E fou le vaaiga lea ua amata ona vaaia i le atunuu i le taimi nei, o le faaaoga lea o fanau laiti e saili ai tupe, e ala i le faatutu solo o i latou i luma o faleoloa poo ni nofoaga e tumutumu i ai tagata faatau.

O le alia’e mai ai o lea tulaga ua fesiligia ai e nisi o matua ma taitai o le atunuu le tulaga ua taoto i ai le malupuipuia o fanau laiti, pe ua mafua lenei tulaga ona ua fia aai le aiga, pe ua mafua ona o sailiga tupe a ekalesia, faalapotopotoga poo nisi lava foi mafutaga i le atunuu.

O le mataupu lenei na mapu a’e i luga o le polokalame a le alii kovana i le vaiasoi na te’a nei, ina ua faasea se tina i le kovana ona o se vaaiga faamomoi loto sa ia maitauina i se tasi o afiafi, i se alualutoto sa aisi atu ia te ia i luma o se faleoloa sa paka ai lana taavale, pe maua atu se tupe ma ia.

Na taua e le tama lea i le kovana, o le alualutoto lea sa aisi atu ia te ia, sa nofo ma le api ma le peni i luma o le faleoloa, soo se tagata lava e ulufale atu i totonu o le faleoloa e muamua fai i ai le alualutoto ao le’i oo i totonu o le faleoloa.

“O le alualutoto lava lenei sa ou vaai ai i le afiafi lea, na ou toe vaai ai foi i le isi aso na sosoo ai i luma lava o le faleoloa lea, ma ua oso mai ai se manatu ia te a’u, pe o le mea ea o loo faaaoga e matua o lenei tamaititi o ia e saili ai tupe mo loina aiga pe leai,” o le atugaluga lea a le tama sa valaau i le kovana.

Na taua e nisi na talanoa mai i le Samoa News, e le na o fanau o loo tupu ai le tulaga lea, ae oo lava foi i tagata matutua ua maitauina foi lo latou faia o le amio lea, o le aisi tupe solo i isi tagata ma le faaupuga, “sei faatau ai se meaai mo lana fanau.”

“Ailoga e kalafeagai lea kulaga o le aisi faapegei o kagaka Samoa, akogu e gaka lava i akuguu i fafo o loo kele ai le oge ma le fia aai, ae o Samoa e maua meaai ma soo se mea e magagao i ai oga kagaka i kaimi uma, aisea la ua kupu ai legei mea,” o le fesili fia malamalama lea a se tasi o tamalii matua o le atunuu e lei finagalo e faailoa lona suafa.

O le tulai mai ai o le faafitauli lenei, na mafua ai ona saunoa le alii kovana ia Togiola Tulafono, e tatau ona galulue faatasi le atunuu e foia le faafitauli lenei pe afai e masalomia o loo faaaoga e matua fanau i ni auala sese e maua ai tupe.

A le o lena foi, e i ai fanau latou te faia nei uiga pe afai o loo sosola ese ma o latou aiga, ona aisi solo lea i tagata mo ni tupe e faatino ai mea latou te mananao.

“Ou te talosagaina le atunuu ina ia tatou galulue faatasi, faafesootai le ofisa o leoleo i soo se taimi e maitauina ai fanau o loo faaaogaina i ni auala le fetaui, pe logo foi leoleo pe afai e masalomia o fanau nei o loo sosola ese mai o latou aiga,” o le fautuaga lea a le alii kovana i luga o lana polokalame.

O nisi o tagata o loo faia le amio lea o le aisi tupe e pei ona taua e se tasi o alii ave taxi, o tagata mai nisi o ekalesia, o loo latou faia le tulaga lea o le aisi i tagata mo ni tupe e fesoasoani ai i faagaioiga a latou ekalesia.

“E le tatau ona saili faapena tupe e atina’e ai le galuega a le Alii, afai ua manatu e fia tautua mo le Alii, fai le taulaga ofo ae le o le alu e aisi mai tupe mai isi tagata,” o le tomumu lea a se tasi o tagata lotu e lei finagalo e faailoa lona suafa.