Ua amata fo’i ona vave uma mea’ai i le fale, totonu o le pusa ‘aisa, totonu o le sefe, ae maise ua sagole uma i luga le tele o mea i totonu o le fale e le fanau i aso ta’itasi! Ioe ua o’o mai le tu’uaga, Matua, ia fa’aulu le fanau i ni a’oa’oga fa’apitoa e fa’apasi ai o latou taimi i le tu’uaga umi lenei o a’oga.

O se vaitaimi lenei e matua fiafia ai le fanau, aua na’o le ala a’e, matamata le televise i le cable po’o le televise masani i le tele o fa’au’uga ma mea uma sa fa’atautaia i le Sisigafu’a a Samoa lea fa’ato’a uma, ae o le a se mea aoga e maua ai?

Lele ua mae’a tapena le Feleti Barstow i Utulei, le faletusi o lou malo, ina ia mafai ona a’oa’o le faitau, ma le tusi ata, o isi lava mau ta’aloga e fa’aaoga i ai le mafaufau o le fanau, lea ua mae’a tapena i ai le Pulega o le Faletusi i a latou polokalama fa’atautaia mo le fanau iti.

“O le polokalama a le faletusi a le Malo i Utulei, ua fa’atulaga e amatalia lea i le aso 19 o Iuni, 2012 ae mae’a lea polokalama i le aso 26 Iulai, 2012. E tasi lava le vasega mo le fanau e amata i le 3 tausaga se’ia o’o i le 5 tausaga, e faia lea i le aso Gafua mai le itula e 9:30 se’ia o’o i le itula e 11:30 i le taeao lava. O isi vasega uma mai le aso Lua se’ia o’o i le aso Tofi e fa’atautaia lea mo le fanau e i le va 6 tausaga se’ia o’o i le 10 tausga le matutua.

O i latou uma nei e a’oa’oina le faitau tusi. O vasega nei e lima e e na’o le ta’i 25 lava tamaiti e talia ai, afai ae tuai ona fa’aulu le igoa o si au tama, ona le maua lea o sona avanoa. O le totogi o le lesitalaina o le igoa o lana tama ia auai e na’o le $2.

O le vaitaimi mo lesitala, o le aso 12 o Iuni 2012, ma e amata i le 9:00 se’ia o’o i le 5:00 i le afiafi. O fanau uma e ao ina lesitala lava e o latou matua i le tatou Faletusi Tele lava i Utulei.

O le isi polokalama ua seti mai fo’i e le faletusi mo le fanau a’oga i le tu’uaga ma e faia lea i le aso i Iuni se’ia o’o ia Aokuso 3, ma e leai se totogi mo nei polokalama e amata mai le matutua o le fanau e ulufale ai i le 10 tausaga ma sili atu. E aofia i le polokalama lenei le fa’aalia ai o aga PG ma le PG13, o i latoi ia e mafai ona maua latou mea’ai mama e tufaina mo i latou. Ua na’o aso Faraile lava e faia ai lea vasega fa’apitoa, ma ua talo atu ai i fanau e auai mai i le itula e 2:00 i le aoauli se’ia o’o i le 4:00 i le afiafi lava.

O le isi polokalama mo aso To’ona’i fo’i ua saunia e le Faletusi i Utulei ma le taupulega, o le “ABC i le Tausaga Atoa.” E amata mai le itula 11:00 se’ia o’o i le itula e 1:00 i le aoauli, mo so’o se tamaitiiti a’oga lava, e faitau tusi, tusi ata, ma galuega alofilima ma isi lava mea matagofie e a’oa’oina ai le fanau o so’o se tausaga. E leai se lesitala e mo’omia mo lea vasega, ma e mana’omia lava tamaiti matutua e o’o atu mo lea fo’i vasega, ia aoga ai lou aso i nei vaitau o le tu’uaga. O le faitau tusi e mo’omia e lou sui, sau e a’oa’o lau faitau tusi i le tausaga atoa, na’o aso To’ona’i e faia ai lea a’oga i le faletusi tele i Utulei.

Peita’i mo le fanau a’oga i le Kolisi, lea ua fa’alauiloa atu o le aso lenei, Iuni 6, 2012, ua lesitalaina ai fanau e fia tau’avea mataupu i lenei tu’uaga umi o a’oga. Ia amatalia ai lou tausaga a’oga ma toe soso’o ai le fau ma le fau, ae aua lava le fiafia e fa’amalolo lou fai’ai ina ne’i toe fa’aoso atu le mea ua faigata i le isi afa tausaga o lumana’i ia Aukuso, 2012.

Ua tele kosi ua tau’avea i lenei sama, aua ua fa’ailoa mai, ua ta’i fa tausaga e mafai ona e a’oga ai i le tatou Kolisi, ma maua ai fa’ailoga BA a’o e nofo lava i si ou aiga i’inei. Maua lenei avanoa matagofie e aoga ai i fe’au a si ou aiga ma sailia le atamai i mataupu maualuluga, ia fa’aaoga tatau. O i latou fo’i o lo’o i ai fa’aletonu tau le tupe e totogia ai latou a’oga, ia o’o ane pea i le tatou Kolisi mo se aiaiga ia mafai ona fesoasoani i lea pili o fa’aletonu, ae le o le nofo mau ai o lou fa’amoemoe i se fa’aletonu fa’apena e mafai lava ona talanoaina se fesoasoani i ai a le tatou Kolisi.

Fanau a’oga, ia alofaiva ane e saili nei ituaiga o a’oa’oga i tomai lautele mo nisi mea e le o a’oa’oina ai outou i potu a’oga, e leai lava se mea e maumau, e mo’omia ona agava’a outou i mea uma.

 Ua i ai fo’i polokalama a Autalavou ua toeititi fa’aoso mai i luga, ina ia mafai ona fa’aaoga tatau ai taimi o le fanau talavou, aua a tu’usamanoa i latou e i’u ina afaina i latou i le tagofia o ava o’ona ma fuala’au fa’asaina, pe afai ae leai se mea lelei e fa’aosofia ai lo latou fia fa’apotopoto fa’atasi ma galulue e fa’atino.