O se tasi o vaega o le saunoaga fa’amavae a le afioga i le ali’i faipule ia Faleomavaega Eni i luma o le Maota o Sui i le Konekeresi, o lona fa’afetaia lea o tagatanuu uma o Amerika Samoa, mo le avanoa sa tu’uina atu e avea ai o ia ma o latou sui i luma o le konekeresi a le malo tele.

Sa ia taua fo’i sona fa’anaunauga o lo o i ai, ina ia manatua pea o ia i galuega uma sa ia faia mo tagata Amreika Samoa ma le atu Pasefika, lea na teena e le malo tele i le tele o tausaga ua mavaef.

O le aso Lulu na te’a nei na saunoa faamavae ai Faleomavaega i luma o le maota o sui i le Konekeresi, ae lumana’i ai loa le pasia e le maota o sui o se iugafono e talosagaina ai le tatau lea ona maua le filemu, ona o mataupu o lo o tula’i mai i ogasami o Saina i Saute ma Sasa’e.

O le iugafono mulimuli lenei na fa’aulu e le ali’i faipule ma ua pasia fo’i e le konekeresi, ao le i o o i le taimi na te tuua ai le nofoa i le aso 3 Ianuari 2015, ina ua manumalo le afioga a Aumua Amata i le faiga palota na se’i mavae atu nei.

Na fa’afetaia fo’i e le ali’i faipule ona uso a faipule, i le tu’uina atu o le latou lagolago mo ia i le ulua’i taimi na taumafai mai ai lenei mataupu i le 2012, ma ia taua ai i lana saunoaga e fa’apea, ua tatau i le malo o Saina ona taofi lona teena o ona atunuu tuaoi, ae ua tatau ona saili se auala e maua ai le filemu.

Na taua e Faleomavaega le amata galue mai i le komiti o le Va i Fafo a le maota o sui i le konekeresi, ina ua fa’atoa ulufale i totonu o le konekeresi i le 1989, ma talu mai nei tausaga e tele sa avea ai o ia ma totino o le komiti, e tumau pea lona talitonuga, e tatau i le Iunaite Setete o Amerika ona ave la latou fa’amuamua i le mataupu lenei.

Sa ia taua fo’i le tumau o lona talitonuga i le tatau lea ona maua e atumotu o le Pasefika le filemu.

Sa ia faafetaia le avanoa na avea ai o ia ma sui o Amerika Samoa i totonu o le konekeresi a le Iunaite Setete, mo le umi e tusa ma le 25 tausaga.

Na faafetaia e ni isi o faipule e mafana le latou mafutaga ma Faleomavaega le tautua sa mafai ona ofoina atu e le ali’i faipule mo le tele o tausaga, lea na amata mai i se tagata faigaluega ae mulimuli ane ua tofia e avea ma faipule mo nofoaiga sosoo e 13 mo le umi e ta’i lua tausaga.

Na taua le faipule ia Lee Sheila Jackson lona vaai maualuga ia Faleomavaega, o se tagatanuu mai Amerika Samoa e pele ia te ia lona atunuu, aemaise ai o le naunau ina ia maua foi le filemu i totonu o atunuu o Saina.

Ae na talosagaina e le faipule ia IIeana Ros-Lehtinen mai Florida sui faipule o le maota ina ia palota e pasia le iugafono, atoa ai ma lona fa’afetaia o le tautua sa ofoina atu e Faleomavaega mo le tele o tausaga.

Na taua e le faipule e fa’apea, i tausaga e tele o le tautua a Faleomavaega, e le gata sa ia finau malosi mo le puipuia o aia tata o tagata i le Pasefika,  ae sa ia galue malosi foi e saili auala e faaleleia ai le soifua atoa ai ma le saogalemu o tagata lautele, ma ia fa’aigoaina ai le i’ugafono ua latou pasia, o se auala e faamaonia mai ai le galue finau o lenei ta’ita’i mo le saogalemu o le Pasefika ma le lalolagi.

fa’aliliu Ausage Fausia