Ads by Google Ads by Google

Fa’aaoga se agaese e fa’ao’o ai manu’a ...

i se alii talavou

O le alii e 18 tausaga lea na ia fa’aaogaina se agaese e fa’aoo ai manu’a i se isi alii talavou, ona ua fasi e le ali’i lea lona uso laititi, ua fa’atulaga e le faamasinoga le aso 4 Me e lau ai lona faasalaga, i le maea ai lea ona tausalaina o ia i le moliaga o le faaoolima i le tulaga lua.

O Siamupeni Lefaoseu na ulua’i tuuaia e le malo i le moliaga mamafa o le faaoolima i le tulaga muamua, ae ina ua maea ona sainia se maliliega ma le malo i le vaiaso nei ma talia e le faamasinoga, ua suia ai le moliaga ua tausalaina ai o ia i le faaoolima i le tulaga lua, ae solofua e le faamasinoga le moliaga mama o le faatupu vevesi i nofoaga faitele.

I le tali ioe ai o le ua molia i le moliaga lea ua ta’usala ai o ia e le faamasinoga, sa ia tautino ai e faapea, i se taimi o le masina o Me 2011 i Faleniu, sa ia faaaogaina ai se agaese e faaoo ai manu’a i le alii na aafia, ma o lea gaioiga sa ia faia sa le tusa ai ma ala o le tulafono.

I faamaumauga a le faamasinoga o loo taua ai e faapea, i le aoauli o le aso lea na tulai mai ai le faalavelave ina ua tuua le aoga, na tulai mai ai se fusuaga i le va o le uso laititi a Siamupeni ma se tasi o alii aoga, ae oso faalava ai loa ma le alii na manu’a.

Na alu atu le uso laititi o le ua molia ma fafagu o ia ao moe, ma faailoa atu ai le fasiga o ia e isi tamaiti aoga, o lea na te’i valevale a’e ai i luga ma le Siamupeni ma uu mai i lona lima se agaese, ma agai atu loa i le fale faatali pasi lea o loo i ai le au alii na fasia lona uso laititi, ma ia faaoo ai loa manu’a i le alii na aafia.

Ua manatu loia o le a tuuina atu i se taimi o i luma a la faafinauga e tusa ai o lenei mataupu, peitai ua malamalama ma iloa e le ua molia, tusa lava pe fautua atu loia i le faamasinoga ina ia faamama se faasalaga mo ia, e pule le faamasinoga pe talia pe teena ia faafinauga.

Ua ia malamalama foi, afai e tuuina mai se faasalaga a le faamasinoga mo ia ae le tau ai lona loto, e le mafai ona toe suia lana tali ioe ua tuuina atu.

Na taua foi i se vaega o lenei maliliega le faia lea e le aiga a le ua molia o se ifoga aga’i i le aiga o le alii na aafia i Faleniu, ma sa talia lelei e le aiga lea. Ua maea foi ona faasala e le pulega a alii ma faipule a Faleniu le aiga a le ua molia e tusa ai o le faalavelave na tulai mai.

I le taliaina ai e le faamasinoga maualuga o le maliliega sa sainia e le malo ma le alii ua molia, sa poloaina ai loa e le faamasino sili le Ofisa Faanofovaavaaia ina ia tuuina atu sa latou ripoti e tusa ai o le mea sa tupu, ma fuafua ai se faasalaga a le faamasinoga

O loo tumau pea poloaiga o loo tatala ai i tua le ua molia e faatali ai le aso lea ua faatulaga e lau ai lana faasalaga.O le tamaitai loia ia Sharron Rancourt o loo tulai mo le ua molia, ae o le tamaitai loia sili lagolago ia Cecilia Reyna o loo tulai mo le malo. O le afioga i le faamasino sili ia Michael Kruse na faatautaia le iloiloina o lenei mataupu, i le lagolagosua a afioga i alii faamasino lagolago ia Logoai Siaki ma Faausili Pomele.