Na fa’afetaia e le afioga i le alii kovana ia Lolo Matalasi Moliga sui o le kapeneta, e tusa ai o galuega sa faatino mo le manuia o le faigamalo aemaise ai le atunuu atoa, ao toesea ai mo se taimi umi ona o tulaga i gasegase na mafua ai ona aumau i Hawaii mo le tele o masina.

O le po o le aso Faraile na te’a nei na toe taliu mai ai i fanua le alii kovana, talu mai le masina o Fepuari lea na malaga ai mo fonotaga i le laumua i Uosigitone, ae tula’i mai ai loa se a’afiaga i lona soifua maloloina, ma mafua ai ona nofo i le setete o Hawaii mo le tele o masina.

O le aso Toona’i na te’a nei i le potu fono a le Matagalueg o le Puipuiga o le Saogalemu Lotoifale (DHS), na usuia ai le ulua’i fonotaga a le kapeneta na taitaia e Lolo, talu ona toe taliu mai i le atunuu.

O ni isi o mataupu sa talanoaina i lea fonotaga puupuu, e le gata o tulaga ua i ai tapenaga a le malo mo vaega sa fa’aleagaina i timuga ma lologa na se’i mavae atu nei, ae sa aofia ai fo’i le fautuaina e le alii kovana o tiute fa’atino e tatau i matagaluega uma a le malo ona latou fa’atinoina.

Saunoa le alii kovana e fa’apea, e le i popole i se mea e tasi ao aumau ai i Hawaii mo le tele o masina, ona sa tele lona talitonuga e manuia taumafaiga uma a le malo e ala i le lagolago a le kapeneta i le afioga i le lutena kovana ia Lemanu Peleti Mauga.

O se tasi o pine fa’amau o le saunoaga a Lolo, o suiga ua vaaia i le taimi e taunu’u mai ai pasese mai fafo i le malae va’alele i Tafuna, e pei ona i ai tama’i fale e savavali mai ai pasese mai le va’alele e aga’i mai i le vaega e kilia ai pasese, aemaise lava pe a faaletonu tulaga o le tau i le taimi e taunu’u mai ai le va’alele.

E ui e le o atoatoa lea suiga ma atina’e e pei ona saunoa Lolo, ae o lona vaaia o ia suiga i le taimi na ia savali mai ai i fafo o le va’alele, na momoli atu ai se lagona ia te ia i atina’e ua amata ona faatinoina e matagaluega ma le malo mo le atunuu.

Saunoa Lolo e fa’apea, e tolu vaega tetele sa ia maitauina i le faigamalo ao aumau i fafo, o ia vaega aofia ai le galulue faatasi o tagata uma e fa’atino galuega mo le atina’ega o le malo; o le tali atu o le kapeneta i auala eseese e faafoe ai le malo ma fesoasoani ai i le lutena kovana; faapea ai ma le vaega e tolu, e na o le tasi le auala e mafai ai ona aga’i pea i luma o le atunu’u, o le fa’agalo o mea sa tutupu i le taimi ua tuana’i ae aga’i i luma mo se manuia o tagata uma.

Na faaiu le saunoaga a Lolo i lona faafetaia o le  pito laau a le Fono Faitulafono, i le galulue faatasi lea ma le faigamalo i auala e faaleleia ai tamaoaiga o le atunuu.

I lana saunoaga fa’ai’u, sa ia fautuaina ai le kapeneta ina ia galulue soosoo tauau pea ma le fono faitulafono, i soo se auala e manuia ai le tamaoaiga ma le atina’e o le atunu’u.