai ma le ave ese o nisi o totogi sa faaee i isi o latou tautua, faapea ai foi ma le Puleaga o Fesootaiga (ASTCA) lea fo’i ua amata ona faaitiitia nisi o ana pili telefoni mo le atunuu.

 

“O suiga lelei uma ua outou faia, e le mo le kovana po o le malo, ae mo le atunuu lautele, aua o le manulauti lena a le tatou faigamalo, ia ave la tatou faamuamua i auala e faaleleia ai le soifua lelei o tagata i aso fai soo,” o le isi lea saunoaga a le alii kovana.

 

Mo le vaega o le Falema’i i Fagaalu, na taua e le alii kovana le anoanoa’i o faafitauli o lo o tula’i mai ai, ma e moomia pea le galulue faatasi o le faigamalo ma le kapeneta e saili auala eseese e foia ai nei mau faafitauli.

 

E le i faailoa e Lolo po o a faafitauli sa ia taua o lo o aafia ai le falema’i o le LBJ, e ui e talitonu nisi o sui o le kapeneta sa latou talanoa mai i le Samoa News, o se tasi o faafitauli tuga o lo o feagai pea ma le LBJ i le taimi nei, e le o lava le tupe e faagaioi ai lana auaunaga mo le atunuu, o le mafuaaga foi lea e ala ai ona aafia le soifua maloloina o tagata.

 

Na faafetaia foi e le alii kovana nisi o suiga sa faia i nisi o polokalame tuai a le malo ua loa tausaga o tauave mai pea, e pei o le polokalame o pesepesega o le kirisimasi lea na faatoa mae’a atu nei, ma le taligamalo a le atunuu i taaloga a le Samoa Bowl lea na faamuta i le aso Toona’i na te’a nei i taaloga Football i le vaega o alii, ma manumalo ai le au mai Hawaii i le au fili a tama aoga a Amerika Samoa nei.

 

PESEPESEGA O LE KERISIMASI

 

Na faafetaia e le alii kovana sui uma o le kapeneta aemaise ai tagata faigaluega ma a le malo sa galulue faatasi mo le tuu faatasia o le polokalame o pesepesega o le Kerisimasi o lenei tausaga, ona o le tulaga saunia lelei ma le matagofie sa i ai lea foi faamoemoe.

 

Sa ia faafetai faapitoa i alii faatonusili e toalua ia Laloulu Dr. Uta Tagoilelagi ma Pa’u Roy Taito Ausage, ona o le polokalame sa tuu faatasia e o la ofisa.

 

“E i ai lo ma talitonuga ma Lemanu sa fiafia le atunuu i suiga sa tatou faia i le polokalame o pesepesega o le Kerisimasi o lenei tausaga, e ala i le toatele o au faafiafiaga na mafai ona faalauiloa a latou faafiafiaaga eseese i luma o le atunuu, nai lo le tulaga tuai a sa i ai, o le o mai lea o ofisa a le malo ma a latou faafiafiaga e le saunia lelei,” o le saunoaga lea a le alii kovana.

 

SAMOA BOWL

 

Ua fautuaina e le alii kovana le Komiti o lo o latou tapenaina taaloga a le Samoa Bowl i tausaga taitasi, ina ia aua ne’i toe avea lea polokalame o se polokalame e faapitoa mo se vaega o matagaluega a le malo, a ia avea o se polokalame e galulue faatasi uma i ai le faigamalo ma le kapeneta.

 

O lea fautuaga mai le alii kovana na tuuina atu ina ua maea ona saunoa faafetai le afioga i le faatonusili o le Matagaluega o Faatoaga ia Lealao M. Purcell, o ia fo’i lea o le sui o le Komiti o le Samoa Bowl, i nisi o faatonusili ma matagaluega sa lagolagoina le faamoemoe o le Samoa Bowl e pei o le Faatonusili o Aoiga ia Vaitinasa Dr. Salu Hunkin-Finau, ma le Failautusi o le Ofisa o Mataupu Tau Samoa ia Satele Galu Satele Sr.

 

Saunoa Lealao, ana leai le lagolago atu a matagaluega nei a le malo e le mafai e le komiti o le Samoa Bowl ona faataunuu ma le manuia taaloga a le fanau.

 

Na vave ona faauilavea le alii kovana ma saunoa e faapea, “o fuafuaga faapenei e le tatau ona toe aofia ai na o se vaega o le malo, ae tatau ona avea o se polokalame e lagolago uma i ai le kapeneta ma le faigamalo.”

 

Saunoa Lolo e faapea, o se tasi lenei o poloakalame a le malo ua loa tausaga o faaauau mai, ma o se tasi lea o itu e faafetaia ai le afioga i le alii kovana ia Togiola Tulafono, ona o le agaga na mafua ai ona faavae lenei polokalame o le Samoa Bowl, ina ia mafai ai ona o mai faatasi fanau a le atunuu e aoao ma faataitai i tu ma agaifanua a Samoa.

 

“Lea ua tatou vaai i tulaga manuia e pei ona i ai nisi o polokalame a le malo e pei o le aso o Tagata Matutua, pesepesega o le Kerisimasi atoa ai ma le aso o faaaliga a le aufai faatoaga, ina ua tutu faatasi le kapeneta ma le faigamalo e lagolago nei fuafuaga uma, ou te manatu e tatau fo’i ona faapena le polokalame o le Samoa Bowl, ia avea nei loa o se fuafuaga e auai faatasi i ai le kapeneta ma le faigamalo, ona tatou molimauina lea o lona tulaga manuia,” o le fautuaga lea a le alii kovana.